Dhilebiwe na Mateu 25:1-46
25 “Omwene wa wirimu onoladdanihiwa na anamwali* kumi, attukulile panti dhawa banfwarela muteli.
2 Atanu àli otowa malago, mbwenyi ena atanu àli a malago.*
3 Otowa malago attukula panti dhawa vano kattukulile makura meena,
4 Mbwenyi a malago attukula panti dhawa vina attukula makura meena.
5 Sabwa ya muteliyá ogonela otene attiddiwa tturho, aroma ogona.
6 Vari va mattiyu ohiweya okuwa waloga dhahi: ‘Muteli ofiya! Mbudduwe munfwarele.’
7 Anamwaliyá otene avenya, attiddiha panti dhawa.
8 Abale otowa malago ahakumbirha dhahi abale a malago, ‘Munimiminelemo makura enyu, sabwani panti dhehu dhikuwara, dhinfuna ottima.’
9 Abale a malago ahawakula, dhahi: ‘Kanina makura annakwanela iyo na nyuwo. Mugafuna mudhowe okule ongulihiwani, mwagule enyu.’
10 Mudhowelani ogula makura awa, odha muteliyá. Anamwali àli omala-nawale ahivolowa na iyene mburo wa mattanga a mateloyá, mmalelani musuwoyá ofugiwa.
11 Vasogorhova afiya vina anamwali ena, alogaga, ‘Nabuya, Nabuya, kanifuguleleni musuwo!’
12 Iyene ohawakula: ‘Ddinouwaddelani ebaribari, Kaddinuziwani-wene.’
13 “Nona kakalani txenjewa, vowi kamunziwa nne sikuna nne mudhidhiyá.
14 “Yakakene jipadduwile na muttu wafuna weddela elabo yolapela; iyene ahinatti ovenyavo, ohakuwela adhari aye battiyedha dhorela dhaye.
15 Mmodha ohinvaha talentu* tanu, mwina ohinvaha talentu bili, mwinayá ohinvaha talentu modha; onvahile muttu-muttu mowiwanana na ewodhelo yaye, mmaleliye okosa oleddo.
16 Ole wavahiwe talentu tanu odhowa okosana mpinddu, ogumela dhina tanu.
17 Yakene vina, ole wavahiwe bili ogumelana dhina bili.
18 Mbwenyi mudhari wavahiwe talentu modha, odhowa, ohitiba vego ovitavo kobiri* ya nabuyaye.
19 “Mvirele mudhidhi mwinjene, nabuya wa adhari abale ohiyela, otamela oziwa ekosilena muttu-muttu kobiri* yattiyedhiweyi.
20 Vano ole wattiyedhiwe talentu tanu ofiya vamentoni va nabuyaye, odhana dhina tanu, alogaga, ‘Nabuya nyuwo mwaddittiyedhe talentu tanu, konani ddihigumela talentu dhina tanu.’
21 Nabuya waye ohiloga dhahi: ‘Ekala, mudhari wapama vina wororomeleya! Vowi ohiroromeleya na dhilobo dhing’onovi, miyo ddinele wuttiyedha dhinjene. Kajavo ottaba na nabuya wawo.’
22 Vasogorhova ole wakelile talentu bili, ofiya vamentoni va nabuyaye, vina ohiloga, ‘Nabuya, nyuwo muddittiyedhe talentu bili, konani ddihigumela talentu dhina bili.’
23 Nabuya waye ohiloga dhahi, ‘Ekala, mudhari wapama vina wororomeleya! Vowi ohiroromeleya na dhilobo dhing’onovi miyo ddinele wuttiyedha dhinjene. Kajavo ottaba na nabuya wawo.’
24 “Omamalelowa, ole wakelile talentu modha ofiya vamentoni va nabuyaye, ohiloga dhahi: ‘Nabuya, miyo ddanziwa wi nyuwo muli muttu worutxa, munosinanga vakoddile nyuwo wala vina munoddoddela vahiwazilenyu.
