Dhilebiwe na Mateu 4:1-25
4 Mmalelani, muya wokoddela omuttukulela Yezu mwiddeddereni, mwenemo owehiwa na Ddiabo.
2 Iyene okala malabo 40 mutana na mattiyu ahijaga elo, omamalelowa okaliwa dala.
3 Venevo Munyengetti odha vina omwaddela dhahi: “Akala weyo oli mwana Mulugu, kalamula malugu aba asadduwe akale pawu.”
4 Yezu omwakula: “Elebiwa: ‘Muttu kankalawo na ojavi bahi, mbwenyi onokalawo na mazu andha mwano mwa Yehova.’”
5 Vasogorhova, Ddiabo omuttukulela Yezu o Jeruzalemi, omuweliha mburo wolapa-lapa wa mparha,
6 ohiloga dhahi: “Akala weyo oli mwana Mulugu, kalupela vati, vowi elebiwa: ‘Iyene onele ourumela anju aye,’ vina ‘Awene anele ougapa mmadani mwawa wila nnyalo nawo nihivade nlugu.’”
7 Yezu omwakula: “Elebiwa vina: ‘Kumwehe Yehova Mulugu wawo.’”
8 Vasogorhova Ddiabo omuttukulela vamwangoni wolapa-lapa, omutonyihedha omwene wotene wa mwilaboni na nttittimihona.
9 Vina omwaddela: “Dhotedhene esi ddinele ouvaha ogaddikokorela vina ogaddebedha dila modha.”
10 Venevo Yezu omwakula: “Kaddivenyelevo, Satana wé! Vowi elebiwa: ‘Omwebedhe Yehova Mulugu wawo vina omulabelege iyene bahi.’”
11 Venevo Ddiabo omuttiya, anju a Mulugu adha omukamihedha.
12 Yezu muziweliye wi Joau ofugeliwa, ovenya odhowa o Galileya.
13 Mmaleliye, omwala o Nazareti, odhowa okalaga o Kafarnau nikome na nyaza ya murudda w’o Zebulau na Nafitali,
14 wi akwanihedheye mazu alogile namavuhulela Izaiya, eraga:
15 “Weyo elabo ya Zebulau na Nafitali oli nikome na rampa endhowa o nyaza, kobela yina ya Jordau, Galileya wa malogo!
16 Attu ali mwiddimani ahona txeza enddimuwa, abale ahanna njedhelo n’ovuneya* ahimoneyeliwa txeza.”
17 Oromana mudhidhene obule, Yezu oroma olaleya dhahi: “Karugunutxani murima, vowi Omwene wa wirimu oli vakuvi.”
18 Eddaga nikome na nyaza y’o Galileya, iyene ohawona alobwana eli, wali Simoni onkuweliwa Pedro na mbalaye André; awene atuputxedha milaba dhawa munyaza, sabwani àli anamattadda.
19 Iyene ohawaddela: “Kaddifwareni, miyo ddinouwirani anamattadda a attu.”
20 Mudhidhene obo, awene attiya milaba dhawa, ahinfwara.
21 Adhowagavi, ohawona ena eli, wali Tiago mwana Zebedeu na mbalaye Joau. Awene àli mmwanddiyani na babiwa Zebedeu, asasanyedhaga milaba dhawa, venevo ohakuwela.
22 Momaguva-mwene attiya mwanddiyayá vina amuttiya babiwa, ahinfwara.
23 Iyene ohedda elabo yotene y’o Galileya asunzihaga mmasinagoga mwawa, alaleyaga miselu dhapama dha Omwene vina avulumutxaga viredda dhotene dhottiyana-ttiyana dha nlogo.
24 Ovuwa waye ofiya elabo yotene y’o Síria, otene annimudhelana attu anna viredda dhottiyana-ttiyana, avolowiwe muya dhabure, aliba ejile-jile vina ahawodha wedda, iyene wannavulumutxa.
25 Dhahene, muttitti mwinjene wa attu adhana o Galileya, o Dekápoli, o Jeruzalemi, o Judeya na kobela yina y’o Jordau, anninfwara.
Manota
^ Na egregu, “ali mmuruntini ontota okwa.”
