Merelo a Arumiwi 19:1-41
19 Apolo bali o Korinto, Paulo ovira mirudda dha muttemba odhowa o Éfezo. Mufiyedhewo iyene ohafwanyawo anamasunza ena
2 venevo ohavuza: “Muromelinyu omuroromela Yezu, muhakela muya wokoddela?” Awene amwakula: “Txipo, kaninewaga wi okalawo muya wokoddela.”
3 Iyene ohavuza: “Kito mbatiziwe na obatizo wa ani?” Awene amwakulavi: “Na obatizo wa Joau.”
4 Paulo ohiloga: “Obatizo wa Joau wali ezinddiyelo ya otxinuwa, iyene wannawaddela attu wi amuroromele ole agadhile mundduni mwaye, kuloga, Yezu.”
5 Mmalelani wiwa esodhá, abatiziwa na nzina na Nabuya Yezu.
6 Paulo mwatapuleliye mada, muya wokoddela ohatitela, awene aroma ologa vilogelo dhottiyana-ttiyana vina aroma ovuhulela.
7 Otene ali alobwana 12.
8 Mwari mwa myeri miraru, Paulo wandhowa musinagoga,* alogaga ahovaga elo, akosaga diskursu vina atanalelaga na awene, àttukulelaga orumela Omwene wa Mulugu.
9 Mbwenyi vowi attu ena ahumiha mirima dhawa ahifunaga ororomela, afiyedhaga ologa bure Dila ya Nabuya vamentoni va muttitti, iyene ohattiya vina ohattukulavo anamafwara vari vawa. Malabo otene wankosa diskursu musala mwa eskola ya Tirano.
10 Ejiya epadduwa mwa vyaka bili ofiyedha attu otene akala provinsia ya Ázia wiwa nzu na Mulugu, Ayuda vamodha na Agreguyá.
11 Mulugu wankosa mabasa menjene otikiniha amulabihedhaga Paulo;
12 attu anttukula malenso na guwo dha Paulo, attukulelaga vàli aredda, ngamala areddayá anvulumuwa vina muya dhabure dhambudduwamo.
13 Ayuda ena akosa oleddo adhowaga mimburo dhottiyana-ttiyana attamagihaga adomonyo, àtamela oromola nzina na Nabuya Yezu wi attamagihe muya dhabure mwa abale avolowiwe; awene anloga: “Miyo ddinoulamulani na nzina na Yezu ole onimulaleya Paulo, kabudduwanimo.”
14 Yakakene jakosa ana atanu na eli a munddimuwa wa anamakutta wa Ayuda wakuweliwa Seva.
15 Mbwenyi muya wabure ohawakula dhahi: “Miyo ddinomuziwa Yezu vina ddinomuziwa Paulo, kito nyuwo muli ani?”
16 Venevo, mulobwana oddule wavolowiwe muya wabure, ohalupela alobwana abo, owanana, ohawodha otene; mmalelani alobwana abale attawa vatakulu apo yovi vina na maguma.
17 Attu otene ahiwa yopadduwa eji, oromana Ayuda vamodha na Agregu akala mu Éfezo; vina otene attiddiwa wova, venevo nzina na Nabuya Yezu nanttittimihiwavi.
18 Enjene arumelile onfwara Yezu, andha obweka vina anloga osogorho wa attu ena dhotedhene dhakosilani.
19 Txibarene, muttengo mwinjene wa abale akosaga masarhapitto na nikamihedho na adomonyo, agumaniha manivuru awa vina addumeya attu otene onaga. Mpimeliwani ehoneya wi ali a muttengo wa 50.000 kobiri dha parata.
20 Dhahene na owodha, nzu na Yehova nammwadheya vina nankanavi guru.
21 Mpadduweli dhotedhene eso, Paulo ogana wi agamala ovira o Masedónia na o Akàia, onele odhowavi o Jeruzalemi. Iyene ohiloga: “Ddigamala wenewo enofuneya vina ddidhowe o Roma.”
22 Dhahene oharuma o Masedónia akamihedhi aye eli, Timóteo na Erasto, mbwenyi iyene ohala mudhidhi mung’onovi provinsia ya Ázia.
