Dhilebiwe na Mateu 26:1-75
-
Anamakutta anolaganela ompa Yezu (1-5)
-
Yezu onokuttuleliwa makura onukela (6-13)
-
Paskwa womariha vina ogulihiwa wa Yezu (14-25)
-
Witiwa wa Siyari ya Nabuya (26-30)
-
Yezu onovuhulela wi Pedro onele omukodda (31-35)
-
Yezu onolobela o Jetsemani (36-46)
-
Yezu onomagiwa (47-56)
-
Ottongiwa o Sinedriyu (57-68)
-
Pedro onomukodda Yezu (69-75)
26 Mmalele Yezu ologa dhotedhene esi, ohawaddela dhahi anamasunza aye:
2 “Nyuwo munoziwa yawi ahalilewo masiku meli wi ajiwe mattanga a paskwa vina Mwana-muttu onele operhekiwa wi apiwe vapingirhizini.”
3 Mudhidhene obo, anddimuwa a anamakutta na anddimuwa a nlogo atugumana vatakulu va namakutta munddimuwa, wakuweliwa Kayifá,
4 vina ahiwananela omuttidda Yezu n’oswaga,* wi ampe.
5 Vano, anloga oka-oka: “Nihimuttidde mudhidhi wa mattanga wi ninatatamule mbigiddi wa nlogo.”
6 Yezu bali o Betánia, vatakulu va Simoni ole wanna maranya,
7 ofiya vàliye muyana wanna garafwa mwali makura onukela vina a muttengo munddimuwa, oroma omukuttulela vamusorho iyeneyá ajaga.
8 Anamasunza aye onaga esidhá, atikina vina ahiloga: “Onnongela nni makura aba ebewene?
9 Aba agagulihiwa muttengo munddimuwene, kobiridhá dhivahiwa ayelegi.”
10 Munonelemo Yezu esodhá ohawaddela: “Munimunyonyela nni muyana oddu? Eddikoseliye japama.
11 Sabwani ayelegi ankalavi na nyuwo mudhidhi wotene, mbwenyi na miyo kamunakalevi mudhidhi wotene.
12 Muyana oddu oddikuttulele makura onukela, obazele osasanyedha wekiwa waga.
13 Ddinouwaddelani ebaribari, mwilaboni mwetemwene munalaleyiwe miselu esi dhapama, munele olaleyiwa vina dhiddirele muyana oddu, wi obuweliwege.”
14 Mmodhavo wa Kumi na Eli, waromoliwa Juda Iskariote, odhowa wa anddimuwa a anamakutta
15 ohiloga: “Ddigauperhekelani mmadani mwenyu munaddivahe eni?” Awene alaganela omvaha kobiri 30 dha parata.
16 Ovenyana venevale, iyene wantamela mudhidhi wofwanyelela wi amperheke mmadani mwawa.
17 Siku noroma na Mattanga a Pawu Dhotowa Emela, anamasunza a Yezu amususela ahinvuza: “Munfuna nasasanyedhe wuvi mattanga a Paskwa?”
18 Iyene ohawakula: “Mudhowe musidadi, munonfwanya mulobwana dhahi; mmwaddele, ‘Namasunziha ologile: “Nsaka naga ninowaddamela, ddinamuje Paskwa vatakulu-venyu, vamodha na anamasunza aga.”’”
19 N’eji anamsunza avirihamo ninga mwawaddele Yezu vina asasanyedha mattanga a Paskwa.
20 Muribele vati iyene wali wogilatene vameza na anamasunza aye 12.
21 Awene ajaga, iyene ohiloga: “Ddinouwaddelani ebaribari, mmodhavo wenyu onele oddiguliha.”
22 Awene akubanya vaddiddi ewaga esodhá vina muttu-muttu oroma omvuza: “Nabuya, txino ddi miyo?”
23 Iyene ohakula: “Ole oneka nlada naye mutijelani vamodha na miyo, ddinaddigulihe.
24 Txibarene, Mwana-muttu onodhowa, dhahene ninga mulebeliwani mwaha waye. Vano ntowa nimugwele ole onimuguliha Mwana-muttu! Mwa iyene egamukalela kohibaliwa.”
25 Juda wafuna omuguliha, omvuza: “Ngani Rabi, txino ddi miyo?” Yezu omwakula: “Ddi weyo wamwinya onloga.”
26 Awene ajagavi, Yezu ottukula pawu olobelela, omenya vina ohavaha anamasunza aye, eraga: “Muttukule muje. Eji enzinddiyeliha maningo aga.”
