Merelo a Arumiwi 2:1-47
2 Venevo siku na Mattanga a Pentekosti anamasunza otene, atugumana mburo mmodhene.
2 Morurumutxa-mwene ohiweya wirimu, oruma waligana na wa pevo enoba na guru enddimuwa, orumawa odhala mba mwetemwene mwagilatilani.
3 Venevo aroma wona dhilobo dhaladdana na malumi a motto, malumiyá aba amwadheya vina ahimela vamusorho va muttu-muttu,
4 otene adhala muya wokoddela vina aroma ologa dhilogelo dhottiyana-ttiyana bari mwawodhiha muyayá.
5 Mudhidhene obule, o Jeruzalemi wahikala Ayuda amuroromela Mulugu adhile mwari mwa malogo otene a vati.
6 Dhahene, mwiweyeli oruma okule vahitugumana muttitti wa attu, vina atikina sabwani muttu-muttu wannawiwa anamasunzayá alogaga na elogelo yaye.
7 Txibarene atikina venjene vina ahiloga: “Abaya otene anloga kahiyo akadda Galileya?
8 Enwodheya dhavi muttu-muttu wa iyo wawiwa alogaga elogelo yaye yobaliwana?
9 Veneva nikanavo attu adhile elabo ya Parto, ya Medo, vina a Elamita, attu adhile o Mezopotámia, Ayuda, o Kapadósia, o Ponto na o provinsia ya Ázia,
10 o Fríjia, o Panfília, o Ejipitu, a mirudda dha Líbia waddamana na o Sirene, adhile o Roma, Ayuda vamodha na attu amfwara masunziho a ayudayá;
11 ena adhile o Kreta; vina o Arábiya—iyo nihawiwa alogaga mwaha wa mabasa manddimuwa a Mulugu na dhilogelo dhehu.”
12 Txibarene, otene atikina vina àli ozuzumene, anloga muttu na mukwaye: “Ejiya entapulela eni?”
13 Vano ena, annapwaza alogaga: “Abo amala olezela vinyu yottapirha.”*
14 Venevo Pedro ohimela vamodha na Kumi na Mmodha vina ohiloga na lizu noliba: “Attu a mu Judeya vina nyuwo motene munkala mu Jeruzalemi kafwaseyani, muvuruwane pama mazu aga.
15 Txibarene attu aba kalezelile ninga munubuwela nyuwo, sabwani obuno mudhidhi wa membesi.*
16 Ottiya ejo, eji enoninyu veneva, jijile yalogiwe na namavuhulela Jowel eraga:
17 ‘Mulugu ohiloga: “Masiku omariha, ddinele wakuttulela muya waga wokoddela attu otene. Anenyu analobwana na anayana anele ovuhulela, azombwe enyu anele wonihiwa dhotikiniha, akalaba enyu anele oroyihiwa.
18 Masiku abo ddinele wakuttulela muya waga adhari aga alobwana na ayana, awene vina anele ovuhulela.
19 Ddinele wira matikiniho wirimu na vizinddiyelo vati—nikami, motto na mirabo dha witxi.
20 Nihinatti ofiya siku ninddimuwa n’ottittimiheya na Yehova, nzuwa ninele osadduwa nikale eddima, mweri okale nikami.
21 Vina wotene ole onlobela aromolaga nzina na Yehova, onele ovuneya.”’
22 “Nyuwo akadda Izrayel, kewani mazu aba: Ninga munziwelinyu, Yezu Munazareti wali muttu orumeliwe na Mulugu vari venyu. Iyene okosa mabasa manddimuwa, matikiniho na vizinddiyelo dhikosile Mulugu mwa iyene vari venyu.
23 Nyuwo muhimperheka mmadani mwa attegi vina muhimpa mulobwana oddu, mmukomelaga vapingirhizini, ejiya epadduwile na ofuna vina na oziwa wottaga wa Mulugu.
24 Mbwenyi Mulugu omutapula mukwani,* ohinvenyiha, sabwani kiyawodheya wi okwa ommagevi.
25 Davidi ohiloga mwaha waye: ‘Masiku otene Yehova oli muyubuweloni mwaga* sabwani oli omononi waga woja wi ddihigulugudheye.
