Dhilebiwe na Marko 15:1-47
15 Vati vayaga, anddimuwa a anamakutta, anddimuwa a nlogo vamodha na anamasunziha magano, kuloga Sinedriyu* yotene, atugumana wi alaganele yokosa; mmalelani ahimmaga Yezu, ahimperheka wa Pilato.
2 Venevo Pilato ohinvuza: “Weyo oli Mwene wa Ayuda?” Iyene omwakula: “Ddi nyuwo mwanya munloga.”
3 Mbwenyi anddimuwa a anamakutta annimagedhana dhinjene.
4 Venevo Pilato ohinvuza wili: “Kunna-wene yowakula, kewa dhotene dhinumagedhani?”
5 Mbwenyi Yezu kavahile yowakula yina, nona Pilato otikina.
6 Vyaka dhotedhene dhajiwa mattanga, governador wahikana elemelelo ya onfurula munyaperhezu, odduwene wakumbirhiwa.
7 Mudhidhene obule wahikalawo mulobwana mmodha wakuweliwa Barabá wali mukambura na atimbwini akwaye, awene ampile muttu sabwa ya otimbwini wawa.
8 Dhahene, ofiya muttitti wa attu, aroma omukumbirha Pilato wi akose yalemeleliye okosa.
9 Iyene ohavuza: “Nyuwo munfuna wi miyo ddinfurule Mwene wa Ayuda?”
10 Vowi Pilato wanziwa wi anddimuwa a anamakutta amperhekele sabwa ya ntxiga.
11 Nona anddimuwayá a anamakutta atujela muttitti wi akumbirhe ofuruliwa wa Barabá.
12 Venevo Pilato ohavuza wili: “Kito munfuna ddimukosena nni ole onimukuwelinyu Mwene wa Ayuda?”
13 Awene akuwa dila yina: “Akomeliwe vapingirhizini!”*
14 Mbwenyi Pilato ohavuzavi: “Sabwaya jani? Obure gani okosiliye?” Awene akuwavi eraga: “Akomeliwe vapingirhizini!”*
15 Pilato afunaga ohagalaliha muttitti, onfurula Barabá, vano oruma wi Yezu awasuliwe vina apiwe vapingirhizini.
16 Anyakoddo amuttukula Yezu, adhowana vatakulu va governador vina akuweliha makuru otene a anyakoddo akwawa.
17 Awene amwabaliha mukumi wofila, aluwa kara* ya minga, amwabaliha mmusorhoni mwaye.
18 Vina aroma ologana dhahi: “Munolejeliwa, Mwene wa Ayuda!”
19 Anvada vina musorho na murhazi, amuturela mara, akokora osogorho waye vina akala ninga animwebedha.
20 Mmalelani ombedda, amurula mukumiyá w’ofila, amwabaliha guwo dhaye. Venevo amuttukulela otakulu wi amukomele vapingirhizini.
21 Agumana na mulobwana mmodha wavira adhagana omundda, oddoya wakuweliwa Simoni, w’o Sirene, wali Babe wa Alexandre na Rufu, awene ahimmagelela ottukula pingirhiziyá.*
22 Amuttukulela mburo onkuweliwa Gólgota, entapulela “Nigalagadha.”*
23 Wenewo ahinvaha vinyu yotaganyihiwa na mira,* vano Yezu kafunile omwa.
24 Amukomela Yezu vapingirhizini vina anyakoddoyá agawelana guwo dhaye atamelaga oziwa na gari, bani agahalilena eni.
25 Mudhidhi wakomeliwiye vapingirhizini yali wora tanu na nayi dha membesi.*
26 Mazu omusumelana alebilani, aloga: “Oddu ddi Mwene wa Ayuda!”
27 Ahikalawo vina ambava eli akomeliwe vamodha na Yezu, mmodha omononi waye woja, mwina omononi waye wemara.
28 * ——
29 Attu avira annimuruwana akutukutaga musorho wawa, alogaga: “Weyo wafuna ogujula mparha vina wimetxa mwari mwa malabo mararu,
30 kavivune-to, katita-to vapingirhizini.”*
31 Yakakene vina jakosa anddimuwa a anamakutta vamodha na anamasunziha magano, annimbedda mukalelani, alogaga: “Iyene ohavuna attu ena, mbwenyi mwinya kanwodha ovivuna!