27 Mmaleliye, ottukula kalisi ya vinyu, olobelela vina ohavaha anamasunza aye, alogaga: “Kamwani nyuwo motene,
28 eji enzinddiyeliha ‘nikami naga na nipagano,’ ninfuna okuttuliwa wi dhileveleliwe dhottega dha attu enjene.
29 Mbwenyi ddinouwaddelani: Kaddinamwe vina vinyu eji, mpaka siku ninamwemi vamodha na nyuwo vinyu eswa, Mumweneni mwa Babaga.”
30 Mmalelani wiba jibo* dhomutamalelana Mulugu, awene adhowa Omwangoni wa Olivera.
31 Venevo Yezu ohawaddela: “Mattiyabano nyuwo motene munele okwakwattuwa sabwa ya miyo, vowi ehilebiwa: ‘Ddinele onvoreya mukumbuzi, mabilayá abalaleye.’
32 Mbwenyi ddigamala ovenyihiwa mukwani, ddinele ousogorhelani ddidhowaga o Galileya.”
33 Vano Pedro omwakula, alogaga dhahi: “Masiki otene aba akwakwattuwe mwaha wa nyuwo, miyo txipo kaddinakwakwattuwe!”
34 Yezu omwakula: “Ddinouwaddela ebaribari, mattiyabano mutubi ohinonla, weyo onele oddikodda dila ttaru.”
35 Pedro omwakula: “Masiki efuneye miyo okwa na nyuwo, txipo kaddinauttiyeni.” Anamasunza ena otene ahiloga yakakene.
36 Yezu ofiya na anamasunza aye mburo wakuweliwa Jetsemani vina ohawaddela dhahi: “Kagilatini veneva, miyo ddindhowa okule ddalobele.”
37 Omuttukula Pedro na ana eli a Zebedeu, venevo oroma oribiwa murima, vina okubanya venjene.
38 Vasogorhova iyene ohawaddela: “Ddiribiwa murima vaddiddi, ddihalile vang’onovi wi ddikwe. Mukale veneva vina mukale txenjewa vamodha na miyo.”
39 Mususeliyevo vang’onovi, okokora, okunamihedha musorho waye vati, olobela dhahi: “Babaga, egawodheya ddirabeliheni kalisi eji, vano kiyireye ninga munfunela miyo, yireye ninga munfunela nyuwo.”
40 Iyene ohiyelela vàli anamasunza aye, wafwanyile agonaga, venevo ohiloga na Pedro: “Kamuwodhile okala mento vamodha na miyo nne ngafuna-wene wora modha?
41 Mukale txenjewa vina mudidele olobela, wila munagwele munyengetteyani. Txibarene, muya onofuna; vano maningo bawobana.”
42 Ohisusavo dila yanawili, olobela dhahi: “Babaga, akala kinwodheya oddirabeliha kalisi eji wi miyo ddihimwe, yireye ofuna wenyu.”
43 Mwiyeleliye wili, wafwanyile agonaga, sabwani mento annalemela na tturho.
44 Venevo ohisusavo, ohattiya, oroma olobela dila yanoraru, alogaga mazu akakene.
45 Ohiyelela vàli anamasunza aye baloga dhahi: “Mudhidhi ninga obu, nyuwo munogona vina munovuma! Moone! Onowaddamela mudhidhi wa Mwana-muttu operhekiwa mmadani mwa attegi.
46 Kavenyani, ndhoweni. Mmone! Ole onddiguliha onofiya.”
47 Iyene alogagavi, Juda, mmodha wa Kumi na Eli, osusela vàliye; iyene odha vamodha na muttitti mwinjene wa attu, wanna masupadda vina miri. Awene àrumiwe na anddimuwa a anamakutta vina na anddimuwa a nlogo.
