Merelo a Arumiwi 18:1-28
18 Mmalele esodhá, Paulo obudduwa o Atena, ofiya o Korinto.
2 Wenewo ohinfwanya Muyuda mmodha wakuweliwa Ákila, wabaliwe o Ponto, wadhana-wene o Italia vamodha na mwadhiye Prisila, sabwani Kláudio wahilamula wi Ayuda otene akala o Roma abudduwewo. Nona, iyene odhowa wawona,
3 vowi otene anna mabasa akakene, okala vatakulu vawa alabaga na awene, sabwani àli anamasasanya misasa.
4 Masabuddu otene iyene wankosa diskursu* mu sinagoga* vina wannattukulela Ayuda na Agregu orumela miselu dhaye.
5 Sila na Timóteo mbudduwelani o Masedónia, Paulo ovilevela mmabasani a olaleya Nzu na Mulugu, àvahaga onamoona Ayuda vina awonihaga wi Yezu ddi Kristu.
6 Vowi awene annimpambihavi vina annimuruwana, Paulo ohiguma guwo dhaye vina ohalogana: “Akala nyuwo munokwa, miyo kaddinna muladdu wa nikami nenyu, miyo ddili wotxenene, oromana ovanene ddindhowa ddalaleyelege attu a malogo meena.”
7 Iyene obudduwamo* vina odhowa vatakulu va mulobwana dhahi wakuweliwa Tisiyu Justu, wamwebedha Mulugu; nyumba yaye yali waddamana na sinagoga.*
8 Vano Krispo, munddimuwa wa musinagoga* ohirumela onfwara Nabuya vamodha na otene a vatakulu vaye, vina akadda Korinto enjene ewale mazu a Mulugu arumela, vina abatiziwa.
9 Ottiya ejo, Nabuya ohimuttanyuwela Paulo na mattiyu murohani vina ohiloga: “Kuwove, mbwenyi odhowevi olaleyaga, vina kumàle;
10 vowi attu enjene a sidadi ejino anele oddirumela, nona kuwove, kavo onauttidde, aukosela yabure, sabwani ddili na weyo.”
11 Dhahene Paulo okala wenewale mwari mwa yaka modha na myeri mitanu na mmodha, àsunzihaga mazu a Mulugu attu a elabo ejile.
12 Galio bali governador* w’o Akáia, Ayuda ahivitaganyiha, amuttidda Paulo vina amudhowana o tribunali,
13 alogaga: “Mulobwana oddu onowattukulela attu omwebedha Mulugu mottiyana na ejile enruma nlamulo.”
14 Venevo, Paulo afunaga ologa, Galio ohawaddela dhahi Ayuda: “Kowiliwa ejo txibarene yali elobo yabure obe yali ngovi, miyo ddigahikana mwaha wa ouvuruwanani n’ofwaseya.
15 Mbwenyi akala makaniya ba opambihana mwaha wa mazu peno mazina obe nlamulo nenyu, eso dhili na nyuwo. Miyo kaddinfuna okala namattonga wa esodhá.”
16 Venevo ohattamagihamo mutribunali.
17 Mmalelani ahimuttidda Sosteni, mwimeleli wa musinagoga,* aroma ombubudda mu tribunali; mbwenyi Galio kafunile oyamo mmakaninimwa.
18 Paulo mukaleliye wenewale malabo menjene ohapaganya abali, owela mwanddiya odhowa o Asiria aveleliwaga na Ákila vina na Prisila; o Senkreya ogwadda nttitti naye sabwa ya nipikirhelo namukoseliye Mulugu.
19 Mfiyedhani o Éfezo, Paulo omuttiya Ákila na Prisila wenewo, iyene ovolowa musinagoga* baroma wasunziha Ayuda, àkamihedhaga ononelamo Malebo.
20 Masiki vamukumbirilani Paulo wi akale malabo menjene na awene, iyene karumelile
21 mbwenyi ohapaganya alogaga: “Yehova agafuna, ddinele wiyelela okuno dila yina.” Mmaleliye owela mmwanddiyani o Éfezo,
22 odhowa o Sezareya. Wenewo* odhowa olejelawo mulogo, mmaleliye odhowa o Antiokiya.
23 Wavira mudhidhi bali wenewo, mmaleliye, ovenya vina ohedda mirudda dhotene dha Galásia na Fríjia àlibihaga anamasunza a wenewo.
24 Vano o Éfezo ofiyawo muyuda dhahi wakuweliwa Apolo, wabaliwe o Alixandria, iyene wali mulobwana wanna mvaho wa ologa pama vina wahikana ononelamo wowinjiva wa Malebo.
25 Mulobwana oddo wahisunzihiwa dila ya Yehova, vina na nikamihedho na muya wokoddela, iyene wanloga vina wansunziha mwaha wa Yezu, na ebaribari; mbwenyi waziwile obatizo wa Joau bahi.
26 Iyene oroma ologa musinagoga* na oliba murima, vina Prisila na Ákila mmwiwalani, ahimukuwelela vawa-vene ahimutapulelamo mwawakwana-mwene dila ya Mulugu.
27 Ottiya ejo, vowi iyene wafuna adhowe o Akáia, abali ahalebela anamasunza a wenewo akumbirhaga wi amwakele pama. Mufiyedhiye ohakamihedha enjene okala anamasunza a Yezu sabwa ya mahala a Mulugu;
28 iyene na oliba murima, wannoniha vanamwinjini atonyihedhaga dhilebiwe mmaleboni wi Yezu ddi Kristu.
Manota
^ Obe: “wannakamihedha ononelamo Malebo.”
^ Kang’ana Mazu Atapuleliwe.
^ Obe, “ohibudduwa musinagoga.”
^ Kang’ana Mazu Atapuleliwe.
^ Kang’ana Mazu Atapuleliwe.
^ Governador w’o Roma walamulela provinsia modha.
^ Kang’ana Mazu Atapuleliwe.
^ Kang’ana Mazu Atapuleliwe.
^ Enkala ninga o Jeruzalemi.
^ Kang’ana Mazu Atapuleliwe.
