Dhilebiwe na Marko 9:1-50
-
Osadduwa wa Yezu (1-13)
-
Ovulumutxiwa wa mwana-mulobwana wavolowiwe muya wabure (14-29)
-
Dhilobo dhotedhene dhinowodheya mwa abale anna nroromelo (23)
-
-
Yezu onologa dila yina mwaha wa okwa waye (30-32)
-
Anamasunza anowanela onddimuwa (33-37)
-
Ole ohinnisadduwela oli na iyo (38-41)
-
Malugu okwakwattutxa (42-48)
-
“Mukane mwinyu mwigumini mwenyu” (49, 50)
9 Yezu ohiloga dhahi: “Ddinouwaddelani ebaribari, apa akalavo attu ahinafiyedhe okwa ahinatti wona Omwene wa Mulugu odhaga na nttittimiho.”
2 Mvirele masiku matanu na nimodha, Yezu omuttukula Pedro, Tiago na Joau, owela vamwangoni n’abuwene bahi. Venevo Yezu osadduwa vamentoni vawa;
3 dhabalo dhaye dhang’animela vina dhahitxena venjene, kawo namafula wa mwilaboni ya vati agawodhile otxeniha ninga yalani.
4 Ottiya ejo, afiya valani Eliya na Mizé alogaga na Yezu.
5 Venevo Pedro ohiloga na Yezu: “Rabi,* japama iyo okala veneva, ninele omaga misasa miraru, mmodha wenyu, mmodha wa Mizé vina mwina wa Eliya.”
6 Mwebaribari Pedro kaziwa yokosa, vowi annova venjene.
7 Odha murabo odhulu wakunelile, mmurabonimwá muhiweya lizu naloga: “Oddu ddi Mwanaga, wokweleya. Mumvuruwanege.”
8 Venevo ahang’ana oku-n’oku, vano kamonile muttu mwina ahili Yezu bahi.
9 Awene atitaga vamwangoni, Yezu ohakokomeza anamasunza aye wi ahimwaddele muttu dhonilani mpaka Mwana-muttu ovenyihiwa mukwani.
10 Awene ahiwelela mazuyá,* mbwenyi ampambihana oka-oka mwaha wa ejile yatapulela ovenyihiwa mukwani.
11 Awene aroma onvuza, alogaga: “Kito anamasunziha magano anlogela nni wi Eliya ddinadhe voroma?”
12 Iyene ohawakula: “Pumwenemo, Eliya onele odha voroma wila ogolele dhotedhene. Vano malebo kanloga wi enofuneya Mwana-muttu otabuwa dhilobo dhinjene vina opwaziwa?
13 Mbwenyi, ddinouwaddelani wi Eliyayá txibarene odha vina ahimwirana dhotedhene dhafunani, dhahene ninga mulebeliwani mwaha waye.”
14 Afiyaga vakuvi vàli anamasunza ena, ahona muttitti mwinjene buwarugunuwile vina anamasunziha magano apambihagana na awene.
15 Dhawene muttitti wa attu mmonelani Yezu, atikina vina ahinfwarela attamagaga wi amulejele.
16 Venevo iyene ohavuza: “Mumpabihelana eni na awene?”
17 Mmodhavo wali vamuttittiniva omwakula: “Namasunziha, ddidhana mwanaga oddu wa mwana-mulobwana ovolowiwe muya wabure, ohinimuwodhiha ologa vina wiwa.
18 Vego-vegovi vaninfanya muyayá, onomugwihedha vati aburutxaga maporu omulomoni atakunaga meno vina onotowiwa guru. Ddihakumbirha anamasunza enyu wila attamagihe muyayá, vano awene kawodhile.”
19 Yezu ohawakula alogaga dhahi: “Nyuwo nlogo* notowa nroromelo, ddinakale na nyuwo mpaka mudhidhi gani? Ddinauvileleni mpaka mudhidhi gani? Muddidhelena okuno.”
20 Venevo ottukuleliwa mwanayá vàliye, vano muyayá mmonelani Yezu, omugwihedha vati mwanayá momaguva. Mugweliye oroma opigiriya aburutxaga maporu mwano.
21 Yezu ohinvuza babe: “Ejiya emuromile mudhidhi gani?” Iyene ohakula: “Emuromile muhimani-mwene,
22 muyayá ononvokelaga dila dhina vamottoni dila dhina mmanjeni wi ompe. Mbwenyi akala munowodha onikosela elobo muneddele ttagaraga, munikamihedhe.”
