Dhilebiwe na Mateu 14:1-36
14 Nsaka-nttile, Herodi, governador wa distritu, ohiwa dhalogiwa mwaha wa Yezu,
2 iyene ohawaddela dhahi emeleli aye: “Oddo ddi Joau Batista ovenyihiwe mukwani, nona jijene enkoseliye matikiniho menjene.”
3 Herodi* oddu, ddule wammagihile Joau, banfugeliha mukambura sabwa ya Herodía mwadhi wa mbalaye Filipi.
4 Vowi Joau wannimwaddela, eraga: “Kinrumelihiwa omutela muyana oddu.”
5 Vano masiki afunaga ompiha, wannova muttitti sabwa yawi awene amona ninga namavuhulela.
6 Mbwenyi siku naja Herodi mattanga obaliwa waye, mwana Herodía otxetta vamentoni va otene àlivo bamuziveliha vaddiddi Herodi
7 ofiyedha iyene opikirela omvaha dhotedhene dhigakumbirile namwaliyá,
8 venevo namwaliyá, afwaraga malago abure a maye, ohiloga: “Kaddivahedheni momaguva musorho wa Joau Batista mbandejani.”
9 Masiki mweneyá valiyevi wokubanyene ohiruma wi avahedhiwe musorhoyá sabwa ya nipikirhelo nakosiliye vina sabwa ya attu aja* vamodha na iyene.
10 Dhahene oruma wi Joau agwaddiwe nikotti mukambura mwaliye.
11 Musorhoyá operhekeliwa namwaliyá mbandejani, iyene odhowa onvahedha maye.
12 Vasogorhova, anamasunza aye adha ottukula maningoyá adhowa winteri, mmalelani adhowa omwaddela Yezu dhapadduwile.
13 Yezu mwiwaliye esodhá, ovenya, owela mmwanddiyani, odhowa okala vaye-vene. Muttitti wa attu muziwelani, avenya musidadi mwalani ahinfwara na myeddo.
14 Mvaddeleliye, ohona muttitti mwinji wa attu, ohaweddela ttagaraga vina ohavulumutxa areddayá.
15 Vati varibaga, anamasunza aye amususela, amwaddela dhahi: “Mburo obu kunkaliwa, vati variba, murome wapaganya attu aba, adhowe mmuruddani wi agule dhoja.”
16 Vano Yezu ohawakula: “Kili yofuneya awene odhowa, nyuwene mwavahe yoja.”
17 Awene amwakula dhahi: “Iyo kaninavo elobwene apa, dhihili pawu tanu na oba bili.”
18 Iyene ohiloga: “Mudhena okuno.”
19 Mmalelani, oruma wi muttittiyá ogilati vamanini, venevo ottukula pawu eso tanu na oba bili, ohang’ana wirimu, olobelela; vasogorhova omenya pawudhá, ohavaha anamasunza aye, anamasunza aye ahagawela attu àlivo.
20 Dhahene otene aja, ahakwanana, vina addoddela pedaso dha pawu dhahalile, badhakwanela middanga* 12.
21 Otene ajile àli ofiyedha alobwana 5.000, ahikontariwaga ayana na aimayá.
22 Momaguva-mwene oharuma anamasunza aye wi awele mmwanddiyani, asogorhe, abuwele kobela yina, iyene apaganyaga muttitti wa attu.
23 Mmaleliye opaganya muttittiyá, owela omwangoni yeka wi alobele. Muribele vati, walivi wenewo yeka.
24 Mfiyedhani vari, mwanddiyayá wanvadiwa venjene na manebe sabwani adhowa wadhela pevo.
25 Vano, vati vayaga,* Yezu ohafwarela eddaga vadhulu va manje a munyaza.
26 Anamasunza aye mmonelani eddaga vadhulu va manje, ahitxutxeya, ahiloga dhahi: “Iyoyá kaninoroha!” Vina awene akuwa na wova.
27 Venevo Yezu ohawaddela: “Kalibani murima! Ddi miyo, kamove.”
28 N’eji, Pedro omwakula: “Akala ddi nyuwo Nabuya, kalamulani wi miyo ddufwareleni ddeddaga vadhulu va manje.”
29 Yezu ohiloga: “Kadhauno!” Pedro ovenya mmwanddiyani, ohedda vadhulu va manje adhowaga wali Yezu.
30 Vano ang’anaga manebe, oroma wova; muromeliye obwina, okuwa: “Nabuya, kaddivuneni!”
31 Momaguva-mwene Yezu omutapulela nlada, omuttidda eraga: “Weyo muttu woyeva nroromelo, onaganyedhela nni?”
32 Mmalele awene owela mmwanddiyani, manebeyá amaala noo.
33 Venevo abale àli mmwanddiyanimwa, amukokorela eraga: “Txibarene nyuwo muli Mwana Mulugu.”
34 Mmalelani wabuwa, avaddela mwilaboni y’o Jenezareti.
35 Anyayámo muziwelani wi ddi Yezu, avuwiha mirudda dhotene dhawaddamele, venevo attukuleliwa vaaliye attu otene àli aredda.
36 Annimuttidda myeddo, amulobaga wi ngafuna-wene addiginye yabalo yaye vina otene addiginya, anvulumuwa.
Manota
^ Kuloga, Herodi Antipa. Kang’ana Mazu Atapuleliwe.
^ Obe, “agilatile vamodha na iyene vameza.”
^ Obe, “sesto.”
^ Na egregu, “ottamagela wora ttaru dha ebembe, ofiyedha wora tanu na modha dha membesi; mudhidhi ompattuwa nzuwa.”
