Dhilebiwe na Mateu 18:1-35
18 Mudhidhene obule anamasunza amususela Yezu, ahinvuza: “Bani oli munddimuwa Mumweneni wa wirimu?”
2 N’eji omukuwela mwana, omuttiya vari vawa
3 ohiloga: “Ddinouwaddelani ebaribari, nyuwo mugahirugunutxe murima, mukala ninga aima, kamunavolowe-wene Mumweneni wa wirimu.
4 Nona onvyeviha ninga mwana oddu, odduwene ddilí munddimuwa Mumweneni wa wirimu;
5 vina ole onimwakela mwana ninga oddu na nzina naga, onoddakela miyo vina.
6 Mbwenyi ole onimukwakwattutxa mmodha wa aba ang’ono anddiroromela, egahikala omageleliwa mukotti mwaye nlugu ninddimuwa n’otxilana, avokeliwa vari va nyaza.
7 “Ntowa nugweleni nyuwo attu a mwilaboni, mwaha wa dhokwakwattutxa dhenyu! Ebaribari wila akalawo attu anakwakwattutxa akwawa, vano ntowa nagwele awene!
8 Akala nlada nawo obe nnyalo nawo ninoukwakwattutxa, ogwadde orahilele wolapela-wene. Vowi japama weyo wakela egumi yohimala woragalene obe okwettenkwaga ehili orahileliwa na mada omeli obe manyalo omeli vamottoni ohintotowa.
9 Vina akala ninto nawo ninoukwakwattutxa, okutxemo orahilele wolapela-wene; vowi japama wakela egumi yohimala na ninto nimodha ehili orahileliwa na mento awo omeli mu Jehena,* munttidda motto.
10 Mukale txenjewa wila munaapwaze aba ang’onoyá; miyo ddinouwaddelani wila anju awa ali wirimu, anowang’anavi kove ya Babaga oli wirimu.
11 * ——
12 “Nyuwo munonamo dhavi? Akala muttu onokaana mabila aye 100, nidha orimelavo nimodha, kanttiya abale 99 vamwangoni, adhowa otamela nttile nirimelile?
13 Ddinouwaddelani ebaribari, agafwanya nttile narimelile, onottabela venjene opitta abale 99 aharimelile.
14 N’ekalelo yakakene, Babaga oli wirimu kanfuna wi arimelevo nne ngafuna mmodha wa aba ang’onoyá.
15 “Ottiya ejo, akala mbalawo onottega, kadhowa wamonihe obure waye, weyo na iyene bahi. Agauvuruwana, omulagiha dila yapama.
16 Vano agakodda wuvuruwana, omukuwele mwina mmodha obe eli, vowi vankala* anamoona eli obe araru, alogaga yakakene makaniyá anogwaddeya.
17 Agahavuruwane, kaperhekela makaniyá mulogo, agahivuruwane mulogoyá, aukalele ninga mmalabo obe namapitxiha musoko.
18 “Ddinouwaddelani ebaribari, dhotene dhinamagenyu vatapano, dhinakale dhomagiwa-dhene wirimu. Dhetene dhinatapulenyu vatapano dhinakale dhotapuliwa-dhene wirimu.
19 Ddinouwaddelani ebaribari yina, akala eli wa nyuwo vatapano, munolaganela okumbirha elobo-elobovi yattima, Babaga oli wirimu onouvahani.
20 Vowi vankala eli obe araru atugumanelaga nzina naga, miyo ddili vari vawa.”
21 Pedro omususela, ohinvuza dhahi: “Nabuya, mbalaga agaddittegela ddimulevelele dila ngasi? Ofiyedha dila tanu na bili?”
22 Yezu omwakula: “Miyo kaddinloga dila tanu na bili bahi, mbwenyi ofiyedha dila 77.
23 “Nona Omwene wa wirimu ogaladdanihiwa na mwene wubuwele wakuweliha anamalaba aye wi amperhekele dhinfiyarilani.
24 Muromeliye wakuweliha, odheliwana mulobwana wanfiyari matalentu 10.000.*
25 Mbwenyi vowi kaana yopitxelana mangauyá, nabuyaye oruma wi agulihiwe iyene, mwadhiye, anaye na dhotene dhinniyena wi muttengoyá opitxiwena mangauyá.
26 Venevo namalabayá omukokorela omuttidda myeddo alogaga, ‘Muddivilele, ddinele oupitxelani dhotedhene.’
27 Sabwa ya omweddela ttagaraga, nabuya waye omuttiya odhowa vina olevelela mangawuyá.
28 Mvenyeliye venevale, adhowaga ohinfwanya namalaba mukwaye wanfiyari adenáriyu 100, venevo omuttidda, oroma omuttikitta mukotti eraga, ‘Kaddipitxele mangawu aga.’
29 Namalaba mukwaye vina, omukokorela omuttidda myeddo, ohilogana dhahi, ‘Oddivilele, ddinele wupitxela.’
30 Vano iyene kafunile onvuruwana, ottiya ejo ohinfugeliha mukambura wi apitxe dhotene dhanfiyariye.
31 Anamalaba ena monelani esidhá, atikina na okubanya onddimuwa vaddiddi, adhowa omwaddela nabuyawá dhotedhene dhipadduwile.
32 Nabuyaye omukuweliha ohilogana: ‘Namalaba wawuma murima wé, muddittiddeliwe myeddo, miyo ddihulevelela mangau otene.
33 Kugamweddeli ttagaraga namalaba mukwawo, dhahene ninga muweddelimi ttagaraga?’
34 N’eji nabuya waye osilidhiwa venjene, ohaperhekela anamafugela wi amuttiye mukambura ofiyedha opitxa dhotene dhanfiyariye.
35 N’ekalelo yakakene, Babaga oli wirimu onaukosenina dhawene, akala nyuwo kamunalevelela abalinyu na murima wotene.”
Manota
^ Kang’ana Mazu Atapuleliwe.
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
^ Na egregu, “na mulomo wa.”
^ Matalentu 10.000 a parata akwanela adenáriyu 60.000 000.