23 Yezu ohiloga: “Mazu aba: ‘Akala munowodha’! Ziwaní wi dhilobo dhotedhene dhinowodheya mwa abale anna nroromelo.”
24 Momaguva-mwene babi wa muzombweyá ohiloga: “Miyo ddikaana nroromelo! Ddikamihedheni vanddijombela!”
25 Onaga wi muttitti wa attu wela wawaddamela momaguva, Yezu osumulela muya obule alogaga: “Muya wabure, ohinloga, ohiniwa, ddinouwaddela omuttiye muzombwe oddu, kumwiyelele vina!”
26 Mmalelani omukuwiha, vina ompigiritxa venjene, muya obule omuttiya, muzombweyá bakala ninga okwile, nona attu enjene anloga dhahi: “Iyeneyá okwa!”
27 Venevo Yezu omuttidda nlada onvenyiha, muzombweyá ohimela.
28 Mmalelani ovolowa mba, anamasunza aye ahinvuza vawa-vene: “Iyo nikoddeleni owodha ottamagiha muyayá?”
29 Iyene ohawakula: “Muya wabure ninga obu, ombudduwa na nlobelo bahi.”
30 Yezu ovenya venevale na anamasunza aye ovira o Galileya, mbwenyi kafunile wi attu ena aziwe vàliye,
31 sabwani wela wasunziha anamasunza aye; iyene wannawaddela: “Mwana-muttu onele operhekiwa mmadani mwa attu, vina awene anele ompa, vano masiki apiwe siku nanoraru onele ovenyihiwa mukwani.”
32 Mbwenyi, awene kanonelamo yalogiye vina annova omvuza.
33 Afiya o Kafarnau, avolowa mba, iyene ohavuza: “Nyuwo mwakulelanani mudila?”
34 Awene àli omalene, sabwani adhaga mudila ampambihana amutamelaga bani wali munddimuwaya wawa.
35 Venevo iyene ogilati, ohakuwela arumiwi aye Kumi na Eli, ohawaddela: “Onfuna okala woromayá, onofuniwana akale womariha vina mudhari wa otene.”
36 N’eji omuttukula mwana vina omuttiya vari vawa, omukubatta ohawaddela:
37 “Ole onimwakela mwana ninga oddu na nzina naga, onoddakela miyo vina, ole onddakela, kanddakela miyovi bahi, onomwakela vina Ole oddirumile.”
38 Joau omwaddela: “Namasunziha, nimona muttu attamagihaga muya dhabure na nzina nenyu, nitamela omukoddiha vowi iyene kedda na iyo.”
39 Vano Yezu ohiloga: “Kamutamele omukoddiha, sabwani kawo muttu onkosa mabasa manddimuwa na nzina naga, agamala addiloga obure.
40 Vowi ole ohinnisadduwela oli na iyo.
41 Miyo ddinouwaddelani ebaribari, ole onuvahani kopo ya manje omwa sabwa ya nyuwo okala anamasunza a Kristu, onele ottuveliwa ekosiliye.
42 Mbwenyi ole onimukwakwattutxa mmodha wa aba ang’ono anddiroromela, egahikala omageleliwa mukotti mwaye nlugu ninddimuwa n’otxilana, avokeliwa munyaza.
43 “Akala nlada nawo ninoukwakwattutxa, ogwadde vowi japama weyo wakela egumi yohimala woragalene ehili orahileliwa na mada omeli mu Jehena,* muli motto ohintotowa.
44 * ——
45 Vina akala nnyalo nawo ninoukwakwattutxa, ogwadde. Vowi japama weyo wakela egumi yohimala okwettenkwaga, ehili orahileliwa na manyalo omeli mu Jehena.*
46 * ——
47 Vina akala ninto nawo ninoukwakwattutxa orahilele wolapela-wene, vowi japama ovolowa Mumweneni mwa Mulugu na ninto nimodha, ehili orahileliwa na mento awo omeli mu Jehena,*
48 muli mitipa dhihinkwa vina motto ohinttima.
49 “Vowi enofuneya otene olugiwa na motto.
50 Mwinyu onoziva, kito akala mwinyuyá onokumuwa, munakosena eni wi mwiyihedhe ozivawa? Mukane mwinyu mwigumini mwenyu vina mutamelege wedda na murenddele muttu na mukwaye.”
Manota
^ Obe, “Namasunziha.”
^ Obe txino, “amalana makaniya.”
^ Obe, “attu a nsaka nttino.”
^ Kang’ana Mazu Atapuleliwe.
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Kang’ana Mazu Atapuleliwe.
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Kang’ana Mazu Atapuleliwe.