32 Mmuttiye Kristu Mwene wa Izrayel, atite ovanene vapingirhizini; wila iyo none vina nirumele.” Masiki ambava akomeliwe vamodha na iyene vapingirhizini* annimuruwana.
33 Mwakwanelani wora 12,* ofiyedha wora 15,* elabo yotene yahikuneleya n’eddima.
34 Yakwanelaga wora 15,* Yezu okuwa na lizu noliba: “Eli, Eli, lama sabaktani?” Entapulela, “Mulugu waga, Mulugu waga, muddinyanyalele nni?”
35 Mwiwalani ejoyá, ena àli vakuvi, ahiroma ologa dhahi: “Mmwiwe! Iyene onimukuwela Eliya.”
36 Mmodhavo ottamaga momaguva, ottukula esponja, obwiniha mwali vinyu yonyunya, ohika omurhazini vina ohinvaha wi amwe, alogaga: “Kamuttiyeni! Ninfuna none akala Eliya onele odha omburutxavo.”
37 Vano Yezu okuwa na lizu noliba vina ohikwa.*
38 Venevo kurtina na mumparhani niharuwa vari, oroma odhulu ofiyedha mutxiddo.
39 Vano, mwimeleli wa anyakoddo wali venevo amwang’anelaga Yezu, moneliye dhotedhene esi dhipadduwile ohiloga: “Txibarene, mulobwana oddu wali Mwana Mulugu.”
40 Ahikalavo ayana emelile wolapela-wene ang’anaga, àli Maria Madalena, Maria mayi wa Tiago mung’ono na Jozéz vamodha na Salome,
41 Ayana aba anninvelela Yezu oromana o Galileya, amukamihedhaga na mabasa, ahikalavo vina ayana enjene adhowile vamodha na iyene o Jeruzalemi.
42 Vowi vati vahiroma oriba vina nàli siku N’osasanyedha, kuloga siku nafwarela Sabuddu,
43 Jozé w’o Arimateya, olibiha murima odhowa wa Pilato vina okumbirha maningo a Yezu. Jozé oddo wali mulobwana worihiwa vaddiddi wakosa epaddi ya tribunali ya Ayuda. Iyene vina wanjedhela Omwene wa Mulugu.
44 Vano Pilato wanfuna oziwa akala Yezu ohikwa, nona omukuweliha mwimeleli wa anyakoddo ohinvuza akala Yezu ohikwa-wene.
45 Mmaliliye okaana ebaribari na mwimeleliyá wa anyakoddo, ohirumeliha wi Jozé attukule maningoyá.
46 Jozé ogula guwo ya linyu, oburutxavo maningo a Yezu vapingirhizini, mmaleliye opopottela maningoyá vaguwoni, odhowa wika mwikuttani* yatopiwe vamaluguni. Vasogorhova iyene opigiritxelawo nlugu omavolowelo wa ekuttayá.
47 Mbwenyi Maria Madalena na Maria mayi wa Jozéz, ahikalavi awimelene ang’anaga vattiyiwiye.
Manota
^ Kang’ana Mazu Atapuleliwe.
^ Obe, “Mumpe vapingirhizini!”
^ Obe, “Mumpe vapingirhizini!”
^ Obe, “mwereko.”
^ Obe, “pingirhizi ya goyi.” Kang’ana Mazu Atapuleliwe.
^ Obe, “musorho ohalile makuvavi.”
^ Murobwe wa mataba owawa vaddiddi.
^ Na egregu, “wora yanoraru [nzuwa banimalile opattuwa].”
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Obe, “pingirhizi ya goyi.” Kang’ana Mazu Atapuleliwe.
^ Obe, “pingirhizi ya goyi.” Kang’ana Mazu Atapuleliwe.
^ Na egregu, “wora yanotanu na modha [nzuwa banimalile opattuwa].”
^ Na egregu, “wora yanotanu na nayi [nzuwa banimalile opattuwa].”
^ Na egregu, “wora yanotanu na nayi [nzuwa banimalile opattuwa].”
^ Obe, “ottiya ovuma.”
^ Obe, “masiye a aliba okwa anubuweliwa na Mulugu.”
