Dhilebiwe na Marko 3:1-35
3 Iyene ovolowa wili musinagoga* dhahi, mwenemo ohinfwanyamo mulobwana woragala nlada.
2 Vano awene annimwang’ana ajedhaga wona akala agahinvulumutxa siku na Sabuddu, wi ammagedhe.
3 Venevo Yezu ohiloga dhahi na mulobwana ole waragalile nladana: “Kavenya, odhe vari apa.”
4 Mmalelani, iyene ologana dhahi: “Enrumelihiwa okosa na Sabuddu txini, yapama obe yabure, ovuna egumi* obe opa?” Mbwenyi awene kamwakulile elo.
5 Mmaleliye wawang’ana otene àlivo n’otikina, vina na okubanya mwaha wa ovadda wawa murima, iyene ohiloga na mulobwanayá: “Katapula nlada nawo.” Mutapuleliye, nladana niyamo.
6 Venevo Afarizi abudduwavo vina momaguva aroma omulaganela vamodha na attu amfwara Herodi wila ampe Yezu.
7 Vano Yezu na anamasunza aye adhowa o nyaza vina muttitti mwinjene wa attu o Galileya na o Judeya ahinfwara.
8 Muttitti munddimuwa wa attu o Jeruzalemi, o Idumeya epaddi yina ya o Jordau na mirudda dhaddamele o Tiro na o Sidoni anninfwara Yezu, sabwa ya wiwa dhotene dhakosiye.
9 Yezu ohawaddela anamasunza aye wi attiye mwanddiya vakuvi na iyene wila awelemo muttitti wa attu ogafunaga onfunya.
10 Sabwa yawi iyene wannavulumutxa enjene, otene akaana viredda dhokattamiha andhowa vàliye wi amuttidde bahi.
11 Vina muya dhabure dhigamona dhannimukokorela, dhikuwaga dhahi: “Nyuwo muli mwana wa Mulugu.”
12 Vano mwa dila dhinjene iyene ohakokomeza wi ahimwaddele muttu eliye.
13 Iyene owela vamwangoni ohakuwela abale àsakuliliye vina awene adhowa vàliye.
14 Iyene okosa* nikuru na alobwana 12, àvahiliye nzina na arumiwi, abuwene afuna onvelelaga vina agarumiliye wi alaleye.
15 vina wahavaha owodha wa ottamagiha muya dhabure.
16 Mwari mwa nikuru nttile na 12, wahikalamo Simoni onvahiliye vina nzina na Pedro,
17 Tiago mwana Zebedeu, Joau mbali wa Tiago, aba (iyene ohavaha nzina na Boanerge entapulela “Ana Jayi”),
18 André, Filipi, Bartolomeu, Mateu, Tomé, Tiago mwana Alfeu, Tadeu na Simoni Mukananita,
19 vina Juda Iskariote odhile omuguliha.
Mmaleliye ohivolowa nyumba dhahi,
20 muttitti wa attu ohigumana wili vaaliye ofiyedha awene ohiwodha oja elobo-txilobo.
21 Vano amudhaye muziwelani esodhá ahidhowa wi amuttukulele vatakulu sabwani anloga wi: “Iyeneyá otaduwa.”
22 Yakakene jaloga anamasunziha magano àdhile o Jeruzalemi; awene anloga dhahi: “Iyene ovolowiwa Satana,* vina onwodha ottamagiha muya dhabure na guru dha mulamuleli wa adomonyo.”
23 Nona mmaleliye wakuwela ohawaddela na dholaddaniha: “Enwodheya dhavi Satana omuttamagiha Satana?
24 Omwene wotene ongaweya, kunimela,
25 vina akala nyumba ji nyumba enogaweya, nyumba ejo kinimela.
26 Akala Satana mwinyene ovisadduwela, ogaweya, kanakale wowimelene vina omagomelo waye onowaddamela.
27 Txibarene, kawo onwodha ovolowa mba mwa mulobwana woliba, awodha wiyamo dhilimo ahiromile ommaga mulobwanayá. Agamala ommaga panawodhiye omwiyela.
28 Miyo ddinouwaddelani ebaribari, dhotene dhinkosa attu dhinoleveleliwa kintanala yottegayá obe yoveyiha enlogani.
29 Vano onveyiha muya wokoddela kanaleveleliwe, vowi yoddawa yaye kingoma.”
30 Emulogihile Yezu dhawene jawi awene anloga dhahi: “Iyene ovolowiwa muya wabure.”
31 Vasogorhova mamayaye na abalaye adha, bemela otakulu vina bamukumbirha muttu wila amukuwele.
32 Vowi vahikala attu amurugunuwele ogilatene, iyene ohiloga dhahi: “Mamayenyu vamodha na abalinyu ali oko otakulu, anfuna aloge na nyuwo.”
33 Vano iyene ohawakula: “Mamayaga na abalaga bani?”
34 Venevo ohawang’ana abale amurugunuwele ogilatene alogaga: “Mamayaga na abalaga baba!
35 Onkosa ofuna wa Mulugu, oddo ddi mbalaga, ddi murogoraga vina ddi mamayaga.”
Manota
^ Kang’ana Mazu Atapuleliwe.
^ Obe, “onvuna muttu.”
^ Obe, “osakula.”
^ Na egregu, “Belzebú.” Nzina nina ninkuweliwana Satana, oli musogorheli obe mulamuleli wa muya dhabure.
