Merelo a Arumiwi 10:1-48
10 O Sezareya wahikalawo mulobwana dhahi wakuweliwa Kornéliyu, iyene wali munddimuwa* wa anyakoddo a nikuru n’o Itália.*
2 Iyene vamodha na otene a ntakulu naye annimova Mulugu, wannakamihedha ayelegi* a nlogo vina wandidela omulobelela Mulugu.
3 Mudhidhi wa wora 15* iyene omona murohani anju wa Mulugu omwaddamelile, alogaga: “Kornéliyu!”
4 Kornéliyu odidela omwang’ana wowovene vina ohinvuza: “Txini Nabuya?” Iyene omwakula dhahi: “Malobelo awo na nikamihedho ninavahiwe ayelegi dhihinfiyedha Mulugu, iyene onowubuwela.
5 Ovano kàrume alobwana adhowe o Jope, amudhena mulobwana dhahi onkuweliwa Simoni, onziwiwa na nzina na Pedro.
6 Mulobwana oddo onkala na Simoni, muttu onlaba na ttebe nyumbaye eli nikome na bara”
7 Mudhoweli anju ole walogiyena, Kornéliyu ohakuwela adhari aye eli na munyakoddo mmodha wamova Mulugu wa nikuru na akamihedhi aye,
8 ohawaddelelamo dhotene dhapadduwile vina oharuma o Jope.
9 Mmagwananimwa awene akosaga oleddo vina addamelaga sidadiyá, Pedro owela vadhulu va nyumba wi alobele, yali mudhidhi wa wora 12.*
10 mbwenyi wahipiwa dala vina wanfuna oja. Oku dhojadhá dhisasanyedhiwaga iyene okala ninga onoroha,
11 murohanimwa ohona erimu jifuguwile vina ohona elobo yaligana na lensori ninddimuwa na linyu, nititelaga vati nattiddeliwe dhipaddi dhonayi;
12 valensoriniva vahikala dhinama dhotene dha vati dha myeddo minayi, dhonyongottowa vina balame dha wirimu.
13 Nowidhawo nihiweya lizu naloga dhahi: “Pedro, kavenya, ope vina oje!”
14 Venevo Pedro ohakula dhahi: “Nabuya, kaddinaje nne vang’onovi, sabwani kaddinekaga mwano-mwaga dhilobo dhokwaruliha dhinkoddihiwa mmalamuloni.”
15 Lizuna niloga dila yanawili: “Kukuwele dhokwaruliha esile dhimalile okoddelihiwa na Mulugu.”
16 Ejoyá epadduwa dila yanoraru, momaguva-mwene lensorina nihifunyiwa, nihiyihedhiwa wirimu.
17 Pedro wali wozuzumene atamelaga oziwa yatapulela yoroha ejile yakaniliye; mudhidhene obo alobwana abale àrumiwe na Kornéliyu ahivuzela vatakulu va Simoni vina ahimela vamusuwo.
18 Awene amukuwela muttu mmodha wa vatakuluva vina avuza akala Simoni waziwiwa na nzina na Pedro wakala venevo.
19 Pedro obuwelagavi yorohayá, muya wokoddela omwaddela: “Kang’ana! Akalawo alobwana araru anutamela.
20 Nona kavenya, odhowe vamodha na awene, kukodde sabwani ddi miyo warumile.”
21 Venevo Pedro otita odhowa ogumana na awene vina ohiloga: “Ddili veneva, ddi miyo onimutamelinyu. Mudheleni okuno?”
22 Amwaddela: “Kornéliyu mwimeleli wa anyakoddo, muttu woligana murima vina onimova Mulugu, odduwene onlogiwa pama na nlogo notene na Ayuda; ohakela malago a Mulugu avahiweye na anju wi aukuweleleni vatakulu vaye wila ewe muselu onfunenyu omwaddela.”
23 Dhahene Pedro ohawakela vina ohavaha mburo wokala.
Mmangwananimwá ovenya vina odhowa na awene, abali ena o Jope ahinvelela.
24 Mvirele siku nimodha Pedro ofiya o Sezareya, Kornéliyu wela wajedhela; iyene wahatugumaniha amudhaye na akwaye a vamurimani.
25 Mvoloweli Pedro, Kornéliyu ohinfwarela, okokora osogorho waye vina omuttittimiha.
26 Mbwenyi Pedro ohinvenyiha alogaga: “Kavenya, miyo vina ddili muttu ninga weyo.”
27 Alogagavi na iyene, Pedro ohivolowa mba vina ohafwanya attu enjene atugumanile.
28 Iyene ohawaddela: “Nyuwo munoziwa pama wi enokoddihiwa Ayuda okala vamodha obe omwaddamela muttu wa nlogo nina, vano Mulugu odditonyihedha wi kaddinfwanyela omutanya muttu obe omukuwela mukwaruli.
