Merelo a Arumiwi 16:1-40
16 Venevo ofiya o Derbe na o Listra, wenewo wahikalawo namasunza dhahi wakuweliwa Timóteo, maye wali muyana wa Muyuda wali namafwara, babe wali Mugregu.
2 Abali a o Listra na a o Ikónio annimuloga pama.
3 Paulo wanfuna omuttukula Timóteo wi eddegena muleddoni mwaye, venevo omutxetteliha mwaha wa Ayuda a mburo obule sabwani otene anziwa wi Babe wali Mugregu.
4 Sidadi dhotene dhavirani annawaddela abaliyámo dhalaganele arumiwi na anddimuwa àli o Jeruzalemi, àkokomezaga ovirihamo malagoyá.
5 Dhahene milogodhá dhanlibihiwa munroromeloni vina dhannunuwa siku-na-siku.
6 Awene akosa oleddo adhowaga o Fríjia na murudda w’o Galásia, sabwani muya wokoddela wahakoddiha olaleya nzu na Mulugu provinsia ya Ázia.
7 Ottiya ejo, mfiyedhani o Mízia, atamela odhowa o Bitínia, mbwenyi muya* wa Yezu ohakoddiha.
8 Nona, akwaranya o Mízia adhowa o Tróade.
9 Mmattiyunimwá, murohani Paulo omona mulobwana mmodha mukadda Masedónia, bemelile amukumbirhaga dhahi: “Kadhaunoni o Masedónia, munikamihedhe.”
10 Mvirele yoroha eji ya Paulo, nitamela odhowa o Masedónia, sabwani nahinonelamo wi Mulugu wahinikuwelela odhowa walaleyela miselu dhapama.
11 Dhahene niwela mmwanddiyani o Tróade nihinyalela o Samotrásia, mmangwananimwá nihidhowa o Neápoli;
12 mbudduwelihu wenewo, nidhowa o Filipo sidadi ya Roma,* eji yali sidadi enddimuwa y’o Masedónia. Nikala wenewo malabo mang’onovi.
13 Siku na Sabuddu nibudduwela musuwo munddimuwa wa sidadi, nihidhowa nikome na mwinje sabwani nobuwela wi wenewo wahikala mburo wolobela vina nigilati, nihiroma ologa na ayana atugumanilewo.
14 Wahikalavo muyana dhahi wakuweliwa Lídia, mukadda Tiatira waguliha guwo dha muttengo munddimuwa vina wamwebedha Mulugu; iyene wela ovuruwana, venevo Yehova ofugula murima waye wi ewelelemo dhaloga Paulo.
15 Mmaleliye obatiziwa vamodha na otene a vatakulu vaye, iyene okumbirha dhahi: “Akala munowona wi miyo ddili wororomeleya na Yehova mudhe murome okala vatakulu vaga.” Onikalela ntidi odhowa.
16 Siku dhahi nidhowaga mburo wolobela, nifwareliwa na mudhari dhahi wa muyana wavolowiwe domonyo wamuwodhiha ologa dha musogorho. Iyene wannaranjuliha venjene anabuyaye mwaha wa ologa dha musogorho.
17 Namwali oddu wanninfwara Paulo vamodha na iyoyá akuwaga: “Alobwana aba adhari a Mulugu Namadhulu-dhulu, anulaleyelani dila ya ovuniwana.”
18 Iyene okosa ejuwene mwa malabo menjene, omamalelowa Paulo olemana wiwa esodhá, omuzugunuwela vina ohiloga na muyayá: “Ddinouwaddela, na nzina na Yezu Kristu, kabudduwamo, omuttiye;” mudhidhene obule muyayá obudduwamo.
19 Anabuya a mudhari ole wa muyana monelani wi kawodha vina oranjula kobiri, amuttidda Paulo na Sila ahaburulela mburo watugumana anamwinji* vina ahaperhekela anamattonga.
