Dhilebiwe na Mateu 11:1-30
11 Mmalele Yezu wavaha malago aba anamafwara aye 12, ovenyavo odhowa osunziha vina olaleya sidadi dhawa.
2 Joau balivi mukambura, ohiwa dhologiwa dha mabasa akosa Kristu, venevo oharuma anamasunza aye,
3 wi amvuze dhahi: “Muli Ole Wafuna Odha, obe nimujedhele mwina?”
4 Yezu ohawakula dhahi: “Kadhowani mwamwaddele Joau dhiniwenyu vina dhinoninyu:
5 Aliba ohona anowona, aragali anowedda, aliba maranya anovulumutxiwa, aliba ohiwa anowiwa, akwile anovenyihiwa mukwani, ayelegi anolaleyeliwa miselu dhapama.
6 Wohagalala dduddule ohinkwakwattuwa na merelo aga.”
7 Awene adhowaga, Yezu oroma ologa na muttitti mwaha wa Joau: “Nyuwo mwadhowile wona nni mwiddeddereni? Mwadhowile wona murere onttekenyiwa na pevo?
8 Kito mwadhowile wonamo nni? Mwadhowile omona muttu onabala guwo dhattima? Sabwani abale anabala guwo dhattima ankala mmatakulu mwa amwene.
9 Kito mwadhowelemo nni? Mwadhowile omona namavuhulela? Ddinouwaddelani ebaribari, iyene onompitta namavuhulela.
10 Oddu ddule ologiwe mmaleboni wi: ‘Moone! Ddinomuruma mwanamukatti waga osogorho wawo* wi ausasanyedhe dila!’
11 Miyo ddinouwaddelani ebaribari, mwa attu otene abaliwe, kavo onimpitta Joau Batista; mbwenyi ole oli mung’ono Mumweneni wa wirimu, munddimuwa opitta iyene.
12 Oromana masiku a Joau Batista ofiyedha ovanene, attu anotamelaga na guru Omwene wa wirimu, abale anvilibihedha, anofwanya.
13 Ofiyedha nsaka na Joau, anamavuhulela vamodha na malamuloyá anloga esile dháfuna opadduwa;
14 nona, masiki akala munokodda peno munorumela, miyo ddinoupangani wi Eliya wafuna odha ddi iyene.
15 Onna maru, ewe.
16 “Ddinaladdanihe na eni attu a nsaka nttino? Ali ninga aima agilatile vamusika anloga na akwawa,
17 dhahi: ‘Iyo nihuwobelani flauta, mbwenyi nyuwo kamutxettile, nihuwibelani jibo dhokubanyiha, nyuwo kamukubanyile.’*
18 Yakakene, odha Joau ohinja, ohimmwa, mbwenyi attu anloga wi, ‘Iyene okaana adomonyo.’
19 Vano Mwana-muttu onoja vina onomwa, mbwenyi attu anloga dhahi, ‘Mmone! Oddu ottabwiha oja vina omwa vinyu; akwaye ba anamapitxiha musoko na attegi.’ Vano zelu ya muttu enoneya na merelo aye.”
20 Iyene oroma wasaddeya attu a sidadi esile dhakosiliye matikiniho menjene, sabwani attuyá a sidadidhá kafunile otxinuwa:
21 “Ntowa nugweleni nyuwo attu o Korazin; ntowa nugweleni nyuwo vina attu o Betsaida; sabwani matikiniho akosiwe mwilaboni mwenyu, kowiliwa akosiwe elabo y’o Tiro na y’o Sidoni, anyayámo agahaguvela wabala saku vina ovisigiha munddura onihaga otxinuwa wawa.
22 Nona ddinouwaddelani, Siku N’ottonga goyi dhinaugweleni dhinele ottabwa opitta esile dhinagwele akadda Tiro na akadda Sidoni.
23 Kito nyuwo attu o Kafarnau munubuwela wi nttittimiho nenyu ninele ofiya wirimu? Nyuwo munele ogomela Mmasiye;* sabwani matikiniho akosiwe mwilaboni mwenyu, kowiliwa akosiwe mu Sodoma, sidadiyá egahikalawo ofiyedha ddabuno.
24 Nona miyo ddinouwaddelani, Siku N’ottonga goyi dhinaugweleni dhinele ottabwa opitta esile dhinagweliwe, elabo y’o Sodoma.”
25 Mudhidhene obule, Yezu ohiloga: “Baba, Nabuya wa wirimu na wa elabo ya vati, miyo ddinouttittimihani vanamwinjini sabwani muhavitela dha mmirimani mwenyu aziwitxi na attu ononelamo, mbwenyi muhaziwiha aima.”
26 Ndde Baba, nyuwo mufunile wi dhireye dhahene.
27 Babaga oddiperhekela dhilobo dhotedhene, kavo onimuziwa mwawakwana-mwene Mwana ahili Babe; kavo onimuziwa mwawakwana-mwene Babi, ahili Mwana, vamodha na abale anfuna mwanayá waziwiha.
28 Mudhe wa miyo nyuwo mwetene mulemile* vina mulemeliwe, miyo ddinoulibihani.
29 Kattukulani kanga yaga, kasunzani na miyo;* vowi ddili wa murima wokurumuwa vina woviyeviha; nyuwo munele ofwanya nipangarhazo.
30 Sabwani kanga yaga kinwoma,* muttorho waga kunlemela.”
Manota
^ Na egregu, “vamentoni vawo.”
^ Na egregu, “kamuvadile vapetoni monihaga oribiwa wenyu murima.”
^ Kang’ana Mazu Atapuleliwe.
^ Obe, “munlaba na guru.”
^ Obe, “kalaní anamasunza aga.”
^ Obe, “kinrutxa ottukulawa.”
