Merelo a Arumiwi 17:1-34
17 Paulo na Sila akosa oleddo aviraga o Amfípoli na o Apolónia afiya o Tesalónika wali sinagoga* ya Ayuda.
2 Ninga mwalemeleliye Paulo ovolowamo, ohiloga na awene masabuddu mararu àkamihedhaga ononelamo Malebo,
3 wantapulela vina wannoniha na esile dhalebiwe wi yali yofuneya Kristu otabuwa vina ovenyihiwa mukwani, iyene wanloga: “Oddu ddi Kristu Yezu onulaleyelani miyo.”
4 N’eji, enayavó arumela, avitaganyiha na Paulo vamodha na Sila vina muttitti munddimuwa wa Agregu amwebedha Mulugu akosa yakakene, vamodha na muttengo mwinjene wa ayana a ettomo.
5 Vano Ayuda ahakanela ntxiga; nona ahatugumaniha attu otakala murima edda zeru-zeru mmamisika ofiyedha okala nikuru ninddimuwa na attu, abuwene atatamulile mbigiddi musidadi. Adhowa vatakulu va Jazau, amutamelaga Paulo na Sila wila àburutxele otakulu vina àperhekele muttitti wa attu.
6 Vowi kàfwanyilevo amburula Jazau na abali ena adhowa waperekela alamuleli a musidadimwa akuwaga dhahi: “Alobwana abale antatamuletxa mbigiddi mwilaboni mwetemwene afiya vina okuno,
7 Jazau oddu ohawakela vatakulu vaye ninga aleddo. Attu aba otene anovanya nlamulo na Sézari, alogaga wi okalawo mwene mwina, Yezu.”
8 Alamuleli a musidadi vamodha na attuyá mwiwalani esidhá azuzuma;
9 mmalele Jazau vamodha na ena operheka kobiri yalaganeliwe wi afuruliwe, ahattiya odhowa.
10 Muribeli vati abali amuruma Paulo na Sila odhowa o Bereya, mfiyedhani wenewo avolowa musinagoga* ya Ayuda.
11 Ayuda o Bereya ahikaana efunelo yinjene ya osunza mottiyana na Ayuda o Tesalónika, sabwani ahirumela nzu na Mulugu na murima wotene vina anfwaseyela opepesa malebo masiku otene wi one akala dhewalani dhali dhebaribari.
12 Nona attu awinjiva vamodha na muttengo mwinjene wa ayana a Agregu vina alobwana ena anna ettomo arumela onfwara Yezu.
13 Ayuda akala o Tesalónika muziwelani wi Paulo onolaleya nzu na Mulugu o Bereya, adhowawo watujela attu wi àsadduwele.
14 Venevo momaguva-mwene abaliyá amuruma Paulo o bara, mbwenyi Sila na Timóteo ahala wenewale.
15 Abale anvelela Paulo ahidhowa mpaka o Atena, mmalelani ahiyela na mpaganyo wawi Sila na Timóteo agumane na Paulo momaguva.
16 Oku àjedhelaga o Atena, Paulo wahisilidhiwa venjene moneliye wi musidadimwá mwahidhala dhingamuttu.
17 Dhahene iyene oroma wasunziha Ayuda musinagoga vamodha na attu otene amwebedha Mulugu, vina masiku otene wandhowa mmamisika àsunzihagamo otene afwanyiye.
18 Mbwenyi aziwitxi ena a Filozofiya a nikuru na Epikureu vina Astóiku aroma opambihana na Paulo, ena anloga: “Koddi ddabwareyayá oddu onfuna aloge eni?” Ena aloga: “Onkala ninga onsunziha dha amulugu a elabo yina.” Alogela esuwene sabwani Paulo wanlaleya miselu dhapama mwaha wa Yezu vina mwaha wa ovenyihiwa mukwani.
19 Dhahene amuttidda, amuttukulela o Areópago alogaga: “Karoma onaddelelamo masunzihoyá abo maswa anlogiwe.
20 Sabwani dhinlogiwe iyo kaninewaga vina ninfuna wi ninonelemo dhintapulelani.”
21 Txibarene attu otene o Atena vamodha na anaweddayá akala wenewo, mudhidhi wahattiddani mabasa kakosa elobo yina ehili ologa na wiwa miselu dhiswa.
22 Venevo Paulo ovenya vari va Areópago vina ohiloga:
“Nyuwo akadda Atena ddihona wi munowawova vina munowariha venjene amulugu opitta attu ena.
23 Motagiha, ddeddaga, mwang’anelimi n’ofwaseya dhinebedha nyuwo, ddihifwanya ebuwa modha elebiwe: ‘Ebuwa ya Mulugu Ohinziweya.’ Ovano muziwe; Mulugu oddo onimwebedhenyu muhimuziwaga ddudduwene onulaleyani miyo.
24 Ddi Mulugu oddo ottanddile elabo na dhotene dhilimo, iyene ninga Nabuya wa wirimu na elabo ya vati, kankala mumparhani omagiwe na mada a attu
25 vina kanjedhela okamihedhiwa na attu ninga onjombeliwa, sabwani ddi iyene onnivaha muya onnivumiha, egumi vina na dhilobo dhotedhene.
26 Mwa muttu mmodha bahi Mulugu ohakalihawo attu a malogo otene wi akalege mwilaboni mwetemwene ya vati, vina ohapimelela masaka na mudhidhi wawa wokalawo.
27 Mulugu wireli wi attu amutamele, ampapasele vina anfwanye, masiki Muluguyá ahili wolapelana na muttu ddi muttu wa iyo.
28 Sabwani mwaha wa iyene iyo nikaana egumi, ninowedda vina nihikalawo, dhahene ninga mulogile anamaleba enyu: ‘Iyo vina nili anaye.’
29 “Nona, vowi nili ana a Mulugu, kanubuweleni wila Mulugu oli ninga nladdaniho na woru obe parata peno na nlugu, esuwene dhinubuweliwa vina dhinsasanyiwa na attu.
30 Ebaribari wi wale, Mulugu wannattiya attu okosa esuwene sabwa y’ohiziwa; ovano iyene onowawaddela attu a elabo yotene wi arugunutxe murima.
31 Sabwani iyene opimelela siku ninattongiye elabo yotene na oligana mwa muttu mmodha omuttomiliye, vina iyene ohakuluveliha attu otene mwa onvenyiha muttu oddo mukwani.”
32 Mmwiwalani alogaga mwaha wa ovenyihiwa mukwani wa abale akwile, ena aroma omuteya oku ena anloga dhahi: “Ninele ouwiwa ologaga esidhá mudhidhi mwina.”
33 Venevo Paulo obudduwavo.
34 Enjene avitaganyiha na awene vina arumela onfwara Yezu, mwa abayá wakalavo Dioníziyu wali namattonga wa tribunali ya Areópago vamodha na muyana dhahi wakuweliwa Dámaris vina na attu ena.
