Dhilebiwe na Mateu 5:1-48
-
DISKURSU YA VAMWANGONI (1-48)
-
Yezu oroma osunziha vamwangoni (1, 2)
-
Dhilobo tanu na nayi dhindhana ohagalala (3-12)
-
Mwinyu na txeza (13-16)
-
Yezu onowakwaniha Nlamulo (17-20)
-
Malago anloga dha osilidhiwa (21-26), ogonihana wonyakuwa (27-30), omwalana (31, 32), oddubela (33-37), wiyihedhana obure (38-42), wakwela amwiddani (43-48)
-
5 Moneliye muttitti, owela vamwangoni, mugilateliye anamasunza aye amususela.
2 Venevo oroma wasunziha, alogaga:
3 “Ohagalala babale anziwa wi anofuna omuziwa Mulugu, vowi Omwene wa wirimu bwawa.
4 “Ohagalala babale anunla, vowi anele opangarhaziwa.
5 “Ohagalala babale anna murima wokurumuwa,* vowi anele okala anya a elabo.
6 “Ohagalala babale anunlela okoseliwa opama,* vowi anele wakwanihedhiwa.
7 “Ohagalala babale aneddiwa ttagaraga, vowi awene vina anele weddeliwa ttagaraga.
8 “Ohagalala babale anna murima wokoddela, vowi anele omona Mulugu.
9 “Ohagalala babale antamela murenddele, vowi anele okuweliwa ana Mulugu.
10 “Ohagalala babale amfwara-fwareliwa wira dholigana, vowi Omwene wa wirimu bwawa.
11 “Ohagalala ddi nyuwo attu agauruwanani, agaufwara-fwarani, agauzivalelani vina agaulogelani dhabure dhotedhene sabwa ya nzina naga.
12 Muhagalale, muttabe vopitta, vowi ottuveliwa wenyu wirimu kunddimuwa-wene, sabwani ahifwara-fwariwa vina anamavuhulela akalilewo nyuwo muhinatti.
13 “Nyuwo muli mwinyu wa elabo, kito akala mwinyuyá onokumuwa, onluga nni? Kunlabela elo-wene ehili orayiliwa, attu baganyigala.
14 “Nyuwo muli txeza ya mwilaboni. Sidadi emagiwe vadhulu va mwango kinviteya.
15 Attu kanttiddiha panti bakunela na nyangasera; ottiya ejo, anttiya vadhulu wi yamoneye otene ali mbamwa.
16 Nyuwo vina kattiyani txeza yenyu emoneye vari va attu, dhawene awene onaga merelo enyu apama, anele omuttittimiha Babinyu oli wirimu.
17 “Kamubuwele wi ddidhele ogomiha Nlamulo na Mizé obe masunziho a Anamavuhulela. Kaddidhele ogomiha; ottiya ejo, ddidhele wakwanihedha.
18 Txibarene, miyo ddinouwaddelani: Masiki elabo na erimu dhigome, kinawodheye ogoma nne ngafuna letra nimodha ning’ono obe epaddi modha ya letra na Nlamulo, dhihinatti wakwanihedheya dhilebiwemo.
19 Nona, onlupa malamulo aba mang’onoyá, àsunziha ena wira yakakene, onele okuweliwa mung’ono Mumweneni wa wirimu. Mbwenyi ole onvirihamo vina àsunziha ena wira yakakene, onele okuweliwa munddimuwa Mumweneni wa wirimu.
20 Miyo ddinouwaddelani, akala oligana wenyu murima kumpitta wa Afarizi na wa anamasunziha magano, kamunavolowe-wene Mumweneni wa wirimu.
21 “Nyuwo muhiwa elogiwe, addeliwaga attu awale: ‘Kumpe muttu, onimpa muttu onoliga muladdu wottukuleliwana otribunali.’
22 Vano miyo ddinouwaddelani: Ole onimukanelavi ntxiga mbalaye, onele ottukuleliwa otribunali; onimulogela mbalaye mazu ompwazana, onottongiwa na Tribunali Enddimuwa. Vina onimulogela mbalaye mazu awi: ‘Taduwa-wé, kunlabela elobwene!’ Oddo ondhowa o Jehena.*
23 “Ogadhowa operheka mvaho wawo vebuwani, venevo wubuwela wi mbalawo okaana yammirimani na weyo,
24 kattiya mvaho wawo osogorho wa ebuwa; orome odhowa mwateyihane, ogamala wiyele operheke mvahoyá.
