Dhilebiwe na Marko 2:1-28
2 Mvirele masiku mang’onovi iyene odhowa wili o Kafarnau, muselu wawi iyene oli vatakulu omwadheyela murudda wotene.
2 Venevo muttitti mwinjene otugumana, ofiyedha ohikalavo mburo nne vamusuwová; novenya iyene oroma walaleya mazu a Mulugu.
3 Vasogorhova, odheliwana muliba oragala wattukuliwe na alobwana anayi.
4 Vano awene kawodhile omuttukulela vàli Yezu, sabwa ya muttitti; nona ahipumbunula epaddi ya vadhulu va nyumba mwali Yezu. Mmalelani atitihedha makayá vàginantihiwe muragaliyá.
5 Yezu onaga nroromelo nawa, omwaddela dhahi muragaliyá: “Mwanaga, dhottega dhawo dhileveleliwa.”
6 Vano vahikala anamasunziha magano agilatile venevo, n’eji aroma wubuwela mmirimani mwawa:
7 “Muttu oddu onlogela eni dhahene? Iyene onoveyiha. Bani onwodha olevelela dhottega ahili mmodha bahi, Mulugu?”
8 Mbwenyi momaguva-mwene Yezu ozinddiyela mmurimani mwaye, wi awene obuwela esuwene nona ohavuza: “Nyuwo munubuwelela nni dhilobo ninga esuwene mmirimani mwenyu?
9 Enrutxa omwaddela muragali jivi: ‘Dhottega dhawo dhileveleliwa,’ obe: ‘Kavenya ottukule maka awo vina kedda’?
10 Vano wi muziwe yawi Mwana-muttu ovahiwa owodha wolevelela dhottega velaboni ya vati—” iyene omwaddela muragaliyá:
11 “Miyo ddinouwaddela, Kavenya ottukule maka awo odhowe vatakulu.”
12 Dhawene iyene ovenya momaguva-mwene ohittukula maka aye oroma odhowa oniwaga na otene àlivo, n’eji otene àlivo ahagalala venjene vina amuttittimiha Mulugu, alogaga: “Ejiya txipo kaninonaga.”
13 Iyene odhowa wili nikome na nyaza, muttitti wa attu ahinfwara, venevo oroma wasunziha.
14 Adhowagavi, omona Levi mwana Alfeu, bagilatile vapitxiwa musoko, venevo omwaddela: “Kakala namafwara waga.” Iyene ovenya, ohinfwara.
15 Mudhidhi mwina Yezu wela oja* vatakulu va Levi, vina anamapitxiha musoko enjene vamodha na attegiyá anja* na iyene vamodha na anamasunza aye, vowi enjiyá anninfwara.
16 Vano anamasunziha magano a Afarizi mmonelani ajaga na attegi vina na anamapitxiha musoko, ahavuza anamasunza aye: “Ngani, iyene onjela nni na anamapitxiha musoko vina na attegi?”
17 Yezu mwiwaliye esodhá ohiloga: “Attu ali agumi kanimutamela mediku, mbwenyi animutamela babale ali aredda. Miyo kaddidhele wakuwela aligani, ddidhele watamela attegi.”
18 Anamasunza a Joau na Afarizi anttuga. Nona amususela Yezu, ahinvuza dhahi: “Anamasunza a Joau na anamasunza a Afarizi anottuga, kito anamasunza enyu ankoddela nni ottuga?”
19 Yezu ohawakula: “Koddi amarho a muteli* akana mwaha wokubanya oku muteliyá bali na awene? Bali vamodha na muteli, awene kanfwanyela ottuga.
20 Mbwenyi, anele ofiya masiku ahinakale muteli* na awene, malabo abo panattugani.
21 Kawo ongwaddawo guwo eswa, batxaparina guwo yawale. Agakosa dhawene, guwo eswa esoneliwewo enodha oweta yawale, otayeyawa buttabwa.
22 N’ekalelo yakakene, kawo onika vinyu eswa, mmabudduni awale asasanyiwe na ttebe. Akala muttu onokosa dhawene, vinyu enotaya mabudduyá, ngamala mabuddu na vinyuyá dhinoyeleliwa. Nona vinyu eswa enikiwa mmabudduni maswa.”
23 Siku dhahi iyene wela ovira mminddani dha tirigu na Sabuddu, anamasunza aye aroma omvula tirigu eddaga.
24 Venevo Afarizi aloga dhahi: “Moone! Anamsunza enyu ankoselani dhilobo dhihinrumelihiwa siku na Sabuddu?”
25 Mbwenyi iyene ohawakula: “Nyuwo kamunengesaga ekosile Davidi vamodha na alobwana aye, vahananina elo, vina mwakanelani dala?
26 Kamunasunzaga yopadduwa enimuloga Abiatar munddimuwa wa anamakutta, wi Davidi avolowa mba mwa Mulugu oja pawu dhaperhekeliwa mukutto, esuwene dhaharumelihiwa oja muttu-muttuvi ahili anamakutta bahi, vina wi ohavaha alobwana àli na iyene.”
27 Vina ohenjedhedha: “Siku na Sabuddu nikalilewo mwaha wa muttu, ottiya muttu mwaha wa Sabuddu.
28 Nona Mwana-muttu, Nabuya masiki wa Sabuddu.”
