Dhilebiwe na Mateu 2:1-23
2 Mmalele Yezu obaliwa o Belemi elabo y’o Judeya masiku attonga mwene Herodi,* afiya o Jeruzalemi anamapepesa neneri* adhana Omadhelo wa Nzuwa,
2 àvuza: “Oli wuvi ole obaliwe wi akale mwene wa Ayuda? Vowi banili Omadhelo wa Nzuwa nihona neneri yaye, nona nihidha wi nimuttittimihe.”*
3 Mwene Herodi mwiwaliye esidhá, ohizuzuma venjene vamodha na attu otene a mu Jeruzalemi.
4 Vasogorhova, iyene ohakuweliha anddimuwa a anamakutta na anamasunziha magano wi àvuze ogabaliwe Kristu.*
5 Amwakula: “Obaliwe o Belemi elabo y’o Judeya, vowi jijene yalogile namavuhulela eraga:
6 ‘Weyo Belemi, elabo y’o Judeya, kuli-wene sidadi eng’ono vari va anamattonga o Judeya, vowi mwa weyo punabudduwe namattonga onasogorhele nlogo naga, Izrayel.’”
7 Mwa venevo, Herodi ohakuweliha moviteyani anamapepesa neneri, ohavuza mudhidhi woneyile neneriyá.
8 Àrumaga o Belemi, ohawaddela dhahi: “Nyuwo kadhowani, mwafwaseyele ovuzela vali mwanayá, mugamfwanya, mudhe muddaddele wi miyo vina ddidhowe ddamukokorele.”
9 Mmalelani wiwa dhologa dha mwene, avenya aroma odhowa; venevo ahona wi neneri yonilani bali Omadhelo wa Nzuwa yannasogorhela ofiyedha wimela mburo wali mwanayá.
10 Monelani neneriyá, ahittaba nohagalala onddimuwa vaddiddi.
11 Mvolowelani mbamwá, ahinfwanya mwanayá na maye Maria, mmonelani amukokorela vina amuttittimiha. Awene attukula mafumo adhilanina, ahinvaha: Woru, olibanu na mira.
12 Vowi àhaddeliwa na Mulugu murohani wi ahiyelele wa Herodi, awene adhowa elabo yawa aviraga dila yina.
13 Mudhowelani, anju wa Yehova ohinfiyedha Jozé murohani, omwaddela: “Kavenya, omuttukule mwana vamodha na maye ottawelena w’Ejipitu; okale wenewo mpaka miyo wuwaddela, vowi Herodi onomutamela mwanayá wi ampe.”
14 Jozé ovenya na mattiyu, omuttukula mwana na mayeyá, odhowana w’Ejipitu.
15 Iyene okalavi w’Ejipitu mpaka okwa wa Herodi. N’eji dhihakwanihedheya dhalogile namavuhulela wa Yehova, eraga: “Wʼejipitu ddimukuwelawo mwanaga.”
16 Herodi moneliye wi ohipeliwa malago na anamapepesa neneri, osilidhiwa venjene. Iyene ohiruma wi aima otene o Belemi na mirudda dhotene dhaddamelewo apiwe, oromana abale abaliwe-wene ofiyedha a vyaka bili, mowiwanana na nsaka napimelele iyene na anamapepesa neneri.
17 Dhawene dhihakwanihedheya dhalogile namavuhulela Jeremiya, eraga:
18 “Ehiweya kutto o Ramá, wali Rakel wonla n’okubanya, awunlelaga anaye, iyene kafuna opangarhaziwa vowi anayeyá kaaliwo vina.”
19 Mukweli Herodi, Jozé balivi w’Ejipitu, anju wa Yehova ohimuttanyuwela murohani
20 omwaddela: “Kavenya, omuttukule mwana vamodha na maye odhowe mwilaboni ya Izrayel, vowi abale atamela ompa mwanayá amala okwa.”
21 Jozé omuttukula mwanayá vamodha na maye, ohiyelela mwilaboni mwa Izrayel.
22 Vano vewaliye wi Arkelau onolamulela o Judeya vamburoni va babe Herodi, iyene ohova odhowawo, ottiya ejo mwaddeleliwiye na Mulugu murohani, Jozéya odhowa o Galileya.
23 Odhowa okalaga sidadi enkuweliwa Nazareti wila akwanihedheye mazu alogile anamavuhulela, eraga: “Iyene onakuweliwege Munazareti.”*
Manota
^ Kang’ana Mazu Atapuleliwe.
^ Obe, “aliba muniya.”
^ Obe, “nimukokorele.”
^ Obe, “Mesiya; Ole Ottikitteliwe.”
^ Txino endha mwa elogelo ya Ebrayiko entapulela, “nipweto.”
