Dhilebiwe na Marko 7:1-37
7 Venevo Afarizi vamodha na anamasunziha magano adhile o Jeruzalemi, atugumana vàliye.
2 Awene ahawona anamasunza a Yezu, ajaga na mada okwarula, kuloga ahinawile mada.
3 (Afarizi na Ayuda otene, kanja ahinawile mada mpaka wigugunyoni afwaraga yeddelo ya azamani awa,
4 ageyela omusika kanja ahinatti ovikoddeliha na manje. Dhikalawo dhilemelelo dhina dhittiyedhiwani esuwene dhinfwarani, ninga obatiza kopo, majaro na dhobo dha safurhi.)
5 Afarizi abo na anamasunziha magano ahinvuza: “Anamasunza enyu anlupela nni magano a yeddelo ya attu a nsaka nawale? Awene ankoddelani onawa mada agafunaga oja?”
6 Iyene ohawakula: “Izaiya ohivuhulela ebaribari yenyu agwarhagwambi, dhahene ninga mulebeliye, ‘Nlogo ntti ninddittittimiha na mulomovi bahi, mbwenyi murima wawa oli wolapelana na miyo.
7 Oddebedha wawa kampurana elo, vowi ansunziha magano a attu.’
8 Nyuwo munopwaza dhoruma dha Mulugu, mufwaraga yeddelo ya attu.”
9 Iyene ohawaddelavi: “Nyuwo munoziwa pama opwaza dhoruma dha Mulugu wila mufware yeddelo yenyu.
10 Motagiha, Mizé ohiloga, ‘Omurihe babo na mayo,’ vina ‘Onimuruwana babe obe maye, apiwe.’
11 Vano nyuwo munologa dhahi, ‘Akala muttu onomwaddela babe obe maye eraga: “Dhotedhene dhinna miyo dhafunemi ouvahani, (ddinfuna ddimperhekele Mulugu),”’*
12 Nyuwo kamunimuttiya omukosela ngafuna elobo eng’onovi babe obe maye.
13 N’eji nyuwo munopwaza nzu na Mulugu na yeddelo yenyu, vina munokosa dhilobo dhinjene ninga esene.”
14 Nowidhawo ohiruma wi muttitti omwaddamele vina ohawaddela: “Kavuruwanani nyuwo motene vina munonelemo entapulela dhinlogimi.
15 Kayiwo elobo eli otakulu wa muttu nanda egavolowa mwari bimukwaruliha. Mbwenyi dhinimukwaruliha muttu sisile dhimbudduwa mwari mwaye.”
16 * ——
17 Mmaleliye opaganya muttitti, ofiya vatakulu dhahi, anamasunza aye ahinvuza yatapulela yoladdaniha ejile.
18 Dhahene ohavuza: “Nyuwo vina kamunnonelamo muli ninga awene? Nyuwo kamunziwa wi kayiwo elobo eli otakulu wa muttu nanda egavolowa mwari emukwaruliha,
19 vowi kinvolowa mmurimani, mbwenyi envolowa mbani ngamala ogomela osintina?” N’eji ohoniha wi dhoja dhotene kadhinkwaruliha.
20 Nowidhawo Yezu ohawaddela: “Dhimbudduwa mwari mwa muttu sinkwaruliha.
21 Vowi mmurimani mwa attu pumbudduwa dhubuwelo dhabure: Ogoniyana wonyakuwa,* wiya, opanga,
22 olupa matelo, omukumbela vaye, dhobure, dhottambi, mweddelo wohifwanyelela ontota manyazo,* nrima, onveyiha Mulugu, ovittukulela na ohikana zelu.
23 Dhabure esi dhotedhene dhinda mmurimani, sinimukwaruliha muttu.”
24 Yezu ovenya, odhowa elabo y’o Tiro na y’o Sidoni. Wenewo ovolowa nyumba dhahi, vowi kafuna wi attu aziwe; mbwenyi kawodhile ovitala.
25 Vasogorhova muyana dhahi, wanna mwanaye wa mwana-muyana wavolowiwe muya wabure ohiwa dhalogiwa mwaha wa Yezu, odhowa, okokora osogorho waye.
26 Muyanayá wali Mugregu wabaliwe o Siro-fenísia, iyene wandidela omukumbirha Yezu wi attamagihe muya wabure wanvolowile mwanaye wa mwana-muyana.
27 Venevo iyene omwakula dhahi: “Karoma wattiya aima arubale, vowi kinkala ottukula oja wa aima wavokela ana-anabwa.”
28 Muyanayá omwakula: “Ndde Nabuya, mbwenyi ana-anabwayá vina anoja dhimmottihedha aima mutxiddo mwa meza.”
29 Iyene omwaddela: “Mwaha wa yowakula yawo, kadhowa, muya wabureyá omuttiya mwanawo.”
30 Dhahene iyene odhowa vatakulu, vina onfwanya mwanayá baginantile vakamani, muyayá wabure bumalile omuttiya.
31 Yezu eyelaga elabo y’o Tiro, ovira o Sidoni odhowa nyaza y’o Galileya ohabuwela elabo y’o Dekápoli.*
32 Wenewale amudhelana muttu dhahi wohiwa, wanna makattamiho ologa vina amukumbirha wila amutapulele nlada naye.
33 Yezu omuttukula odhowana mburo wolapelana na muttitti. N’eji Yezu ohika dhibuno dhaye omaruni wa mulobwanayá, mmaleliye oturela mara dhibunodha, oddiginyana nlumi na mulobwana ole.
34 Yezu mwang’aneliye wirimu, ovuma na guru vina omwaddela: “Efatá,” kuloga “Fuguwa.”
35 Nowidhawo maru a mulobwana ole afuguwa vina makattamiho ologa aniyena, agoma vina oroma ologa pama.
36 Vano Yezu wahakokomeza anamasunza aye wi ahimwaddele muttu, mbwenyi vaddeliwani eso, elo’ttabwa ovuwihawa.
37 Txibarene attu otene atikina vaddiddi ofiyedha ologa: “Dhotene dhinkosiye s’apamavi, onofugula maru a attu ahiniwa vina onofugula milomo dha abale ahinloga.”
Manota
^ Na egregu, “korba.”
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Na egregu, porneya. Kang’ana Mazu Atapuleliwe.
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Obe, “elabo ya Sidadi Kumi.”
