Dhilebiwe na Marko 5:1-43
5 Yezu na anamasunza aye afiya kobela yina ya nyaza, murudda wa Ageraseno.
2 Venevo Yezu mutiteliye mmwanddiyani, mulobwana mmodha wavolowiwe muya wabure, obudduwa mmasiye, omuttamagela.
3 Mulobwana oddo wakala mmasiye, vina ofiyedha siku nttile kawo muttu wawodha ommaga nne ngafuna na kurenti.
4 Dila dhinjene iyene wammagiwa na kurenti myeddo na madayá, mbwenyi wanttumula kurentidhá, kavo muttu wamuwodha.
5 Mattiyu na mutana iyene kàmala okuwa eddaga mmasiye na mmyangoni vina wanvigwadda na malugu.
6 Mbwenyi mmoneliye Yezu adhaga wolapela-wene, omuttamagela vina omukokorela.
7 Venevo okuwa na lizu nowiweya: “Onfuna nni na miyo, Yezu, Mwana Mulugu Namadhulu-dhulu? Kamuddubelele Mulugu wi kunadditabutxe.”
8 Vowi Yezu wahiloga dhahi: “Kabudduwamo mwa muttu oddo, muya wabure wé.”
9 Venevo Yezu ohinvuza: “Nzina nawo bani?” Iyene ohakula: “Nzina naga ddili Muttitti, sabwani nihinjivana.”
10 Mulobwana ole omukumbirha Yezu wila ahittiye muya esile odhowa elabo yina.
11 Mburo obule wahikala guluwe dhowinjiva dhasapa vamwangoni.
12 Nona muya esile dhimuttidda myeddo Yezu dhahi: “Onirumelihe ovolowa muguluweni.”
13 Yezu orumeliha. Muya esile dhabure dhimuttiya mulobwanayá, dhivolowa muguluweni, guluwedhá dhittamagela munyaza, dhibwina, dhiririma, dhali dhowakwana 2.000.
14 Mbwenyi abale asapiha guluwedhá attawa vina adhowa alaleya musidadi na mmuruddani, attuyámo adhowa wona dhapadduwile.
15 Dhahene asusela vàli Yezu vina amona mulobwana ole wavolowiwe muttitti wa muya dhabure, wogilatene babalile guwo vina bali waderetu-wene, venevo attiddiwa wova.
16 Abale onile esidhá, ahawaddela dhampadduwele mulobwana oddule wavolowiwe muya dhabure na dhapadduwile na guluwedhá.
17 Venevo aroma omukumbirha Yezu wi abudduwemo mmuruddani mwawa.
18 Iyene awelaga mmwanddiyani mulobwana ole wavolowiwe muya dhabure, omukumbirha wi amuttiye odhowa na iyene.
19 Vano Yezu karumelile, ottiya ejo ohimwaddela: “Kadhowa vatakulu va amudhawo wawaddele dhotene dhukoseli Yehova vina ttagaraga yuwonihiliye.”
20 Mulobwana oddule odhowa, oroma olaleya mu Dekápoli* dhotene dhamukosele Yezu, attu otene ewa antikina.
21 Mmalele Yezu owela mmwanddiyani abuwela kobela yina, muttitti mwinjene wa attu otugumana nikome na nyaza.
22 Ofiyavo munddimuwa dhahi wa musinagoga wakuweliwa Jairo, mmoneliye ohikokora osogorho waye.
23 Iyene omunlela dila dhinjene, alogaga: “Mwanaga muredda vaddiddi. Ddinoukumbirhani, dhaunoni mmutapulele nlada wila akalewo.”
24 Yezu odhowa na iyene vina muttitti mwinjene wa attu waninfwara anfunyaga.
25 Wakalavo muyana watabuwa na eredda y’obudduwa nikami mwari mwa vyaka 12.
26 Iyene wahitabuwa venjene atamelaga ovulumuwa na amediku; wahinonga dhaye dhotene. Mbwenyi kavulumuwile, ottiya ejo wela ottabwavi.
27 Mwiwaliye ologa sabwa ya Yezu, omususela okotti, ottidda vang’onovi yabalo yaye,
28 iyene wanloga mmurimani mwaye: “Koddiginya yabalo yaye bahi, ddigahivulumuwa.”
29 Momaguva, nikamina nihimala obudduwawa vina ohona mmaningoni mwaye wi ereddayá yamutabutxa evira.
30 Mudhidhene obo, Yezu ozinddiyela wi mmaningoni mwaye mubudduwa guru, nowidhawo iyene ozugunuwela muttitti, bavuza: “Bani ottiddile yabalo yaga?”
31 Anamsunza aye amwakula: “Nyuwo munowona wila muttitti wa attu onoufunyani ki munvuzelani, ‘Bani oddiddiginyile?’”
32 Masiki dhawene, Yezu wannang’anavi oku-n’oku wi amone bani wamuddiginyile.
33 Muyanayá agurumelaga na wova, aziwaga dhotedhene dhampadduwele, omususela Yezu, vina okokora osogorho waye vina omwaddela ebaribariyá.
34 Yezu omwaddela: “Mwanaga, nroromelo nawo niuvulumutxa. Kadhowa na murenddele, eredda yautabutxa egoma.”
35 Yezu alogaga esidhá afiya alobwana dhahi adhana vatakulu va Jairo vina ahiloga: “Mwanenyu okwa, munimunyonyela nni Namasunziha?”
36 Mbwenyi Yezu mwiwaliye esodhá ohiloga dhahi na Jairo: “Kuwove, ororomele bahi.”
37 Venevo Yezu karumelile ofwariwa na muttu mwina ahili Pedro, Tiago na Joau mbali wa Tiago.
38 Mfiyedhani vatakulu va Jairo, ohafwanyavo attu onla na lizu noliba vina na okubanya onddimuwa.
39 Mvoloweliye ohiloga: “Nyuwo mununlela nni vina munkubanyela nni dhahene? Namwali oddu kakwile, onogona bahi.”
40 N’eji aroma omuteya, ampwazaga. Mmaleliye okumbirha wila abale alimo abudduwe, Yezu omuttukula babi na mayi wa mwanayá, vamodha na anamasunza àli na iyene, venevo odhowa vàli mwanayá.
41 Nomala, Yezu ottidda nlada na mwana-muyanayá ohiloga: “Talita Kumi,” entapulela: “Mwana-muyana, ddinouwaddela, kavenya!”
42 Mudhidhene obule mwanayá ovenya oroma wedda. (Iyene wanna vyaka 12.) N’eji amambalaye kawodha omalana wagalala onddimuwa wannani.
43 Mbwenyi Yezu ohakokomeza vaddiddi wi ahimwaddele muttu dhapadduwile vina oharuma wi amvahe yoja mwanayá.
Manota
^ Obe, “elabo ya Sidadi Kumi.”