26 Nona murima waga odhala osanzaya, ddinologa na ottaba onddimuwa. Miyo ddinokalawo na njedhelo;
27 sabwani kamunaddittiye Mmasiye* nne vina kamunattiye wi maningo a mwimeleli wenyu wororomeleya avudde.
28 Muddiziwiha dila dha egumi, munele ottabiha venjene murima waga vamentoni venyu.’
29 “Alobwanani, abali, kaddittiyeni ddilogevi mwaha wa nikolo nehu Davidi, ninga munziwelihu, iyene ohikwa vina ohinteriwa, ekutta yaye eli mu sidadi-mwene mpu, ofiyedha siku na ddabuno.
30 Ninga wali namavuhulela vina wahiziwa wi Mulugu wamulibelela wila mwana mmodha wa Davidi agahigilati vampaddoni vaye,
31 vina iyene wahiziwa mutanene mwaha wa ovenyihiwa wa Kristu, wahiloga vina wi kananyanyaliwe Mmasiye* nne maningo aye kanavudde.
32 Mulugu ohinvenyiha Yezu oddo mukwani vina iyo notene nili anamoona a esidhá.
33 Nona, ninga iyene ohittittimihiwa omononi woja wa Mulugu, ohakela muya wokoddela wampikirhele Baba. Nona iyene onikuttulela muya obu, dhahene ninga munonenyu vina muniwenyu.
34 Sabwani Davidi kawelile wirimu, mbwenyi iyene ohiloga, ‘Yehova ohiloga na Nabuyaga: “Kagilati omononi waga woja
35 ofiyedha miyo wattiya amwiddani awo, mutxiddo mwa manyalo awo.”’
36 Nona, attu otene a Izrayel, mukane ebaribari wi Mulugu omwira Nabuya vina Kristu, Yezu oddu ompilenyu vapingirhizini.”
37 Mwiwalani eso, aribiwa murima venjene vina ahiloga na Pedro vamodha na arumiwi ena: “Alobwanani, abali, nikose eni?”
38 Pedro ohawaddela: “Mutxinuwe vina muttu-muttu wa nyuwo abatiziwe na nzina na Yezu Kristu wi dhottega dhenyu dhileveleliwe vina munele wakela mvaho wa muya wokoddela.
39 Àkelile nipikirhelona ntti babale otene àkuwelile Yehova Mulugu wehu, nyuwo, anenyu na otene ali wolapela,”
40 vina iyene wannatapulelamo mowakwana-mwene vina wannakokomeza na mazu meena alogaga: “Muvuneye mwari mwa nlogo ntti notakala murima.”
41 Dhahene arumelile na murima woziveliwa mazu a Pedro abatiziwa, vina siku-nene nttile attu owakwana 3.000 avitaganyiha na anamasunza.
42 Awene ansunzavi na arumiwi, angawelana dhotene muttu na mukwaye, anja vina anlobela vamodha.
43 Txibarene, attu otene ahova vina arumiwi ankosa matikiniho na vizinddiyelo dhinjidhene.
44 Otene abale amurumelile Yezu, akala vamodha vina angawelana dhotene dhanani,
45 anguliha mindda dhawa na dhina dhakanani vina angawelana otene kobiridhá dhakelani, bari ejile yamujombela muttu-muttu.
46 Masiku otene akala mumparhani owiwananene na efunelo modhene, muttu-muttu wanja vatakulu va mukwaye, angawelana dhoja dhawa n’ohagalala onddimuwa vina na murima wotene,
47 annimuttittimiha Mulugu vina attu otene anziveliwa na awene. Mudhidhi wakakene, siku na siku Yehova wannawinjivihavi abale avuniwa.
Manota
^ Obe, “vinyu eswa.”
^ Na egregu, “wora yanoraru [nzuwa banimalile opattuwa].” Enakwanela wora 9.
^ Obe txino “omutapula mukurentini dhokwa.”
^ Obe, “omentoni waga.”
^ Obe, “Hades,” kuloga, mburo onikiwa attu otene. Kang’ana Mazu Atapuleliwe.
^ Obe, “Hades,” kuloga mburo onikiwa attu otene. Kang’ana Mazu Atapuleliwe.
