Dhilebiwe na Mateu 10:1-42
10 Yezu ohatugumaniha anamasunza aye 12 ohavaha owodha wowaburutxamo attu muya dhabure vina na owodha w’ovulumutxana viredda dhotedhene dhottiyana-ttiyana.
2 Mazinayá a arumiwi aye 12 baba: Woroma, Simoni, wakuweliwa vina Pedro, na mbalaye André; Tiago mwana Zebedeu na mbalaye Joau;
3 Filipi, Bartolomeu, Tomé, Mateu namapitxiha musoko, Tiago mwana Alfeu, vina Tadeu;
4 Simoni Mukananita, na Juda Iskariote, odhile omuguliha.
5 Yezu oharuma otene 12, awaddelaga dhahi: “Kamufware dila dha amalabo nne vina kamuvolowe sidadi dha akadda Samariya.
6 Voroma-vene, mwatamele mabila arimelile a nlogo na Izrayel.
7 Kadhowani mwalaleye dhahi: ‘Omwene wa wirimu oli vakuvi.’
8 Mwavulumutxe aredda, mwavenyihe akwile, mwavulumutxe aliba maranya vina mwattamagihe muya dhabure. Nyuwo mul’ovahiwa muhipitxelaga elo, muvahe vina muhilogosaga elo.
9 Kamwike mbudduni mwenyu mwa kobiri, woru, parata nne safurhi,
10 muleddoni mwenyu kamuttukule buddu muli dhoja, guwo dhina, sandáliya dhina nne mukongozo mwina, vowi namalaba onofwanyela ovahiwa yoja.
11 “Mugavolowa sidadi-sidadivi obe mmuruddani, mmutamele onfwanyelela; mugamfwanya mukale venevo ofiyedha obudduwamo.
12 Mugafiya vatakuluva, mwalejele anamuralayá.
13 Akala anyayá anouwakelani, murenddele wenyu okale na awene; akala kanuwakelani murenddelinyuyá owiyeleleni mwanya.
14 Vano muttu ddi muttu ohinauwakeleni obe ohinavuruwane mazu enyu, mugabudduwagavo vatakuluva obe musidadimwá, mugume mbwebwe wa mmanyaloni mwenyu.
15 Ddinouwaddelani ebaribari, Siku N’ottonga goyi dhinagweliwe sidadi ejo, dhinele ottabwa opitta esile dhigweliwe Sodoma na Gomora.
16 “Miyo ddinourumani ninga mabila vari va mwiji, nona kakalani txenjewa ninga nowa, ofwaseya ninga kangayiwa.
17 Porhe-porhe na attu, vowi awene anele wuttukulelani mmatribunalini mwawa vina anele wuwasulani mmasinagoga* mwawa.
18 Nyuwo munele ottukuleliwa vamentoni va agovernador vina va amwene, sabwa yaga wi mwavahe onamoona awene vina malogo.
19 Mugaperhekiwa mmadani mwawa, kamuribe murima na enfunenyu ologa obe mulogeloyá, vowi mudhidhene obo munele ovahiwa yologa.
20 Sabwani onloga kahiyo nyuwo bahi, bu muya wa Babinyu onulogelani.
21 Ottiya ejo, abali anele opana abalivi, babi onele ompa mwanaye, aima anele wasadduwela amambalawa ofiyedha wapiha.
22 Nyuwo munele widdiwa na attu otene sabwa ya nzina naga; mbwenyi ole onavilele mpaka omagomo ddinavuneye.
23 Mugafwara-fwariwa sidadi modha, muttawele sidadi yina; ddinouwaddelani ebaribari, kamunavire sidadi dhotedhene dha Izrayel, Mwana-muttu ahinatti ofiya.
24 “Namasunza kanimpitta namasunziha waye vina mudhari kanimpitta nabuya waye.
25 Enfuneya jawi namasunza akale ninga namasunziha waye, mudhari akale ninga nabuya waye. Akala mwinya wa vatakulu ohittaniwa Satana,* enettaniwe amudhayeyá enele ottabwa.
26 Nona, kamwawove attu, vowi kayiwo elobo evitiwe ehinoneye, vina kayiwo yoviteya ehinaziweye.
27 Enuwaddelani miyo mwiddimani, mulogege mutxezani vina enunog’onelani miyo, kalaleyani vadhulu va nyumba.
28 Kamwawove abale ampa maningovi bahi, mbwenyi ahinwodha opa njedhelo nenyu n’okalawo, ottiya ejo mmove oddule onwodha outolotxani kakamwe mu Jehena.*
29 Kadhingulihiwa balame* bili dhing’ono na kobiri modha ya muttengo mung’onovi?* Masiki dhawenevi, kimmottela vati balame modha Babinyu ahiziwile.
30 Mbwenyi nttitti nenyu notene na mmusorhoni, ninoziweya muttengoyá.
31 Nona kamove, nyuwo mukaana ttima enddimuwa opitta balame esi dhing’ono, masiki dhinjivilevi.
32 “Ole onarumele vamentoni va attu wi oli mumodhani na miyo, miyo vina ddinele orumela vamentoni va Babaga oli wirimu, wi ddili mumodhani na iyene.
33 Mbwenyi, ole onaddikodde vamentoni va attu, miyo vina ddinele omukodda vamentoni va Babaga oli wirimu.
34 Kamubuwele wi ddidhilena murenddele vati apano; nne, kaddidhilena murenddele, mbwenyi ohiwanana.*
35 Miyo ddidhilena ogawana: Mwana-mulobwana na babe, mwana-muyana na maye, muwenya na nyezele.
36 Txibarene, amwiddani a muttu anakale amudhaye.
37 Onimukwela babe obe maye opitta miyo, kanfwanyela okala waga; onimukwela mwanaye wa mulobwana peno wa muyana opitta miyo, kanfwanyela okala waga.
38 Ole ohinrumela ottukula pingirhizi yaye ya goyi* addifwarana, kanfwanyela okala waga.
39 Ole onfuna ovuna egumi yaye, onele oyelela, vano ole onayelele egumi yaye mwaha wa waga, onele ofwanya.
40 “Onuwakelani nyuwo, onoddakela miyo vina; onddakela miyo, onomwakela vina Ole oddirumile.
41 Ole onimwakela namavuhulela sabwa y’okala namavuhulela, onele ottuveliwa eninfwanyelela namavuhulela; vina ole onimwakela muttu woligana murima sabwa ya oligana waye murima, onele ottuveliwa ejile eninfwanyelela muttu woligana murima.
42 Miyo ddinouwaddelani ebaribari, ole oninvaha mmodha wa anamasunza aga manje oridha wila amwe sabwa y’okala namasunza waga, onele ottuveliwa ekosiliye.”
Manota
^ Kang’ana Mazu Atapuleliwe.
^ Na egregu, “Belzebú.” Nzina nina ninkuweliwana Satana, oli musogorheli obe mulamuleli wa muya dhabure.
^ Kang’ana Mazu Atapuleliwe.
^ Obe, “pardal.”
^ Na egregu, “kobiri modha ya asariyu.”
^ Na egregu, “supadda.”
^ Kang’ana Mazu Atapuleliwe.
