Dhilebiwe na Mateu 21:1-46
21 Awene addamelaga o Jeruzalemi, afiya o Betfajé, Omwangoni wa Oliveira, wenewo Yezu oharuma anamasunza aye eli,
2 ohawaddela: “Mudhowe murudda oli osogorho wenyu, munofwanya buru ya mukolo jimageleliwe vamodha na mwana-buruyá. Mutapule vina muddidhelena.
3 Agakalawo muttu onuvuzani, mwakule dhahi, ‘Nabuya ddintamela burudhá.’ N’eji awene anele outtiyani odhana momaguva.”
4 Eji yireyile wi akwanihedheye mazu a namavuhulela, anloga:
5 “Mmwaddele mwana-muyana w’o Sioni: ‘Kewa! Mwene wawo onodha, iyene ddokurumuwa vina ondha bagilatile vadhulu va buru, ndde, vadhulu va mwana-buru, mwana enama enttukuliwana mittorho.’”
6 Anamasunza aye adhowa, ahira dhahene ninga mwawaddelele Yezu.
7 Awene adhana buru vamodha na mwana-buruyá, attukula guwo dhawa attanika vadhulu va dhinamadhá; vano Yezu omugilatele mwana-buruyá.
8 Muttitti munddimuwa wa attu wanttanika guwo dhawa mudila, oku ena angwadda mataba a miri, atadelaga mudilamwa.
9 Muttitti wa attu wali osogorho waye na ena adha mundduni mwaye ankuwa, eraga: “Ninoulobani, kanvuneni, Mwana Davidi! Worurihiwa ddule ondha na nzina na Yehova! Ninoulobani nyuwo munkala wirimu, kanvuneni iyene!”
10 Mfiyedhiye o Jeruzalemi, attu otene a musidadi, atikina avuza, dhahi: “Odduya bani?”
11 Attu ena àlivo, ahakula: “Oddu ddi namavuhulela Yezu, w’o Nazareti, elabo y’o Galileya!”
12 Yezu ovolowa mumparhani, ohattamagihamo otene agulihamo vina agula, orayila meza a anamatxinja kobiri na mipaddo dha abale aguliha kangayiwa.
13 Vina iyene ohawaddela: “Elebiwa, ‘Nyumba yaga, enakuweliwege nyumba ya malobelo;’ vano nyuwo musaddula jikala nyumba ya ambava.”
14 Vina bali mumparhani, aliba ohona na aragali ahimwaddamela, iyene ohavulumutxa.
15 Anddimuwa a anamakutta na anamasunziha magano, monelani dhotikiniha dhotedhene dhikosiliye vina aima akuwa mumparhani, “Ninoulobani, kanvuneni Mwana Davidi!” Ahuma milomo.
16 Vina ahinvuza: “Munowiwa dhinlogani?” Yezu ohawakula: “Ndde. Nyuwo kamunengesaga mazu awi, ‘Muhiburutxa nttittimiho mwano mwa aima na mwa anyenye’?”
17 Mwattiyedhiye venevale, obudduwamo musidadimwá, odhowa o Betánia bakala wenewo omattiyu wotene.
18 Muyele vati, eyelelaga musidadimwá, okaliwa dala.
19 Moneliye mfigera nikome na rampa ohidhowavo, vano kafwanyilemo elo ahili mataba, iyene ohiloga dhahi: “Txipo kubale vina milima.” Mudhidhene obo, mfigerayá ohuma.
20 Anamasunza aye monelani esidhá, ahivuza n’otikina, alogaga: “Mfigera obu omaguvele dhavi wuma dhahene?”
21 Yezu ohawakula: “Dinouwaddelani ebaribari, mugakaana nroromelo muhaganyedhaga, kamunakose ejenevi bahi ekosilemi na mfigera; mbwenyi masiki mugaloga na mwango obu, ‘Kabwanyuwa odhowe wavivokele mbara,’ enopadduwa dhawene.
22 Dhotedhene dhinalobenyu munlobeloni, muroromelaga munele wakela.”
23 Mmaleliye ovolowa mumparhani, baroma osunziha; anddimuwa a anamakutta na anddimuwa a nlogo, amususela vina ahinvuza dhahi: “Na owodha gani onkosinyuna esidhá? Vina ouvahileni owodhawa oku bani?”
