Dhilebiwe na Mateu 9:1-38
9 Mmaleliye, owela mmwanddiyani, ohabuwela kobela yina, odhowa sidadi ebaliwiye.
2 Mfiyedhiye, adhana vàliye muttu woragala wàginantihiwe vamakani. Yezu onaga nroromelo nawa, omwaddela dhahi muragaliyá: “Mwanaga, kaliba murima! Dhottega dhawo dhileveleliwa.”
3 Anamasunziha magano ali venevo onaga esidhá, ahiloga oka-oka; “Muttu oddu ononveyiha Mulugu.”
4 Yezu aziwaga dhobuwelani, ohiloga: “Nyuwo munubuwelela nni dhilobo dhabure mmirimani mwenyu?
5 Ninga motagiha, enrutxa ologa jivi: ‘Dhottega dhawo dhileveleliwa’ obe: ‘Kavenya vina kedda’?
6 Vano wi muziwe yawi Mwana-muttu ovahiwa owodha wa olevelela dhottega velaboni ya vati—” venevo iyene omwaddela muragaliyá: “Kavenya ottukule maka awo odhowe vatakulu.”
7 Iyene ovenya, odhowa vatakulu.
8 Muttitti wa attu monelani esidhá, ahittiddiwa wova vina amuttittimiha Mulugu, sabwa ya wavaha attu owodha.
9 Mmalelani, Yezu ovenya, adhowaga, omona muttu dhahi wakuweliwa Mateu, wagilatile vapitxiwa musoko, venevo omwaddela: “Kakala namafwara waga.” Iyene ovenya, ohinfwara.
10 Mudhidhi mwina, Yezu ajaga* vatakulu va Mateu, afiyavo anamapitxiha musoko enjene na attegi vina aroma oja* na Iyene vamodha na anamasunza aye.
11 Afarizi onaga esidhá ahavuza anamasunza aye: “Namasunziha wenyu onjela nni na anamapitxiha musoko vina na attegi?”
12 Yezu mwiwaliye, ohiloga: “Attu ali agumi kanimutamela mediku, mbwenyi animutamela babale ali aredda.
13 Kadhowani mwasunze entapulela mazu aba: ‘Ddinfuna ttagaraga, ottiya mukutto.’ Nona, miyo kaddidhele wakuwela aligani, ddidhele watamela attegi.”
14 Vasogorhova, anamasunza a Joau amususela, ahinvuza: “Iyo vamodha na Afarizi ninottuga, kito anamasunza enyu ankoddela nni ottuga?”
15 Yezu ohawakula: “Koddi amarho a muteli* akana mwaha wokubanya oku muteliyá bali na awene? Mbwenyi, anele ofiya masiku ahinakale muteliyá na awene, venevo panattugani.
16 Kawo ongwaddawo guwo eswa, batxaparina guwo yawale, sabwani guwo eswa esoneliwewo enele oweta yawale, otayeyawa buttabwa.
17 Nne kawo onika vinyu eswa, mmabudduni awale asasanyiwe na ttebe. Egakosiwa dhawene, mabudduyá anotayeya, vinyuyá enokuttuwa, ngamala mabudduyá onongeya. Nona vinyu eswa enikiwa mmabudduni maswa, dhawene dhotene dhinokoyeyá.”
18 Yezu alogagavi esidhá, munddimuwa dhahi omususela, omukokorela, ohilogana: “Eh Nabuya, mwanaga wa mwana-muyana onfuna okwa, ddinoukumbirhani, mudhe mmutapulele nlada, akalewo.”
19 Yezu ovenya ohinfwara, vamodha na anamasunza aye.
20 Venevo muyana dhahi watabuwa na eredda y’obudduwa nikami mwari mwa vyaka 12, ohimususela okotti, ohittidda yabalo yaye.
21 Iyene wanloga mmurimani mwaye: “Koddiginya yabalo yaye bahi, ddigahivulumuwa.”
22 Yezu ozugunuwa, mmoneliye ohiloga: “Mwanaga, kaliba murima! Nroromelo nawo niuvulumutxa.” Mudhidhene obo, muyanayá ovulumuwa.
23 Mfiyedhiye vatakulu va munddimuwayá wa musinagoga, ohafwanya attu ebaga jibo dha vokwani,* ena onlaga,
24 Yezu ohiloga: “Kavenyanivo, vowi mwana-muyanayá kakwile, onogona bahi.” N’eji, aroma omuteya, ampwazaga.
25 Mmalele muttitti wa attu obudduwela otakulu, iyene ovolowa ohittidda nlada na marafulayá, venevo marafulayá ohivenya.
26 Miseludhá dhivuwa mwilaboni mpule mwetemwene.
27 Yezu abudduwaga vatakulu apale, aliba ohona eli animfwara akuwaga: “Mwana Davidi, muneddele ttagaraga.”
28 Mvoloweliye mba, aliba ohonayá ahinfwara, Yezu ohavuza: “Nyuwo munororomela wi miyo ddinowodha okosa ejoyá?” Awene ahakula: “Ndde Nabuya.”
29 Iyene oddiginya mento awa, alogaga: “Yireye ninga munroromela nyuwo.”
30 Nowidhawo mento awa afuguwa, aroma wona. Yezu ohakokomeza, eraga: “Porhe-porhe, kammwaddele muttu.”
31 Mbwenyi mvenyelevo awene, ahivuwiha mwilaboni mpule mwetemwene, dhotedhene dhiriliye.
32 Awene adhowaga, afiyavo attu amudhilena mulobwana wahaloga, wavolowiwe muya wabure;
33 muttamagihedhiwe muya obule wabure, muliba ohilogayá oroma ologa. Venevo muttitti walivo otikina, ologaga: “Mw’izrayel ejiyá kinereyagamo.”
34 Mbwenyi Afarizi anloga: “Iyene onwodha ottamagiha muya dhabure na guru dha mulamuleli wa adomonyo.”
35 Yezu oroma wedda sidadi na mirudda dhotene, asunzihaga mmasinagoga mwawa, alaleyaga muttaka wapama wa Omwene vina avulumutxaga viredda dhotedhene dhottiyana-ttiyana.
36 Onaga muttitti wa attu, ohaweddela ttagaraga sabwani edda balala-balala, atukumeliwaga oku-n’oku ninga mabila ahinna mukumbuzi.
37 Iyene ohawaddela dhahi anamasunza aye: “Txibarene, mabasa a osinanga ahinjiva, anamalabayá bayevile.
38 Nona, mmulobe Mwinya wa munddayá wi àrume anamalaba ena mmunddani mwaye.”
