Dhilebiwe na Mateu 6:1-34
6 “Porhe-porhe muhire-wene dhapama vanamwinjini na efunelo ya osibiwa n’attu; mugakosa dhawene Babinyu oli wirimu kanauttuveni elo.
2 Ogamvaha elobo muyelegi, kuvuwihe* ninga munkosela agwarhagwambi agakala mmasinagoga vina mudila, wi attittimihiwe na attu. Ddinouwaddelani ebaribari: Awene amala wakela enafwanyelela.*
3 Weyo ogamvaha elobo muyelegi, kuttiye wi nlada nawo n’emara niziwe enkosa nlada nawo noja,
4 wila mvaho wawo okale woviteya. Dhawene Babi wawo onuwang’ana muviteyani onele wuttuva.
5 “Vina mugalobelaga kamwire ninga enkosa agwarhagwambi, sabwani awene anoziveliwa olobela owimelene mmasinagoga na mmarampani wi oniwe na attu. Ddinouwaddelani ebaribari: awene amala wakela enafwanyelela.
6 Weyo ogafunaga olobela, ovolowe mba mwawo, ogamala ofuga musuwo, omulobelele Babi wawo ohinoneya. Dhawene Babi wawo onuwang’ana muviteyani onele wuttuva.
7 Mugalobelaga kamwiyelelege mazu akakene ninga munkosela attu a malogo, vowi awene anubuwela wi anele ovuruwaniwa sabwa ya ologa mazu menjene.
8 Nyuwo kamwatagihe, vowi Babinyu onoziwa enfunenyu, muhinatti-wene omukumbirha.
9 “Mulobelege dhahi:
“‘Baba wehu muli wirimu, nzina nenyu nikoddelihiwe.*
10 Omwene wenyu odhe. Ofuna wenyu okosiwege vati apano ninga wirimu.
11 Munivahe oja wa siku nttino;
12 munilevelele dhottega* dhehu, dhahene ninga munalevelela iyo abale annittegela.*
13 Vina kamunittiye ogwela munyengetteyani, munirabelihe mwiddani.’*
14 “Nyuwo mugaalevelela attu dhottega dhawa, Babinyu wa wirimu onele oulevelelani vina.
15 Vano, mugakodda walevelela attu dhottega dhawa, Babinyu vina kanauleveleleni.
16 “Nyuwo mugattuga, kamukale ninga agwarhagwambi ankala okubanyene; awene anosaddula kove yawa wila attu one wi attuga. Ddinouwaddelani ebaribari: Awene amala wakela enafwanyelela.
17 Mbwenyi weyo ogattuga, osuwe omentoni vina ovisigihe makura mmusorhoni,
18 wi attu ahiziwe wila ottuga, aziwe Babi wawo bahi. Venevo Babi wawo onona dhoviteya onele wuttuva.
19 “Muttiye opigela mafumo* mwilaboni mpuno, muli oyetxe na mukwiti dhinnonga vina muli ambava aniya, anttuttamo.
20 Ottiya ejo, nyuwo kapigelani mafumo enyu wirimu, ohili oyetxe nne mukwiti dhinnonga vina ohinfiya ambava aniya, anttuttawo.
21 Sabwani vankala nifumo nawo, pankala murima wawo.
22 “Ninto panti ya maningo. Akala ninto nawo ninomoneya pama, maningo awo otene anokaana txeza.*
23 Mbwenyi, akala ninto nawo ttabure,* maningo awo otene anokaana eddima. Akala txeza yawo eddima; eddimayá ehuttabwela!
24 “Kawo onwodha walabela anabuya eli; agamukwela mmodha, onomwidda mwina, obe agaziveliwa na mmodha, onompwaza mwina. Nona kinwodheya nyuwo omulabela Mulugu vina olabela Dhorela.
25 “Apa ddinouwaddelani dhahi: Kamuzuzumeletxe egumi* yenyu mulogaga, ninaje nni? Ninamwe nni? Obe na maningo enyu mulogaga, ninabale nni? Ngani egumi yenyu kimpitta oja? Kito maningo enyu kampitta dhabalo?
26 Kafwaseyelani wang’ana balame dhinvava wirimu, kadhinala, kadhinsinanga nne kadhinkoya dhoja vanddarani; bilivi dhawene Babinyu wa wirimu ddinsapela. Koddi nyuwo na balame eso, onetxa ttima kahiyo nyuwo?
27 Bani mwa nyuwo onzuzumela egumi yaye, bafiyedha wenjedha ngafuna-wene vang’onovi okalawo waye?
28 Mundhugudheyelani na dh’owabala? Kasunzani na munuwelo wa folori dha mutakwani; olaba, kadhinlaba, osona, kadhinsona;
29 vano, nne Salomau munttittimihoni mwaye wabalaví dhokoddela, kafiyedhile ofwanya okoddela wa foloridhá.
30 Akala Mulugu onokoddeliha dhahene folori dha mutakwani dhinunuwa ddabuno, mangwana dhiponyedhiwa vamottoni, kanauwabaliheni vopitta nyuwo, attu oyeva nroromelo?
31 Nona, kamudhugudheye mulogaga, ‘Ninaje nni?’ obe ‘Ninamwe nni?’ obe ‘Ninabale nni?’
32 Vowi dhotedhene esi sinzuzumela attu a malogo. Babinyu wa wirimu onoziwa wi nyuwo munofuna dhilobo esi dhotedhene.
33 “Mudidele otamela voroma Omwene na wira ofuna wa Mulugu, vina dhilobo eso dhina dhotedhene munele wenjedhedhiwa.
34 Nona, txipo kamudhugudheyele dha mangwana, vowi siku na mangwana ninodhana dhorutxa dhawa. Siku-siku nikaana dhozuzumiha dhawa.
Manota
^ Obe, “kumobe parhaza.”
^ Obe, “amala ottuviwa.”
^ Obe, “noniwege ninga notxena.”
^ Na egregu, “mangawu.”
^ Na egregu, “anna mangawu na iyo.”
^ Obe, “Ddiabo.”
^ Obe, “dhorela.”
^ Obe, “anodhala txeza.”
^ Na egregu, “ttotakala; ttanrima.”
^ Obe, “maningo.”
