Dhilebiwe na Mateu 16:1-28
16 Afarizi na Asaduseu afunaga omweha Yezu amususela, amukumbirha wi awonihe ezinddiyelo ya wirimu.
2 Iyene ohawakula dhahi: “Vati vagaribaga, nyuwo munologa, ‘Odhulu kofila, mangwana onele okala nzuwa,’
3 Vagaya, munologa, ‘Ddabuno onokala oridha vina siku na muzogwe, vowi mirabo odhulu dhifila.’ Nyuwo munowodha otapulela dhinoneya odhulu, mbwenyi ezinddiyelo ya masaka, kamunwodha otapulelamo.
4 Nyuwo attu* abure vina ohiwananeyana, muntamela moone ezinddiyelo, mbwenyi kamunonihiwe ezinddiyelo, ehili ejile ya Jona.” N’eji, iyene ohattiya, ovenyavo.
5 Anamasunza aye ahabuwela kobela yina, mbwenyi ahidduwala ottukula pawu.
6 Yezu ohawaddela dhahi: “Mufugule mento vina mukale txenjewa na emela ya Afarizi na ya Asaduseu.”
7 Venevo aroma wubuwela mukalelani alogaga: “Kanidhilena pawu.”
8 Yezu aziwaga dhobuwelani, ohiloga: “Nyuwo attu oyeveliwa nroromelo, munzuzumela nni mwanya-mwanya mulogaga kanidhilena pawu?
9 Kamunanonelamovi obe kamunubuwela mwaha wa pawu tanu dhijile attu 5.000 vina muttengo wa middanga* dhiguddelinyu?
10 Obe pawu tanu na bili dhijiwe na attu 4.000 vina muttengo wa middanga dhinddimuwa* dhiguddelinyu?
11 Munkodda ononelamo dhavi wi kaddalogana pawu? Miyo ddowaddelani wi mukale txenjewa na emela ya Afarizi na Asaduseu.”
12 Awene ahinonelamo wi iyene kalogana okalela txenjewa emela ya pawu, mbwenyi walogana masunziho a Afarizi na Asaduseu.
13 Mufiyedhiye o Sezareyá elabo y’o Filipi, iyene ohavuza anamasunza aye dhahi: “Attu anloga wi Mwana-muttu bani?”
14 Awene amwakula: “Ena anloga wi muli Joau Batista, ena Eliya, vina ena anloga wi muli Jeremiya obe namavuhulela mwina.”
15 Iyene ohavuza: “Kito nyuwo, munubuwela wi miyo ddili ani?”
16 Simoni Pedro ohakula: “Nyuwo muli Kristu, Mwana Mulugu oliwo.”
17 Yezu omwakula: “Wohagalala ddi weyo Simoni mwana Jona, sabwani esidhá kuziwihiwe na attu, oziwihiwe na Babaga oli wirimu.
18 Ddinouwaddela vina: Weyo oli Pedro, vanluguni ntti miyo ddinele wimetxavo mulogo waga vina Okwa* kunagomihe mulogoyá.
19 Miyo ddinele wuvaha txavi dha Omwene wa wirimu, yotene enamagiwe vatapano, enakale yomagiwene wirimu, yotene enatapuliwe vatapano enakale yotapuliwene wirimu.”
20 Vasogorhova iyene ohakokomeza anamasunza aye wi ahimwaddele-wene muttu yawi iyene ddi Kristu.
21 Oromana mudhidhi obule, Yezu oroma watapulelamo anamasunza aye wi yanfuneya iyene odhowa o Jeruzalemi, otabuwa mmadani mwa anddimuwa a nlogo, na anddimuwa a anamakutta, na anamasunziha magano vina onele opiwa, vina siku nanoraru onele ovenyihiwa mukwani.
22 Nowidhawo, Pedro omuttukulela vaye-vene baroma omusaddeya, alogaga dhahi: “Muvyeddele ttagaraga Nabuya, eso kadhinaupadduweleni.”
23 Yezu ozugunuwa, omwika ekotti Pedro, omwaddela dhahi: “Kavenyawo osogorho waga, Satana! Weyo oli nlugu noddikwakwattutxa, sabwani kunna dhubuwelo dha Mulugu, dhubuwelo dhawo s’attu.”
24 Yezu ohawaddela dhahi anamasunza aye: “Ole onfuna okala namafwara waga, avikodde mwinya, attukule pingirhizi yaye ya goyi* addifwaregevi.
25 Vowi, ole onfuna ovuna egumi yaye, onele oyelela, vano ole onayelele egumi yaye mwaha waga, onele ofwanya.
26 Ngani, txini empura muttu agakana dhotedhene dha elabo ejino, vano ayelela egumi yaye? Obe txini enaperheke muttu wi avune egumi yaye?
27 Mwana-muttu onel’odha na nttittimiho na Babe vamodha na anju aye, wi amvahe muttu-muttu eniwanana na merelo aye.
28 Ddinouwaddelani ebaribari, apa akalavo attu ahinafiyedhe okwa ahinatti omona Mwana-muttu adhaga Mumweneni mwaye.”
Manota
^ Obe, “attu a nsaka nttino.”
^ Obe, “sesto.”
^ Obe, “sesto; muddanga mwekiwa dhoja.”
^ Obe, “Hades,” kuloga, mburo onikiwa attu otene. Kang’ana Mazu Atapuleliwe.
^ Kang’ana Mazu Atapuleliwe.