24 Yezu ohawakula dhahi: “Miyo vina ddikaana elobo modha y’ouvuzani. Mugaddakula, miyo vina ddinele ouwaddelani na owodha gani onkosimina esidhá:
25 Batismu ya Joau yadhele wuvi? Yali ya wirimu obe ya attu?” Awene aroma wubuwela oka-oka alogaga: “Iyo nigaloga, ‘Ya wirimu’ iyene ononivuza, ‘Kito mukoddele nni omuroromela?’
26 Mbwenyi nigaloga wi ‘Ya attu,’ ninowova muttitti, sabwani otene animona Joau ninga namavuhulela.”
27 N’eji awene amwakula Yezu: “Kaninziwa.” Iyene ohawiyihedha alogaga: “Miyo vina kaddinauwaddeleni na owodha gani onkosimina esidhá.
28 “Nyuwo munonamo dhavi? Muttu dhahi wanna aima eli. Bamukuwela woroma, bamwaddela dhahi, ‘Mwanaga kadhowa-to ddabuno omundda wa uva wakose mabasa.’
29 Mwanayá omwakula dhahi, ‘Miyo kaddindhowa’ mbwenyi vasogorhova ohitxinuwa, ohidhowawo.
30 Omukuwela wanawili, omwaddela yakakene. Iyene omwakula babe, ‘Ddinele odhowa;’ mbwenyi kadhowile.
31 Mwa aima aba oheli bani omwiwelele babe?” Awene amwakula: “Woromayá.” Yezu ohawaddela: “Ddinouwaddelani ebaribari, anamapitxiha musoko na ajeberuwa banakale oroma ovolowa Mumweneni mwa Mulugu, nyuwo muhinatti.
32 Sabwani Joau, wadhele wulagihani dila yoligana, mbwenyi nyuwo kammurumelile. Vano amurumelile ba anamapitxiha musoko na ajeberuwa, masiki mmalele nyuwo wona esidhá, kamutxinuwilevi; kammurumelile.
33 “Kavuruwanani yoladdaniha yina: Wahikalawo mulobwana dhahi wanna mundda waye wa uva, wamagile rhinga orugunuwa munddayá wotene, batiba mburo mwanyigaliwa uvadhá vina bamaga muringotti;* mmaliliye ohattiyedha anamalima; okosa oleddo odhowa elabo yina.
34 Mfiyedhe nsaka nawittwa milimadhá, oharumawo adhari aye wi adhowe agumane na anamalimayá, attukule milima dhaye.
35 Vano, anamalimayá ahattidda adhariyá, mmodha ahimbubudda, mwina ahimpa, mwina ahimponyedha malugu.
36 Oharumawo adhari ena muttengo wawinjiva opitta abale oroma, vano awene awirilena yakakene.
37 Omamalelowa omurumawo mwanaye, alogaga dhahi: ‘Awene anele omuriha mwanaga.’
38 Anamalimayá mmonelani mwanaye ahiloga oka-oka, ‘Oddu ddinfuna ohalana mundda obu. Ndhoweni nimpe, nihalena dhohalana dhaye!’
39 Novenya, awene amuttidda, ahimburulela otakulu wa munddayá vina ahimpa.
40 Venevo mwinya wa munddayá ageyela, txini enakosiye na anamalimayá?”
41 Awene amwakula: “Sabwa ya anamalimayá okala abure, iyene onele watolotxa otene; àtamele anamalima ena, abuwene agamvaha milima dhaye, nsakana nigafiya.”
42 Yezu ohawaddela dhahi: “Nyuwo kamunengesaga Mmaleboni wi, ‘Nlugu nikoddile anamamaga nyumba ttidhile okala nlugu ninddimuwa na alsersi. Nlugu ntti nindha wa Yehova, eji kahiyo yotikina vamentoni vehu’?
43 Nona ddigaloga wi munele wakiwa mmadani mwenyu Omwene wa Mulugu, ovahiwe nlogo nina ninbala milima dhawa.
44 Vina, muttu ommottela vanluguni ntti onele otateya. Vano ommotteliwa nluguna, onele otatareya.”
45 Anddimuwa a anamakutta na Afarizi vewalani dholaddaniha esi, anonelamo wi anaddiwana bawene.
46 Masiki afunaga onfugela annova muttitti wa attu, sabwani awene amona ninga namavuhulela.
Manota
^ Nyumba yolapa yamagiwa wi akalemo mwang’aneli, ang’anelaga wi ambava na dhinama dhowopiya dhinavolowe mmunddanimwa.