23 Nsakanene nttile, wahikalawo owana-wana onddimuwa mwaha wa Dila ya Nabuya.
24 Wahikalawo mulobwana dhahi mmodha wettaniwa Dimetriu, wasasanya na parata maladdaniho mang’ono a mparha wa Artemis; iyene wannaranjuliha venjene abale alabiyena mabasa aba.
25 Iyene ohatugumaniha, vamodha na ena akosa mabasa akakene vina ohiloga: “Alobwana, nyuwo munoziwa wi ninwodha okaana kobiri mwaha wa marhondda aba.
26 Ovano munowona vina munowiwa wi Paulo okwekwetta muttitti mwinjene wa attu, àttukulelaga osaddula dhubuwelo dhawa, alogaga wi amulugu ansasanyiwa na mada a attu kahiyo amulugu ebaribari; ejo kimpadduwa okuno o Éfezo bahi, mbwenyi dhipaddi dhinji dha provinsia ya Ázia.
27 Ottiya ejo, ddinova wi attu anaveyihe mabasa ehu vina ddinova wila attu anadhe ahonegena ttima mparha wa mulugu wehu munddimuwa Artemis. Dhawene ovuwa wa ole onebedhiwa provinsia yotene ya Ázia na velaboni ya vati, onomala.”
28 Alobwana abale mwiwalani esodhá anyaguleya vina aroma okuwa dhahi: “Munddimuwa ddi Artemis, mulugu wa akadda Éfezo!”
29 Venevo mbigiddi otatamuwa, omwadheyela musidadi mwetemwene, vina attamagela mburo onkosiwa teatru àburulelagavo akadda Masedónia, Gayo na Aristarko, abuwene anvelela Paulo muleddoni mwaye.
30 Paulo wanfuna odhowa mburho obule wali attuyá, mbwenyi anamasunza amukoddiha.
31 Vina anamasasanyedha ena a mattanga na anamasasanyedha jogu a wenewo ali amarho a Paulo, ahimperhengezela muselu amuttiddaga myeddo wi ahitagihe odhowa mburo obule wa teatru.
32 Vano vahikala mbigiddi na muttitti wotene, ena akuwa eji, ena akuwa yina; mbwenyi owinjivaya kaziwa sabwaya yatugumanelanivo.
33 Venevo amburutxa Alexandre vari va muttitti, Ayuda amutukumela osogorho, Alexandre okosa ezinddiyelo na mada, sabwani afuna aloge elobo ya ovivunana vari va muttitti obule.
34 Muziweli muttitti wa attu wi iyene wali Muyuda, otene aroma okuwa na lizu nimodhene mwari mwa wora bili: “Munddimuwa ddi Artemis, mulugu wa akadda Éfezo!”
35 Munddimuwa wa musidadimwa mmaleliye wamaliha attu, ohiloga: “Nyuwo attu a mu Éfezo, bani wa nlogo na vati ohinziwa wi sidadi ya akadda Éfezo punkoyiwa mparha wa mulugu munddimuwa Artemis vina engamuttu emottile wirimu?
36 Vowi makani aba kampambiheya, nyuwo mukale ofwaseyene, kamwire dhamaruru.
37 Nyuwo muhadhana okuno alobwana aba, ahili nne ambava a mumparhani nne ahimveyihile mulugu wehu Artemis.
38 Nona, akala Dimetriu na akwaye anlabiyena ahikana muladdu wa omusumelana muttu, akalawo malabo anfuguliwa tribunali vina ahikalawo agovernador* adhowena makani awa mimburodhene eso.
39 Mbwenyi akala munfuna elobo yina ottiya eji, attu a musidadi agagumana enofuneya ologela makaniyá nifwariwaga nlamulo.
40 Sabwani nindhaga omagedhiwa wi nihimusadduwela guverno mwaha wa eji epadduwile ddabuno; vowi kaninakane yowakula nigavuziwa mwaha wa mbigiddi obu otatamulile muttitti.”
41 Mmaleliye ologa eso, attu otene abalaleya.
