Dhilebiwe na Mateu 17:1-27
17 Mvirele masiku matanu na nimodha, Yezu omuttukula Pedro, Tiago na mbalaye Joau, owela vamwangoni n’abuwene bahi.
2 Venevo Yezu osadduwa vamentoni vawa; okoveni waye wang’animela ninga nzuwa, dhabalo dhaye dhang’animela ninga txeza.
3 Vina afiya vàlani Mizé na Eliya, aroma ologa na iyene.
4 Venevo Pedro ohiloga na Yezu: “Nabuya, japama iyo okala veneva, mugafuna ddinela wumagelani veneva misasa miraru, mmodha wenyu, mmodha wa Mizé mwina wa Eliya.”
5 Iyene alogagavi, odha murabo odhulu wakunelile, wali ninga txeza; mmurabonimwá muhiweya lizu naloga: “Oddu ddi Mwanaga, wokweleya, onimurumelimi. Mumvuruwanege.”
6 Anamasunza aye mwiwalani, akokora vina ahova vaddiddi.
7 Venevo Yezu ohawaddamela, ohaddiginya, ologana: “Kamove. Kavenyani.”
8 Muttukulelani kove, kamonile muttu mwina ahili Yezu bahi.
9 Awene atitaga vamwangoni, Yezu ohakokomeza dhahi: “Kamwawaddele attu dhonilenyu mpaka Mwana-muttu ovenyihiwa mukwani.”
10 Vano, anamasunza aye ahinvuza: “Kito anamasunziha magano anlogela nni wi Eliya ddinadhe voroma?”
11 Iyene ohawakula: “Pumwenemo, Eliya onele odha-wene wila ogolele dhotedhene.
12 Txibarene, ddinouwaddelani wi Eliyayá odha; mbwenyi awene kawodhile omuzinddiyela, nona amwirana dhotene dhafunani. Yakakene vina, Mwana-muttu onele otabuwa mmadani mwawa.”
13 Anamasunza aye anonelamo wi wamwaddana Joau Batista.
14 Mfiyedhani vàli muttitti, mulobwana dhahi omususela, omukokorela, ologana dhahi:
15 “Nabuya mmweddele ttagaraga mwanaga wa mulobwana, iyene okaana ejile-jile vina onotabuwana vaddiddi. Dila dhina onogwela vamottoni vina dila dhina mmanjeni.
16 Miyo ddihaperhekela anamasunza enyu, vano awene kawodhile omvulumutxa.”
17 Yezu ohakula dhahi: “Nyuwo nlogo* notowa nroromelo vina notakala murima, ddinakale na nyuwo mpaka mudhidhi gani? Ddinauvileleni mpaka mudhidhi gani? Muddidhelena okuno.
18 Iyene onyanyuwela muya obo, muyayá ovenyamo. Ovenyana venevale mwanayá ovulumuwa.
19 Mmalelani anamasunza aye amususela Yezu vawa-vene, ahinvuza: “Iyo nikoddeleni owodha ottamagiha muyayá?”
20 Iyene ohawakula: “Sabwa ya nyuwo oyeveliwa nroromelo. Txibarene miyo ddinouwaddelani, mugakaana nroromelo n’oligana na ttaga ya mostarda munele owodha ologa na mwango obu, ‘Kasusela apale,’ mwangoyá onele osusa vina kayiwo elobo enaurutxeni.”
21 * ——
22 Mutugumanelani o Galileya, Yezu ohawaddela: “Mwana-muttu onele operhekiwa mmadani mwa attu,
23 vina awene anele ompa, vina siku nanoraru iyene onele ovenyihiwa mukwani.” Anamasunza aye mwiwalani esidhá akubanya vaddiddi.
24 Mfiyedhani o Kafarnau, anamapitxiha musoko a kobiri bili dha drakima amwaddamela Pedro, ahinvuza: “Namasunziha wawo kampitxa musoko wa kobiri bili dha drakima?”*
25 Pedro ohakula: “Onopitxa.” Muvoloweliye mba, Yezu oroma olagana dhahi: “Ononamo dhavi Simoni? Onapitxela musoko amwene a mwilaboni bani? Banawa obe ba anawedda?”
26 Mulogeliye: “Ba anawedda,” Yezu omwiyihedha: “Txibarene, anawa kankokeliwa opitxa musoko.
27 Vano, wila nihakwakwattutxe attu, kattukula emezo waponyedhe munyaza, oba yoroma enameze weyo, ogafugula mwanomwá onele ofwanya kobiri modha ya parata;* ottukule, odhowe wavahedhe oddipitxelaga miyo na weyo.”
Manota
^ Obe, “attu a nsaka nttino.”
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Kobiri bili dha drakima wali muttengo wattambirha muttu agalaba masiku meeli.
^ Kobiri ya estater, enoneya ninga enowakwanela kobiri nayi dha drakima.
