Merelo a Arumiwi 20:1-38
20 Mvuguweli mbigiddi wa muttitti, Paulo ohakuweliha anamasunza, mmaleliye walibiha vina wapaganya, ohikosa oleddo adhowaga o Masédonia.
2 Iyene ohedda mirudda esile, ohalibiha anamasunza a mwenemo na mazu menjene, mmaleliye ofiya o Grésia.
3 Okala wenewo myeri miraru, mbwenyi afunaga owela mmwanddiyani wi adhowe o Asiria, ozinddiyela wi Ayuda alaganela ompa, venevo ohiyela aviraga o Masédonia.
4 Waveleliwa na Sopater mwana Piro, w’ o Bereya; Aristarko na Segundo, o Tesalónika; Jairo, w’o Derbe; Timóteo; vina Tikiko na Trófimo, a provinsia ya Ázia.
5 Alobwana aba asogorha banijedha o Trowadi;
6 nihiwela mmwanddiyani o Filipo masiku a mattanga a Mikatte Dhotowa Emela vina mvirele malabo matanu nihafwanya o Trowadi, wenewo okalilehu malabo matanu na meli.
7 Siku noroma na sumana, vatugumanilehu wi nije, Paulo oroma ologa na abale àlivo, vowi iyene afuna adhowe mmangwananimwá, odidela ologa ofiyedha vari va mattiyu.
8 Sala yodhulu watugumanilehu, mwahikala panti dhinjidhene dhattidda.
9 Venevo, muzombwe mmodha wakuweliwa Eutiko wagilatile vajanelani, oku Paulo alogaga, muzombwe oddo ohittiddiwa nikove venjivene oroma ogona, vowi nikovena nahimulemiha ohigwela vati ovenyana nyumba yanoraru ya odhulu; mudhowelani omona anfwanyile bakwile.
10 Venevo Paulo ohitita, omuginantela, omukubatta vina ohiloga: “Kamuzuzume, muzombwe oddu okalawo.”
11 Mmaleliye ohiyelela wili nyumba ya odhulu, ohimenya pawu ohija. Odidela ologa, mpaka vati voya; mmaleliye odhowa.
12 Vasogorhova, ahimuttukula muzombweya bali mugumi vina apangarhazeya venjene.
13 Iyo nisogorha neddaga na paporo mpaka o Aso, vowi iyene wafuna adhowewo na myeddo; yali sidadene eji yadhowihu omwakela Paulo mpaporoni, dhahene ninga mwanaddeleliye.
14 Munifwanyeliye o Aso nimuttukula mpaporoni nidhowa o Mitileni.
15 Mmangwananimwá, nihabuwa wenewo nifiya vakuvi na o Kios, siku nina, nihivenya momaguva o Samo, siku nina nafwarela, nifiya o Mileto.
16 Paulo wahigana ohimela o Éfezo wi ahinonge mudhidhi o Ázia, vowi wamaguvela o Jeruzalemi, iyene wafuna wi kowodheya afiyewo siku na Mattanga a Pentekosti.
17 Mfiyedhiye o Mileto, ohakuweliha anddimuwa a mulogo o Éfezo.
18 Mfiyedhani, iyene ohawaddela: “Nyuwo munoziwa pama mweddelo weddilemina vari venyu, ovenyana siku noroma mufiyedhimi provinsia ya Ázia;
19 ddihilaba ninga mudhari wa Nabuya na oviyeviha wotene vina na mintori, dditabuwaga na wehiwa sabwa ya Ayuda alaganela oddipa,
20 masiki dhawene, kaddittiyile ologa dhilobo dhigaukamihedhileni, nne kaddittiyile ousunzihani vattaddo vina nyumba na nyumba.
21 Mbwenyi ddihalaleya attu otene, Ayuda na Agregu, wi yanfuneya arugunutxe murima, amwebedhege Mulugu, vina amuroromele Nabuyehu Yezu.
22 Ovano, ddeddihiwaga na muya wokoddela, ddindhowa o Jeruzalemi, masiki ddihiziwaga enfuna oddipadduwela wenewo;
23 enziwemi jawi, sidadi na sidadi, muya wokoddela onodidela oddaddela wi ddinojedhela ofugeliwa mukambura vina otabutxiwa.
24 Mbwenyi kaddinona egumi yaga okala ninga ya ttima; enfunetximi ku ogomiha enkosimi vina mabasa akelilemi wa Nabuya Yezu, mabasa a walaleyela attu otene miselu dhapama mwaha wa mahala a Mulugu.
25 “Ovano ddiziwa wi kavo nne mmodha wa nyuwo omulaleyelimi Omwene wa Mulugu onone wili kove yaga.
26 Mbwenyi, nyuwo muli anamoona siku ntti na ddabuno wi akala muttu onokwa miyo kaddinna muladdu,
27 sabwani kaddittiyile oulaleyelani ofuna wa Mulugu.
28 Muvyang’anele mwanya vina mwang’anele mabila attomeliwenyu na muya wokoddela ninga asogorheli, wila mukumbuze,* mulogo wa Mulugu oguliliye na nikami na Mwanaye.
29 Ddihiziwa wi miyo ddigadhowa, anele wubuwa attu anligana na miji vina kaneddihege mabila n’okwela
30 vina vari venyu vanele obudduwa attu agaloga mazu oviriganihana ebaribari, na efunelo ya wakwekwetta anamasunza, wila àfware awene.
31 “Nona, mukale txenjewa, vina mubuwele wi mwari mwa vyaka ttaru, mattiyu na mutana kaddittiyile omukokomeza muttu-muttu wa nyuwo na mintori.
32 Ovano ddinouperhekani mmadani mwa Mulugu, na nzu naye ninnaddela mahala aye, nzu ntto ninoulibihani vina ninouvahani dhohalana dhinavaha Mulugu abale anakoddelihiye.
33 Kaddisirilile parata nne woru nne guwo ya muttu.
34 Nyuwo mwanya munoziwa wi ddittidda mabasa na mada aga wi ddiwodhe ovikalihana miyo vina na abale alaba na miyo.
35 Mwa dhotedhene, miyo ddihuwonihani na merelo aga, mukalelo wowakamihedha abale obanile, mubuwelaga mazu a Nabuya Yezu, ologile: ‘Ovaha onottabiha venjene opitta ovahiwa.’”
36 Mmaleliye ologa dhotedhene esi, okokora vamodha na otene àlivo vina olobela.
37 Otene aroma wunla vaddiddi, venevo amukubatta Paulo vina ahinvaha beju na okwela,
38 yakubanyihiletxe yali ya iyene wawaddela wi kagamonile vina. Mmalelani ahinvelela mpaka wali paporo.
Manota
^ Obe, “musapihe.”
