Dhilebiwe na Mateu 22:1-46
22 Yezu ohisunziha wili na dholaddaniha; ohiloga:
2 “Omwene wa wirimu onoladdanihiwa na mwene omukosele mwanaye mattanga a matelo.
3 Iyene oharuma adhari aye wi awaddele abale akuweleliwe vamattanganiva, mbwenyi akuweliweyá ahikodda.
4 Iyene oharuma adhari ena na mazu aba, ‘Kadhowani mwawaddele dhahi akuweleliwe vamateloniva: “Ddimala osasanyedha mattangayá, ddimala opiha ng’ombe dhaga vina dhinama dhaga dhoruva, dhotene dhili dhomala nawale. Kadhaunoni vamattangani a matelo.’”
5 Mbwenyi anamakuweliwayá apwaza, avenyavo; mmodha odhowa omunddani waye, mwina odhowa okosa marhondda aye,
6 mbwenyi ena, ahattidda adhariyá arumiwe, ahabubudda ofiyedha wapa.
7 “Mweneyá ohinyonyeya venjene, oharuma anyakoddo aye, adhowa wapa atimbwini abale vina addumeya sidadi dhawa.
8 Mmaleliye ohiloga na adhari aye, ‘Mattangayá a matelo amala osasanyedhiwa, mbwenyi akuweleliwevo kafwanyelela.
9 Nona, kadhowani mmarampani a musidadi, mmukuwelele vamateloniva muttu ddi muttu oninfwanya nyuwo.’
10 Adhariyá adhowa mmarampani, ahatugumaniha otene àfwanyilani, abure na apamayá; n’eji mburo wakosiwa mattanga a matelo wahidhala na attu àkuweleliwevo.*
11 “Mvolowele mwene wi awone akuweleliwe vamateloniva, omonavo muttu wahabalile guwo dha vamateloni.
12 Mweneyá ohinvuza, ‘Mulobwana, mpuno ovolowilemo dhavi ohabalile guwo dha vamateloni?’ Iyene kana-wene yologa.
13 Mwene ohawaddela adhari aye, ‘Kammageni nyono na myeddodhá mumponyedhe otakulu widdimani. Wenewo onele wunla na okubanya onddimuwa vaddiddi.’*
14 “Sabwani ankuweliwa ahinjiva, mbwenyi ansakuliwa ankala ang’onovi.”
15 Venevo Afarizi adhowa olaganela omuttidda na mazu aye.
16 Mmalelani aharumelawo anamasunza awa na attu amfwara Herodi, wi aloge dhahi: “Namasunziha, ninoziwa wi muli webaribari vina munosunziha dila ya Mulugu mowiwanana na ebaribari; kamuntamela waziveliha attu vina kamunang’ana ekalelo yawa.
17 Kanaddeleni, munonamo dhavi, enokala* obe kinkala ompitxela musoko Sézari?”
18 Yezu anonaga obure wa mmirimani mwawa, ohiloga: “Agwarhagwambi, munddehela nni?
19 Kaddilagiheni kobiri ya musoko.” Amudhelana denáriyu* modha.
20 Iyene ohavuza: “Kove eji na dhilebiwevodha s’ani?”
21 Amwakula: “Sa Sézari.” Venevo iyene ohawaddela: “Munvahe Sézari dhili dha Sézari, mbwenyi dha Mulugu, munvahe Mulugu.”
22 Awene ewaga esodhá atikina vaddiddi, amuttiya, adhowa.
23 Siku-nene nttile Asaduseu, ahinrumela wi abale akwile anele ovenyihiwa mukwani, amususela vina ahinvuza dhahi:
24 “Namasunziha, Mizé ohiloga: ‘Akala mulobwana onokwa, amuttiya mwadhiye ahinna aima, mbali wa marafulayá amutele wi ambalele mwana mbalaye okwile.’
25 Epadduwile jiji, ahikalawo abali atanu na eli vari vehu. Woroma omutela muyana, ohikwa ahimuttiyile mwana, mbalaye omutela muyana oddo.
26 Yakakene jipadduwile na wanawili, wanoraru vina na otene atanu na eli.
27 Omagomelowa, okwile ddi muyanayá.
28 Dhahene nsaka na ovenyihiwa mukwani, mwa aba atanu na eli, bani onakale mamuneyá? Sabwani wahiteliwa na otene.”
29 Yezu ohawakula dhahi: “Nyuwo munyengetteya, sabwani kamunnonelamo Malebo nne guru ya Mulugu;
30 vowi nsaka n’ovenyihiwa mukwani, alobwana kantela nne ayana kantelihiwa, mbwenyi awene ankala ninga anju a wirimu.
31 Mwaha wa ovenyihiwa mukwani, kamwengesile dhilogile Mulugu, dhawi:
32 ‘Miyo ddili Mulugu wa Abrahamu, Mulugu wa Izaki vina Mulugu wa Jakob’? Iyene kahiyo Mulugu wa abale akwile, mbwenyi Mulugu wa attu aliwo.”
33 Muttitti wa attu àlivo mwiwalani esodhá, atikina na masunziho aye.
34 Mwiwale Afarizi wi Yezu ohamaliha Asaduseu, atugumana bakala nikuru nimodha.
35 Mmodhayavó, muziwitxi wa Nlamulo, omweha anvuzaga:
36 “Namasunziha, mwa Malamulo otene ninddimuwanavo ttivi?”
37 Iyene omwakula: “‘Omukwele Yehova Mulugu wawo na murima wawo wotene, na omuttu* wawo wotene vina na yubuwelo yawo yotene.’
38 Ntti tti nlamulo ninddimuwa vina noroma.
39 Nanawili ninladdanana, ttintti: ‘Omukwele muttu mukwawo ninga envikweliwe wamwinya.’
40 Mwa malamulo aba omeli pungwela Nlamulo notene na Mizé, na dhologa dha Anamavuhulela.”
41 Afarizi mutugumanelani, Yezu ohavuza:
42 “Munonamo dhavi mwaha wa Kristu? Iyene mwana ani?” Awene amwakula: “Iyene mwana Davidi.”
43 Iyene ohavuzavi: “Kito Davidiyá na guru dha muya wokoddela, omukuwelele nni Nabuya, eraga,
44 ‘Yehova ohiloga na Nabuyaga: “Kagilati omononi waga woja ofiyedha miyo wattiya amwiddani awo, mutxiddo mwa manyalo awo”’?
45 Akala Davidi onimukuwela Nabuya, kito okalile dhavi mwanaye?”
46 Kavo owodhile ologa nne nzu nimodha n’omwakulana, vina ovenyana siku-nene nttile otene annova omvuza.
Manota
^ Obe, “attu agilatile vameza.”
^ Na egregu, “atakunaga meno.”
^ Obe, “enorumelihiwa.”
^ Kobiri ya parata ya akadda Roma. Kang’ana Mazu Atapuleliwe.
^ Obe, “egumi.” Kang’ana Mazu Atapuleliwe, anloga: “Muzimu.”
