Dhilebiwe na Mateu 20:1-34
20 “Omwene wa wirimu onladdanihiwa na mulobwana, mwinya wa vatakulu, ombudduwa membesene badhowa watamela anamalaba wi akose mabasa mmunddani mwaye mwa uva.
2 Mmaleliye olagana na anamalabayá wattambirhiha denáriyu* modha vasikuni, oharuma omundda waye.
3 Mbudduweliye wili mudhidhi wa wora 9,* ohawona attu ena ahanna mabasa bemelile vamusika;
4 ohawaddela, ‘Nyuwo vina kadhowani mmunddani mwaga mwa uva, ddinele wuvahani enufwanyelelani.’
5 Attu abo adhowawo. Iyene ohiyelela okosa yakakene mudhidhi wa wora 12,* vina wa wora 15.*
6 Omamalelowa, obudduwa mudhidhi wa wora 17,* ohafwanya ena owimelene ahittiddaga mabasa, ohavuza, ‘Nyuwo mukalele nni veneva siku nantero muhittiddaga mabasa?’
7 Awene amwakula, ‘Kavo muttu onivahile mabasayá.’ Iyene ohawaddela, ‘Nyuwo vina kadhowani mmunddani mwaga mwa uva.’
8 “Muribele vati, mwinya wa munddayá omwaddela dhahi nameddiha mabasa aye, ‘Kaakuwele anamalaba otene wattambirihe, oromaga na omariha opulihaga na oroma.’
9 Mfiyedhe mudhidhi wottambirha, abale aromile olaba mudhidhi wa wora 17,* muttu-muttu ottambirhihiwe denáriyu* modha.
10 Mfiyedhe abale oroma, ahubuwela wi anele wenjedhiwa, mbwenyi muttu-muttu ovahiwe vina denáriyu* modha.
11 Mwakelelani, ahisilidhiwa na mwinya wa munddayá.
12 Aroma ologa, ‘Aba omariha alabile wora modha bahi, masiki dhawene nyuwo muhaliganiha na iyo, olabile siku nantero vina ovilelile oviha wa nzuwa!’
13 Nowidhawo, mwinya wa munddayá omwakula mmodhayavo, ‘Mulobwana, miyo kaddupujile. Kanilaganele wuttambirhiha muttengo wa denáriyu* modha?
14 Kattukula eli yawo odhowe. Miyo ddinfuna ddinvahe oddu womariha yakakene yuvahilemi.
15 Miyo kaddinfwanyela okosa enfunemi na dhaga? Obe ona nrima sabwa ya miyo okala muttu wapama?’*
16 Nona, oroma anakale omariha, omariha anakale oroma.”
17 Adhowaga o Jeruzalemi, Yezu ohakuwelela vawa-vene anamasunza aye 12, ohawaddela:
18 “Kewani! Iyo nindhowa o Jeruzalemi, Mwana-muttu onele operhekiwa mmadani mwa anddimuwa a anamakutta vina mwa anamasunziha magano. Awene anele omuttongela okwa;
19 vina anele omperheka mmadani mwa attu a malogo wila ambedde, amuwasule vina amukomele vapingirhizini mpaka okwa, vina siku nanoraru iyene onele ovenyihiwa mukwani.”
20 Mmalelani mayi wa ana Zebedeu ofiya vàliye vamodha na anaye, omukokorela amukumbirhaga elobo.
21 Yezu ohinvuza: “Munfuna nni?” Iyene ohakula: “Karumelani wi anaga aba eli, mmodha agilati omononi wenyu woja, mwina agilati omononi wenyu wemara, Mumweneni mwenyu.”
22 Yezu ohawakula dhahi: “Nyuwo kamunziwa enkumbirhenyu. Munowodha omwa enfunemi omwa?” Awene amwakula: “Ninowodha.”
23 Iyene ohawiyihedha: “Nyuwo munele omwa kalisi enamwemi, mbwenyi kahiyo miyo onimuttoma ole onagilati omononi waga woja peno omononi waga wemara, vowi mimburo eso anya babale asasanyedheliwe na Babaga.”
24 Ena kumi mwiwalani makani aba, atikina na abale eli abuwene àli obali.
25 Vano Yezu ohakuwela anamasunza aye otene vina ohawaddela: “Nyuwo munoziwa wi alamuleli a malogo, anovikosiha anya a abale analamulelani vina anddimuwa anolabihedha onddimuwa wawa wi atabutxena attu.
26 Vano nyuwo kamukosege dhawene, onfuna okala ninga munddimuwayá, akale mudhari wa ena,
27 vina onfuna okala woromayá vari venyu, akale mudhari wenyu.
28 Dhahene ninga Mwana-muttu, ohidhele olabiwa, mbwenyi odhele olaba vina operheka egumi yaye wi awobolelena attu enjene.”
29 Abudduwaga o Jerikó, muttitti mwinjene wa attu ohinfwara.
30 Venevo, aliba ohona eli ahiwa wi Yezu onovira vakuvi vawa; n’eji aroma okuwa dhahi: “Nabuya, Mwana Davidi, muneddele ttagaraga!”
31 Vano muttitti wa attu ohasaddeya awaddelaga wi amale, mbwenyi awene anttabwihavi okuwawa, alogaga: “Nabuya, Mwana Davidi, muneddele ttagaraga!”
32 Venevo Yezu ohimela, ohakuwela vina ohavuza dhahi: “Nyuwo munfuna wi miyo ddukoseleni eni?”
33 Awene amwakula: “Nabuya, munifugule mento.”
34 Yezu oheddiwa ttagaraga, oddiginya mento awa, momaguva-mwene awene ahiyelela wona vina ahinfwara.
Manota
^ Kobiri ya parata ya akadda Roma. Kang’ana Mazu Atapuleliwe.
^ Na egregu, “wora yanoraru [nzuwa banimalile opattuwa].”
^ Na egregu, “wora yanotanu na modha [nzuwa banimalile opattuwa].”
^ Na egregu, “wora yanotanu na nayi [nzuwa banimalile opattuwa].”
^ Na egregu, “wora yanokumi na modha [nzuwa banimalile opattuwa].”
^ Na egregu, “wora yanokumi na modha [nzuwa banimalile opattuwa].”
^ Kobiri ya parata ya akadda Roma. Kang’ana Mazu Atapuleliwe.
^ Kobiri ya parata ya akadda Roma. Kang’ana Mazu Atapuleliwe.
^ Kobiri ya parata ya akadda Roma. Kang’ana Mazu Atapuleliwe.
^ Obe, “wovaha.”
