Merelo a Arumiwi 1:1-26
1 Wokweleya waga Teófilo, munivuruni naga noroma, ddihilebamo dhotedhene dhiromile Yezu okosa na dhisunzihiliye
2 ofiyedha siku nittukuleliwiye odhulu, mmaleliye wavaha malago arumiwi aye àsakuliliye na owodha wa muya wokoddela.
3 Mmaleliye otabuwa, ohawoniha dila dhinjidhene vizinddiyelo dh’ohiruneya dhawi iyeneyá okalawo. Awene amona mwa malabo 40, vina ohalaleyela Omwene wa Mulugu.
4 Yezu vatugumaniliye na arumiwi aye, ohawaddela: “Kamubudduwemo mu Jeruzalemi, mukalevi mwenemo mujedhelaga epikirhele Baba, ninga muwaddeleni miyo.
5 Txibarene, Joau oubatizileni na manje, mbwenyi agavira malabo mang’onovi nyuwo munele obatiziwa na muya wokoddela.”
6 Dhahene mutugumanelani, arumiwiyá ahinvuza: “Nabuya, mudhidhi onfunenyu ovenyihedha omwene wa Izrayel bubwene?”
7 Iyene ohawaddela dhahi: “Baba wa wirimu ddinna owodha wa opimelela mudhidhi na masaka a esile dhinfuniye okosa, vano kahiyo yenyu oziwa mudhidhi obo.
8 Mbwenyi muya wokoddela ogautitelani munele wakela owodha vina munele okala anamoona aga o Jeruzalemi, mu Judeya mwetemwene, o Samariya ofiyedha okomoni wa elabo.”
9 Mmaleliye ologa eso, oku arumiwi amwang’anagavi, iyene ottukuleliwa odhulu vina okuneliwa na murabo, venevo attiya omona.
10 Oku arumiwiyá ang’anagavi odhulu mudhidhi wadhowiye, momaguva-mwene afiyavo alobwana eli abalile guwo dhotxena
11 vina ahiloga: “Nyuwo alobwana o Galileya, mwimeleleni venevo mwang’anaga odhulu? Yezu oddo wali na nyuwo, vano attukuleliwa odhulu, onadhe na ekalelo yakakene emonilenyuna adhowaga odhulu.”
12 Awene avenya Omwangoni wa Olivera, oli vakuvi na Jeruzalemi vina ahiyelela o Jeruzalemi, olapelanawá wali wa waddamela kilometuru modha.*
13 Mfiyedhani ahiwela sala ya odhulu wenewo wakalani ninga aleddo, walivo ddi Pedro na Joau, Tiago na André, Filipi na Tomé, Bartolomeu na Mateu, Tiago mwana Alfeu na Simoni muliba ntidi vina Juda mwana Tiago.
14 Awene ahiwananela odidela olobela vamodha na ayana ena, otaganyiha na Maria mayi wa Yezu vina na abalaye.
15 Masiku abale ahitugumana attu muttengo wawakwana 120, venevo Pedro ovenya vari va abali vina ohiloga:
16 “Alobwanani, abali, Davidi akamihedhiwaga na muya wokoddela wahittaga ologa nivuhulo mwaha wa Juda vina yanfuneya wi nivuhulona ntto nakwanihedheye, Juda oddo wali musogorheli wa abale ammagile Yezu.
17 Iyene wali mmodhavo wehu wasakuleliwe okosa mabasa akakene anna iyo.
18 (Mulobwana oddo, ohigula mundda na kobiri yapitxeliwiye sabwa ya mabasa otakala akosiliye, ogwela vati na musorho, erugulu yaye etayeya vina miribo dhaye dhibudduwela otakulu.
19 Attu otene a mu Jeruzalemi ahiziwa nipadduwo ntti, nona mundda obule okuweliwa Hakeldamá, na elogelo yawa entapulela “Mundda wa Nikami.”)
20 Vowi ehilebiwa munivuruni na Masalmo: ‘Vatakulu vaye vatolowe, vahikaliwege-wene’ vina ‘ehilebiwa wi muttu mwina attomeliwe mabasa aye a osogorhela.’
21 Nona jofuneya wi mulobwana mmodha mwa abale anivelela, mudhidhi wotene okosile Nabuya Yezu mabasa aye vari vehu,
22 oromana siku nibatiziwiye na Joau ofiyedha siku nittukuliwiye vari vehu, adhowiwana odhulu, akale munamoona vamodha na iyo, a ovenyihiwa waye mukwani.”
23 Dhahene ahasakula alobwana eli, Jozé wakuweliwa Barsaba waromoliwa vina Justu, na Matiya.
24 Mmalelani alobela, alogaga: “Eh Yehova, nyuwo munziwa mirima dha attu otene, kamutonyeni bani omusakulenyu mwa alobwana aba eli
25 wi àkele mabasa aba vina akale murumiwi, sabwani Juda ottiya mabasa aba vina odhowa mburo waye.”
26 Awene atamela omuziwa na gari bani osakuliwe mwa alobwana abale eli, gariyá emugwelile Matiya, venevo iyene okala munikuruni mwa arumiwi 11.*
Manota
^ Na egregu, “oleddo wa Sabuddu. Wali olapelana wa dila warumelihiwa muyuda wedda siku na Sabuddu.”
^ Obe, “oroma woniwa dhahene ninga moniwa arumiwi 11.”