20 Ahattukulela wa Alamuleli a sidadi vina aloga: “Alobwana aba anozuzumiha sidadi yehu. Abayá Ayuda,
21 vina ansunziha yeddelo ehinrumelihiwa iyo weddana, sabwani nili akadda Roma.”
22 Muttitti wotene ohasadduwela, venevo alamuleli a sidadiyá ahawakiha guwo dhawa vina ahiruma wi abubuddiwe na miri.
23 Mmalelani wabubudda venjene, ahavokela mukambura vina amwaddela mwang’aneliyá wi àfugele awang’anelaga pama; ahattiye ottawa.
24 Mwang’aneli wa kambura mwakeleliye nlamulo ntti, ohattukula, ohawika okomoni wa kambura, mmaleliye omagelela myeddo dhawa na tabwa.
25 Mbwenyi vari va mattiyu, Paulo na Sila anlobela vina annimuttittimiha Mulugu na jibo, afugeliwi ena annawiwa.
26 Morurumutxa-mwene ohipadduwa ottekenyeya onddimuwa wa mattaka, ofiyedha omuttekenya alisersi wotene wa kambura, mudhidhene obo, misuwo dhotedhene dhihifuguwa, kurenti dhamagiwena awene dhikanganuwa woka.
27 Mvenyeli mwang’aneli wa mukambura, ona wi misuwodhá dhimala ofuguwa, ovula supadda naye afunaga ovipa vowi wobuwela wi afugeliwiyá attawa.
28 Mbwenyi Paulo okuwa na lizu noliba: “Kuvipe, iyo notene nili mwenemwa!”
29 Dhahene iyene okumbirha wi adheliwena panti; ovolowa attamagaga vina agurumelaga, okokora osogorho wa Paulo na Sila.
30 Iyene ohattukulela otakulu vina ohavuza: “Ddikose eni wila ddivuniwe?”
31 Awene amwakula: “Omuroromele Nabuya Yezu, onele ovuniwa, weyo na otene a ntakulu nawo.”
32 Awene amulaleyela mazu a Yehova, iyene vamodha na otene a vatakulu vaye.
33 Venevo ohattukula mudhidhene obule wa mattiyu, osuwa vilodda dhawa, mmalelani iyene na otene a vatakulu vaye momaguva abatiziwa.
34 Mwang’aneliyá oddo ohattukulela vatakulu vaye, ohavaha yoja vina iyene vamodha na otene a vatakulu vaye ahagalala mwaha wa omuroromela Mulugu.
35 Muyeli vati alamuleli a sidadiyá aharuma ang’aneli wi aloge dhahi: “Kàtapule alobwana abo.”
36 Mwang’aneli wa mukambura ohimwaddela Paulo mazu aba: “Alamuleli a musidadi aruma wi nyuwo moheli mufuruliwe. Ovano kabudduwani, mudhowe na murenddele.”
37 Mbwenyi Paulo ohawaddela dhahi: “Awene anibubudda vanamwinjini nihiromile ottongiwa, oku iyoyá banili akadda Roma, mmalelani anifugela mukambura ovano anoniruma odhowa moviteyani? Nne-wene, awene anya adhe anittukulele otakulu.”
38 Ang’aneli ahawaddela mazu aba alamuleli a musidadi. Aboyá ahova vaddiddi muziwelani wi alobwana abale àli akadda Roma.
39 Dhawene alamuleliyá adhowa walani, ahakumbirha nlevelelo, mmalelani wattukulela otakulu, ahakumbirha wi abudduwemo musidadimwá.
40 Mbwenyi Paulo na Sila mbudduwelani mukambura, adhowa vatakulu va Lídia, mwafwanyelani abali, ahalibiha, mmalelani adhowa.
Manota
^ Onaddiwana muya wokoddela wavahiwe Yezu na Mulugu.
^ Sidadi yali wolapelana na o Italia; attu a sidadiyá ejo anfwanyela weddihiwa dhahene ninga attu akala o Italia.
^ Obe, “vamusika.”