48 Namagulihayá wahavaha ezinddiyelo, alogaga: “Ole onamvahe miyo beju, ddudduwene, mummage.”
49 Adhowaga vàli Yezu, iyene ohiloga: “Mwagumi, Rabi!” Vina ohinvaha beju.
50 Vano Yezu ohinvuza: “Mulobwana, omvedavo nni veneva?” Mmalelani awene amuttidda Yezu vina ahimmaga.
51 Vano, mudhidhene obule mmodhavo wali na Yezu, ovula supadda naye, ogwadda niyaru na mudhari wa namakutta munddimuwa.
52 Yezu ohilogana: “Keyihedha supadda mwalani, sabwani otene abale ampa na supadda, anele opiwa na supadda.
53 Obe onubuwela wi kaddinwodha omuloba Babaga addirumela muttengo munddimuwa* wa anju?
54 Kito dhigakwanihedheyile dhavi dhinloga Malebo, wi dhinofwanyela wireya dhahene?”
55 Mudhidhene obule, Yezu ohiloga na muttitti: “Nyuwo mudha na masupadda vina miri wi muddimage ninga dda mbava? Masiku otene miyo ddakala mumparhani ddisunzihaga, nyuwo kamuddimagile.
56 Vano dhotedhene esi dhipadduwele wi dhakwanihedheye dhilebiwe na anamavuhulela.” Venevo anamsunza aye otene amuttiya vina attawa.
57 Abale ammagile Yezu, amuttukulela wa Kayifá, namakutta munddimuwa; wenewo watugumanile anamasunziha magano na anddimuwa a nlogo.
58 Vano, Pedro wanninfwara wolapela-wene mpaka vatakulu va namakutta munddimuwa; mmaleliye ovolowa, ogilati vamodha na anamalaba wi one yafuna opadduwa.
59 Anddimuwa a anamakutta na Sinedriyu* yotene, antamela yommagedhana Yezu wi anfwanyena muladdu wompihana.
60 Mbwenyi kanfwanyilena nne muladdu mmodha, masiki vafiya attu enjene avaha onamoona wottambi. Omamalelowa afiyavo anamoona eli,
61 awene ahiloga dhahi: “Mulobwana oddu ohiloga, ‘Miyo ddinowodha ogujula mparha wa Mulugu, baddimetxa mwari mwa malabo mararu.’”
62 Nowidhawo, namakutta munddimuwa ovenya vina ohinvuza: “Kuna-wene yologa? Kuloga kuniwa esi dhinumagedhana attu aba?”
63 Mbwenyi Yezu wali womaalene. N’eji, namakutta munddimuwa omwaddela dhahi: “Mwa Mulugu oliwo, ddinouddubeliha, wi onaddele akala weyo oli Kristu, Mwana Mulugu!”
64 Yezu omwakula: “Nyuwo mwanya muhiloga. Nona ddinouwaddelani: Oromana ovanene munele omona Mwana-muttu bagilatile omononi woja wa Mulugu wowodha-wodha vina adhaga mmiraboni dha wirimu.”
65 Namakutta munddimuwa otaya dhabalo dhaye, alogaga: “Iyene omunyimula Mulugu! Ninafunela nni anamoona ena? Moone! Ovano muhiwa dhonyimula dhilogiliye.
66 Nyuwo munonamo dhavi?” Awene omwakula: “Apiwe.”
67 Ena amuturela mara omentoni vina annimbubudda. Oku enayá annimvada omentoni,
68 alogaga: “Kavuhulela, akala oli Kristu. Bani ouvadile?”
69 Pedro wali wogilatene mukintalo; mudhari mmodha wa muyana ofiya vàliye ohiloga dhahi: “Nyuwo vina mwali vamodha na Yezu w’o Galileya!”
70 Mbwenyi iyene okodda vamentoni va otene, alogaga dhahi: “Miyo kaddinziwa enlogiwe.”
71 Muvenyeliye badhowa vamusuwo va kintalo, muyana mwina omona, vina ohiloga dhahi na àlivo: “Mulobwana oddu wali na Yezu Munazareti.”
72 Iyene okodda wili addubelaga dhahi: “Miyo muttu oddo kaddinimuziwa!”
73 Vasogorhova ena àlivo amususela Pedro alogana: “Txibarene weyo oli mmodhavo wawa, vowi, mulogelo wawo onouzinddiyeliha.”
74 Venevo iyene oroma ovigwihedha ntowa, addubelaga: “Mulobwana oddo miyo kaddinimuziwa!” Momaguva mutubi ohunla.
75 Pedro ohubuwela mazu a Yezu awi: “Mutubi ohinonla, weyo onele oddikodda dila ttaru.” Venevo, iyene obudduwavo, odhowa wunla na okubanya onddimuwa.
Manota
^ Obe, “omwettekela murega.”
^ Obe, “masalmo.”
^ Na egregu, “alejiau 12.”
^ Kang’ana Mazu Atapuleliwe.