29 Nona, mukuweleliwemi ddihidha, kaddikoddile. Ovano ddinouvuzani, muddikuwelihedhe nni?”
30 Kornéliyu ohakula: “Malabo manayi mundduni miyo ddela olobela vatakulu vaga mudhidhi ninga obwene wa wora 15,* venevo ddimona mulobwana ottanyuwile osogorho waga na guwo dhong’animela.
31 Iyene ohiloga: ‘Kornéliyu, nlobelo nawo nivuruwaniwa vina Mulugu ohubuwela nikamihedho ninavahiwe ayelegi.
32 Ovano, kamurume muttu adhowe o Jope amukuwele Simoni onziwiwa na nzina na Pedro. Mulobwana oddo onkala va Simoni muttu onlaba na ttebe, nyumba yaye eli nikome na bara.’
33 Ddihukuwelihani momaguva, vano nyuwo mukosa pama odha okuno. Ovano notene nili veneva vamentoni va Mulugu wi niwe muselu wurumilenina Yehova wi munaddele.”
34 Nowidhawo Pedro oroma ologa, eraga: “Ovano ddihinonelamo-wene wi Mulugu kanimuttiyaniha muttu,
35 mbwenyi mwa malogo otene, iyene onomurumela ole onimova vina onkosa eli yapama.
36 Iyene oharumela nzu naye ana Izrayel, àziwihaga miselu dhapama dha murenddele mwa Yezu Kristu—Yezu oddo ddi Nabuya wa otene.
37 Nyuwo munoziwa makani alogiwetxa mu Judeya mwetemwene, ovenyana o Galileya, mvirele obatizo walaleyile Joau:
38 Walogiwetxa ddi Yezu w’o Nazareti, vowi Mulugu omuttikittela na muya wokoddela vina ohinvaha owodha, iyene ohedda mirudda dhotedhene akosaga opama vina àvulumutxaga otene àsegedhiwe na Ddiabo sabwani Mulugu wali na iyene.
39 Vina iyo nili anamoona a dhilobo dhotedhene dhikosiliye mwilaboni y’o Judeya na o Jeruzalemi; mbwenyi awene ahimpa amukomelaga vapingirhizini.*
40 Mulugu, ohinvenyiha siku nanoraru vina omuttiya wi oniwe,
41 koniwe na attu otene a nlogo, mbwenyi amonile ba anamoona àttomile Mulugu mutanene; ddi iyo ojile vina omwile na iyene mmaleliye ovenyihiwa mukwani.
42 Iyene vina oniruma wi nalaleyele nlogo vina navahe onamoona wowakwana wila Yezu ottomiwe na Mulugu wi akale namattonga wa aliwo na akwile.
43 Dduddwene onimuloga anamavuhulela otene, avahaga onamoona wi ole onimuroromela onoleveleliwa dhoddawa na nzina naye.”
44 Oku Pedro alogagavi esidhá, muya wokoddela ohatitela otene avuruwana mazu a Mulugu.
45 Aroromeli otxetteliwa adhile vamodha na Pedro atikina sabwani mvaho* wa muya wokoddela wela ovahiwa attu ahali Ayuda.
46 Sabwani annawiwa alogaga dhilogelo dhottiyana-ttiyana vina anvuwihaga Mulugu. Nowidhawo Pedro ohiloga:
47 “Attu aba ahakela muya wokoddela dhahene ninga mwakelile iyo, kito okalawo muttu onfuna wakoddiha obatiziwa na manje?”
48 Venevo Pedro ohiruma wi abatiziwe na nzina na Yezu Kristu. Awene amukumbirha wi akalevi vamodha mwari mwa malabo mang’onovi.
Manota
^ Obe, “munddimuwa wa anyakoddo 100.”
^ Obe, “nikuru na anyakoddo o Roma nanna anyakoddo 600.”
^ Obe, “wankosa mivaho dha ttagaraga.”
^ Na egregu, “wora yanotanu na nayi [nzuwa banimalile opattuwa].”
^ Na egregu, “wora yanotanu na modha [nzuwa banimalile opattuwa].”
^ Na egregu, “wora yanotanu na nayi [nzuwa banimalile opattuwa].”
^ Obe, “vamurini.”
^ Obe, “mvaho wa mahala.”
