Dhilebiwe na Mateu 19:1-30
19 Mmalele Yezu ologa esidhá, ovenya o Galileya odhowa murudda wali waddamana na o Judeya, epaddi yina y’o Jordau.
2 Vina ohifwariwa na muttitti mwinjene, iyene ohavulumutxa wenewo.
3 Afarizi ena afunaga omweha Yezu, adha vàliye vina ahinvuza: “Ngani enorumelihiwa mulobwana ommwala mwadhiye mwaha wa muladdu-muladduvi?”
4 Iyene ohawakula dhahi: “Nyuwo kamwengesile wi ole wattanddile vamaromo, wattanddile mulobwana na muyana,
5 vina bawaddela: ‘Nona mulobwana onele omuttiya babe na maye, adhowe akalege na mwadhiye, vina oheli anakale nningo nimodha’?
6 Awene kankala vina eli, mbwenyi ali nningo nimodha. Nona, emagile Mulugu, muttu katapule.”
7 Awene amwakula: “Kito Mizé olebele nni mmalamuloni wi mulobwana amvahe mwadhiye njangarha n’omwalana ngamala amusukumihe?”
8 Iyene ohawakula: “Emuttukulele Mizé orumeliha oleba njangarha n’omwalana ji sabwa ya ovadda wenyu murima, vano kiyali dhawene omaromo.
9 Ddinouwaddelani wi onimmwala mwadhiye, ehili mwaha wa ogonihana wonyakuwa,* amutela muyana mwina onolupa matelo.”
10 Anamasunza aye ahiloga: “Akala eli dhawene mulobwana na mwadhiye, japama ohitela-wene.”
11 Iyene ohawakula: “Kahiyo otene amfwara esidhá, amfwara babale anwodha.
12 Vowi ahikalawo ahintela sabwa ya obaliwa dhawene; ahikalawo ahintela sabwa ya onongiwa n’attu’ vina ahikalawo ena ahintela sabwa ya ozuzumela Omwene wa wirimu; amfwara babale anwodha.”
13 Attukuleliwa aima vàliye wi àtapulele mada vina àlobelele, vano anamasunza aye annasaddeya n’owali.
14 Yezu ohiloga: “Kaattiyeni aima abo, kamwakoddihe, sabwani Omwene wa wirimu bwa abale ankala ninga awene.”
15 Iyene ohatapulela mada aye, mmaleliye ovenyavo.
16 Muttu dhahi ofiya vàliye, vina ohinvuza: “Namasunziha, ddikose yapama gani wila ddakele egumi yohimala?”
17 Iyene omwakula: “Onddivuzela nni mwaha wa ejile eli yapama? Wapama ddi Mulugu bahi. Vano akala onfuna wakele egumi yohimala, wiwelelege malamulo aye masiku otene.”
18 Iyene ohinvuza: “Malamulo gani?” Yezu omwakula: “Kumpe muttu, kulupe matelo, kuwiye, kuvahe onamoona wottambi,
19 omurihe babo na mayo, vina omukwele muttu mukwawo ninga envikweliwe wamwinya.”
20 Muzombweyá omwakula: “Miyo ddinovirihamo dhotedhene eso, enddijombela txini?”
21 Yezu omwakula: “Akala onofuna okala muligani,* odhowe wagulihe dhawo, vina kobiridhá wavahe ayelegi, onele okaana nifumo wirimu; ogamala odhe okale namafwara waga.”
22 Muzombweyá vewaliye eso, odhowa wokubanyene vowi wahikana dhorela dhinjene.
23 Yezu ohawaddela anamasunza aye: “Ddinouwaddelani ebaribari, enele okala yorutxa vaddiddi mureli ovolowa Mumweneni wa wirimu.
24 Ddinouwaddelanivi, akala enorutxa kamelo ovolowa munintoni mwa singano, yottabwetxayá ja mureli ovolowa Mumweneni mwa Mulugu.”
25 Anamasunza aye mwiwalani esodhá, atikina vaddiddi vina ahiloga: “Bani txibarene onawodhe ovuneya?”
26 Yezu odidela wawang’ana vina ohiloga: “Mwa attu eji kinwodheya, mbwenyi mwa Mulugu dhilobo dhotedhene dhinowodheya.”
27 Venevo Pedro ohiloga: “Moone! Iyo nittiya dhilobo dhotedhene vina nihufwarani, ninakele eni?”
28 Yezu ohawaddela: “Txibarene, miyo ddinouwaddelani, siku ninakosiwe dhotene dhikalá dhiswa, Mwana-muttu agilati vampaddoni vaye vottittimiheya, nyuwo vina muddifwarile munele ogilati mmipaddoni 12 wi muttonge mahimo 12 a Izrayel.
29 Vina ole ottiyile nyumba, abalaye, arogoriye, babe, maye, anaye, mindda sabwa ya nzina naga, onele wakela esidhá vopitta vina musogorho egumi yohimala.
30 “Vano enjene ali oroma anele okala omariha, vina omariha anele okala oroma.
