Dhilebiwe na Mateu 28:1-20
28 Mvirele Sabuddu, vati vayagá, siku noroma na sumana, Maria Madalena na Maria mwina, adhowa wona wikuttani.*
2 Wahipadduwa ottekenyeya onddimuwa wa mattaka, sabwani anju wa Yehova wahitita wirimu, bafiya wikuttani, bapigiritxa nlugu nafugiwena omavolowelo wa ekuttayá, bagilatela.
3 Ekalelo ya anjuyá yali ninga ozerima wa jayi, dhabalo dhaye dhali dhotxena ngwirho ninga mirabo.
4 Sabwa ya omova ang’aneliyá ahigurumela, bakala ninga akwile.
5 Venevo anjuyá ohawaddela ayanayá: “Kamove, miyo ddiziwa wi nyuwo munimutamela Yezu opiwe vapingirhizini.
6 Iyene kali veneva, vowi ovenyihiwa mukwani, dhahene ninga mwalogeliye. Kadhaunoni moone mburo wattiyiwe iyene.
7 Mugamala mudhowe n’owaguva, mwawaddele anamasunza aye wi iyene ohivenyihiwa mukwani; osogorha ondhowa o Galileya, kuwenewo onamonenyu. Obu bu mpaganyo wadhilena miyo ouwaddelani.”
8 Venevo, ayana abale avenyawo wikuttaniwá, attamaga na wova vina n’ottaba onddimuwa, adhowa wawaddela anamasunza aye.
9 Ayanayá adhowaga, Yezu ohigumana na awene ohalogana dhahi: “Munolejeliwa!” Awene amususela, amukokorela, attidda myeddo dhaye, amuttittimiha.
10 Mmalelani Yezu ohawaddela dhahi: “Kamove! Kadhowani mwawaddele abalaga, adhowe o Galileya wenewo anele oddona.”
11 Ayanayá adhowaga, ang’aneli ena adhowa musidadi, wawaddela anddimuwa a anamakutta dhotene dhipadduwile.
12 Mmalele awene otugumana na anddimuwa a nlogo vina ewananela, ahavaha ang’aneliyá muttengo mwinjene wa kobiri dha parata.
13 Ahawaddela: “Muloge dhahi, ‘Iyo nigonaga anamasunzaye al’odha na mattiyu, beya maningoyá.’
14 Akala Pilato onowiwa esodhá, nyuwo kamuzuzume, iyo ninele oziwa ologa na iyene.”
15 Anyakoddo abale attukula kobiridhá dha parata vina ahira dhahene ninga mwaddeliwani; ottambi obo onovuwavi dhipaddi dhotene dha Judeya ofiyedha ddabuno.
16 Venevo anamasunza 11, ahidhowa o Galileya, vamwangoni vawaddelile Yezu wi agumane.
17 Mmonelani, amukokorela, amuttittimiha; vano enayá annimwaganyedha.
18 Yezu ohasusela, ohawaddela dhahi: “Ddivahiwa owodha wotene, wa wirimu na wa elabo ya vati.
19 Nona, kadhowani mwasunzihe attu a elabo yotene wi akale anamasunza aga, mwabatizaga na nzina na Baba na Mwana na muya wokoddela.
20 Mwasunzihaga ovirihamo dhotedhene dhuwaddelileni* miyo, ziwaní wi miyo ddili na nyuwo masiku otene ofiyedha omagomo wa elabo.”*
Manota
^ Obe, “masiye a aliba okwa anubuweliwa na Mulugu.”
^ Obe, “dhulamulileni.”
^ Kang’ana Mazu Atapuleliwe.