25 Nona baddova, badditibela talentu yenyu. Ovano ttukulani eli yenyu.’
26 Nabuyaye omwakula dhahi: ‘Muwara wé, mudhari wabure, kuloga wanziwa wi ddinosinanga vakoddile miyo wala vina ddinoddoddela vahiwazilemi?
27 Ki okoddele nni okoyiha kobiragayá* obanko wi omeyelelo waga, ddifwanya biyenjedhedhiwe.*
28 “‘Bahito, kamwakeni talentu ejo enna iyene, munvahe ole onna talentu kumi.
29 Vowi ole onna, onele ovahiwavi vina onele okaana dhinjene. Vano ole ohinna, masiki eng’onovi eniyena onele wakiwa.
30 Kamponyedheni mudhariyá otakulu widdimani. Wenewo onele wunla na okubanya onddimuwa vaddiddi.’*
31 “Mwana-muttu agadha na nttittimiho naye vamodha na anju otene, onele ogilati vampaddoni vaye vottittimiheya.
32 Malogo otene anele otugumanihiwa vamentoni vaye, iyene onele wattiyaniha attu; ena oku ena oku, dhahene ninga mukumbuzi onttiyaniha mabila na mbuzi.
33 Mabila attiye omononi waye woja, mbuzi attiye omononi waye wemara.
34 “Mwene onele ologa na abale anakale omononi waye woja: ‘Dhaunoní nyuwo orurihiwe na Babaga; kakelani Omwene osasanyedheliwenyu ovenyana omaromo wa elabo.
35 Sabwani vannemina dala nyuwo muddivaha yoja, vannemina nttona nyuwo muddivaha yomwa. Miyo ddali mwana-wedda, nyuwo muddakela,
36 kaddana guwo nyuwo muddivaha yowabala. Ddahikala muredda, nyuwo muddikoya; vina ddali mukambura nyuwo mudha oddona.’
37 Venevo aligani anele omwakula dhahi: ‘Nabuya, iyo nuwonileni mudhidhi gani na dala, nuvahani yoja; nuwonileni mudhidhi gani na nttona, nuvahani yomwa?
38 Iyo nuwonileni mudhidhi gani ninga mwana-wedda, banuwakelani obe nuwonileni mudhidhi gani s’eguwo, banuvahani yowabala?
39 Mudhidhi gani wali nyuwo muredda vina mukambura, nidha owonani?’
40 Mwene onele wawakula dhahi, ‘Ddinouwaddelani ebaribari, emukosele nyuwo mmodha wa abalaga aba ang’onoyá, muhiddikosela miyo vina.’
41 “Nomala onele wawaddela dhahi anakale omononi waye wemara: ‘Kaddivenyelenivo, nyuwo muttongeliwe na Mulugu, odhowa omottoni ohinttima osasanyedheliwe Ddiabo vamodha na anju aye.
42 Vowi vapiwe miyo dala, nyuwo kamuddivahile yoja; vakanilemi nttona, nyuwo kamuddivahile yomwa.
43 Miyo ddali mwana-wedda, nyuwo kamuddakelile, kaddana guwo, nyuwo kamuddivahile yowabala; ddali muredda vina mukambura, nyuwo kamudhile oddona.’
44 Venevo awene anele wakula: ‘Nabuya, iyo nuwonileni mudhidhi gani na dala, na nttona, ninga mwana-wedda, s’eguwo, bamuli muredda obe mukambura, iyo nikodda ouzuzumelani?’
45 Iyene onele wakula: ‘Ddinouwaddelani ebaribari, dhihimwirelinyu mmodha wa aba ang’onoyá, miyo vina kamuddireli.’
46 Venevo, awene anele ottongeliwa otolotxiwa namukalakala; mbwenyi aligani anele wakela egumi yamukalakala.”
Manota
^ Anamwali ahinagonaga na mulobwana.
^ Obe, “zelu.”
^ Talentu ya agregu yalemela kilu 20.4.
^ Na egregu, “parata.”
^ Na egregu, “parata.”
^ Na egregu, “parata.”
^ Obe, “na juru.”
^ Na egregu, “atakunaga meno.”