25 “Ogadhowaga otribunali na muttu ousumelile, orome ologela makaniyá na iyene mudila; enadhe opadduwa iyene wuperheka wa namattonga, namattonga agamala wuperheka wa musupayi, musupayi agamala wufugela mukambura.
26 Ddinouwaddela ebaribariyá, weyo kunabudduwemo ohinatti opitxa kobiri* yawo yotene.
27 “Nyuwo muhiwa elogiwe: ‘Kulupe matelo.’
28 Vano miyo ddinouwaddelani, ole ondidela omwang’ana muyana bafiyedha okaana efunelo y’ogonana, ohiraruwana mmurimani mwaye.
29 Nona, akala ninto nawo n’epaddi yoja ninoukwakwattutxa, kakutxamo orahilele wolapela-wene, vowi japama oyelela yano yawo modha, ehili orahileliwa weyo wotene* mu Jehena.*
30 Akala nlada nawo noja ninoukwakwattutxa, kagwadda orahilele wolapela-wene, vowi japama oyelela yano yawo modha, ehili maningo awo otene ototowela mu Jehena.*
31 “Elogiwa vina: ‘Onimuttiya mwadhiye amvahe njangarha n’omwalana.’
32 Vano miyo ddinouwaddelani, ole onimmwala mwadhiye ehili sabwa ya ogonihana wonyakuwa,* onomutotela muyanayá olupa matelo; vina onimutela muyana omwaliwe onolupa matelo.
33 “Nyuwo muhiwa dhaddeliwe attu awale: ‘Kuddubele s’ewakwaniha, mbwenyi wakwanihe dhimpikireliwe Yehova.’
34 Vano, ddinouwaddelani dhahi: Kamuddubelele elobwene, nne wirimu sabwani kuwenewo oli mpaddo wa Mulugu;
35 nne elabo ya vati, sabwani pansamelihiye manyalo aye; nne Jeruzalemi oli sidadi ya Mwene munddimuwa.
36 Kuddubelele musorho wawo, vowi kunwodha otxeniha nne oribiha ngafuna-wene nttitti nimodha.
37 Wakula wenyu okalege ‘Ndde’ akala pumwenemo, ‘Nne’ akala munokodda; empitta ejuwene, ja mwiddani.
38 “Muhiwa elogiwe: ‘Ontwa ninto na mukwaye, naye vina nitwiwe; onkutxa nino na mukwaye naye vina nikutxiwe.’
39 Vano ddinouwaddelani dhahi: Kamupambihane na ole onukoselani yabure, mbwenyi ole onuvada nigugu na epaddi yoja, onvahe nigugu nina.
40 Akala muttu onouttukulela otribunali wi attiddele dhabalo dhawo, onvahe vina mukumi wawo;
41 akala muttu wa ettomo onoumagelela onvelelana muttorho kilometuru modha, weyo onvelelena kilometuru bili.
42 Onukumbirha elobo, onvahe. Kumuttawe ontamela wuboleya.*
43 “Muhiwa elogiwe: ‘Omukwele muttu mukwawo, omwidde ole onuwidda.’
44 Vano, miyo ddinouwaddelani: Mwakwelegevi anuwiddani vina mwalobelelege anufwara-fwarani,
45 mugakosa dhawene munele woniha wi muli ana a Babinyu oli wirimu, vowi iyene onowapattutxela nzuwa attu apama na abure. Vina onowarubwihedha muzogwe attu oligana murima na ohiligana.
46 Mugaakwelaga abale anukwelani bahi, mumpurelamo nni? Kahiyo ejuwene enkosa anamalogosa musoko?
47 Nyuwo mugaalejelaga abalinyuvi, munapitta dhavi attu ena? Kahiyo ejuwene enkosa attu a mwilaboni?
48 Nona, kakalani oligana,* vowi Babinyu wa wirimu ddoligana.
Manota
^ Obe, “òfwasa murima.”
^ Na egregu, “anna dala vina apiwe nttona n’okoseluwa opama.”
^ Wali mburo warahileliwa lixu, otakulu wa Jeruzalemi. Kang’ana Mazu Atapuleliwe.
^ Na egregu, “leptoni womariha.”
^ Na egregu, “maningo awo otene.”
^ Kang’ana Mazu Atapuleliwe.
^ Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Kuloga, oboleya ohijedhelaga wakela na juru.
^ Obe, “owakwana.”
