Dhilebiwe na Marko 8:1-38
8 Masiku abale muttitti wa attu enjene atugumana wili, aweneyá kanna elobo yoja. Venevo Yezu ohakuwela anamasunza aye ohawaddela:
2 “Ddinowaweddela ttagaraga attu aba, vowi malabo mararu bali na miyo vina kanna yoja.
3 Ddigaattiya odhowa mmawani mwawa na dala, anohileya mudila, vowi enayá adhile wolapela.”
4 Venevo anamasunza aye amwakula: “Mburo obu ohinkaliwa, muttu onafwanye wuvi oja onawakwanele attu aba otene?”
5 N’eji iyene ohavuza: “Munna pawu ngasi?” Awene amwakula: “Tanu na bili.”
6 Mmaleliye oharuma attu a muttittiyá wi agilati vati. Venevo ottukula pawudhá tanu na bili, olobelela, omenya ohavaha vina anamasunza aye wi agawe, anamasunza aye aroma ogawela muttitti.
7 Vahikala vina ana-oba ang’onovi, mmaleliye olobelela ohawaddela anamasunza aye, kagaweleni vina esi.
8 Dhahene awene aja, ahakwanana vina addoddela pedaso dhahalilevo, badhakwanela middanga dhinddimuwa* mitanu na minli.
9 Àli alobwana owakwana 4.000, mmaleliye ohapaganya.
10 Momaguva-mwene Yezu owela mmwanddiyani na anamasunza aye, ofiya murudda onkuweliwa Dalmanutá.
11 Wenewo Afarizi amususela, aroma opambihana na iyene, amukumbiraga ezinddiyelo ya wirimu wi amwehe.
12 Venevo ovuma na guru vina ohiloga: “Attu a nsaka nttino antamelelani ezinddiyelo? Ddinouwaddelani ebaribari, kayiwo ezinddiyelo enonihiwe attu a nsaka nttino.”
13 N’eji, iyene ohattiya, ahabuwela kobela yina.
14 Vano, awene ahidduwala ottukula pawu vina kaana elobo yina mmwanddiyani ehili pawu modha bahi.
15 Iyene ohakokomeza kakamwene: “Mufugule mento vina mukale txenjewa na emela ya Afarizi vina ya Herodi.”
16 Venevo anamasunzaya aroma wakulana, sabwa yohittukula pawu.
17 Nowidhawo Yezu ohavuza: “Munakulelanani sabwa yohittukula pawu? Kamunanonelamo vina kamunaziwelamo? Mirima dhenyu dhifugeya, kamunwodha ononelamo?
18 ‘Mukanilevi mento, kamunona, mukanilevi maru, kamuniwa?’ Kamunubuwela
19 muttengo wa middanga* dhadhalile pedaso dhaguddelinyu, mwamenyile miyo pawu tanu mwagawela alobwana 5.000?” Amwakula: “Kumi na minli.”
20 “Kito mwamenyile miyo pawu tanu na bili dhijile alobwana 4.000, middanga mingasi dhinddimuwa* dhadhalihile nyuwo pedaso dhahalile?” Amwakula: “Mitanu na minli.”
21 N’eji ohavuza: “Nyuwo kamunanonelamovi?”
22 Afiya o Betsaida. Wenewo odheliwana muttu wohona, amukumbirhaga wi amuddiginye.
23 Iyene ottidda nlada na muliba ohonayá, omuttukulela otakulu wa muruddayá. Mmalileye omuturela mara mmentoni mwaye, omuttidda, banvuza: “Onowona elobo?”
24 Mulobwanayá ohang’ana odhulu vina omwakula: “Ddinowawona attu, mbwenyi ankala ninga miri dhinedda.”
25 Yezu oheka mada aye dila yanawili mmentoni mwaye, venevo mulobwanayá oroma wona-wene. Mento aye akala pama vina wanwodha wona mowakwana-mwene.
26 Mmaleliye ohimuruma wi adhowe vatakulu, amwaddelaga: “Kuvolowe mmuruddani.”
27 Yezu na anamasunza aye avenya adhowa mirudda dh’o Sezareya wo Filipi, bali mudila iyene ohavuza anamasunza aye: “Attu anloga wi miyo ddili ani?”
28 Awene amwakula: “Joau Batista, mbwenyi ena anloga wi muli Eliya, vina ena anloga wi muli namavuhulela mwina.”
29 Iyene ohavuza: “Kito nyuwo, munubuwela wi miyo ddili ani?” Pedro omwakula: “Nyuwo muli Kristu.”
30 Yezu ohakokomeza anamasunza aye wi ahimwaddele muttu eliye.
31 Vasogorhova oroma wasunziha wi Mwana-muttu onele otabuwa venjene, onele okoddiwa na anddimuwa a nlogo, na anddimuwa a anamakutta, na anamasunziha magano vina onele opiwa, siku nanoraru avenyihiwe mukwani.
32 Iyene walogile esidhá vanamwinjini. Mbwenyi Pedro omuttukulela vaye-vene baroma omusaddeya.
33 Venevo Yezu ozugunuwa, ohawang’ana anamasunza aye, omwaddela Pedro dhahi: “Kavenyawo osogorho waga, Satana! Sabwani kunna dhubuwelo dha Mulugu, dhubuwelo dhawo s’attu.”
34 Okuwela muttitti vamodha na anamasunza aye, ohawaddela: “Ole onfuna okala namafwara waga, avikodde mwinya, attukule pingirhizi yaye ya goyi* addifwaregevi.
35 Vowi ole onfuna ovuna egumi yaye, onele oyelela vano ole onayelele egumi yaye mwaha waga vina mwaha wa miselu dhapama, onele ovuna.
36 Ngani, txini empura muttu agakana dhotedhene dha elabo ejino, vano ayelela egumi yaye?
37 Txibarene, txini enaperheke muttu wi avune egumi yaye?
38 Sabwani ole onddikanela manyazo miyo, vina onkanela manyazo mazu aga vari va attu aba ohiroromeleya* vina ottega, oddo Mwana-muttu onele omukanela manyazo nsaka ninadhiye na nttittimiho na Babe vamodha na anju okoddela.”
Manota
^ Obe, “sesto; muddanga mwekiwa dhoja.”
^ Obe, “sesto.”
^ Obe, “sesto; muddanga mwekiwa dhoja.”
^ Kang’ana Mazu Atapupeliwe.
^ Obe, “ohiwananeyana.”
