Merelo a Arumiwi 21:1-40
21 Mmalelihu ottiyana, niwela mpaporoni, nihinyalela o Koz, mmangwananimwá nidhowa o Rodi, mbudduwelihu wenewo nidhowa o Pátara.
2 Munfwanyelihu paporo wadhowa o Fenísia, niwelamo vina nidhowavi na oleddo wehu.
3 Monelihu vina mukwaranyelihu suwa y’o Xipre epaddi yemara, nihabuwela o Síria vina mfiyedhihu o Tiro nimuwela paporo mwina sabwani wannehu wafuna atitihe mittoro wenewo.
4 Nihatamela anamasunza vina nihafwanya, nikala wenewo mwari mwa malabo matanu na meli, vano na nikamihedho na muya wokoddela, awene anloga dila dhinjidhene na Paulo wi ahidhowe o Jeruzalemi.
5 Mfiyedhe siku nodhowa, nivenya vina niroma wedda oleddo wehu, otene, aima vamodha na ayanayá anivelela mpaka o takulu wa sidadi. Mfiyedhihu o bara, nikokora, nilobela
6 mmalelihu opaganyana, niwela mpaporoni, awene ahiyelela vatakulu.
7 Nihakwaniha oleddo wehu ovenyana o Tiro ofiyedha o Ptolemáida, wenewo nihalejelawo abali vina nikala na awene siku nimodha.
8 Mmangwananimwá nivenya, nifiya o Sezareya, wenewo nidhowa vatakulu va namalaleya Filipi wali mmodha wa alobwana atanu na eli àsakuliwe na arumiwi o Jeruzalemi vina nikala na iyene.
9 Mulobwana oddu wahikana anaye anayi a ayana, ahateliwe* àli anamavuhulela.
10 Mukalelihuwo masiku menjene, odha namavuhulela mmodha wakuweliwa Agabu wavenyile o Judeya.
11 Iyene odha valihu, ottukula sintu ya Paulo omagana myeddo na myono dhaye vina ohiloga: “Muya wokoddela onloga dhahi, ‘Mwinya wa sintu eji onele omagiwa dhahene o Jeruzalemi na Ayuda, awene anele omperheka mmadani mwa attu a malogo meena.’”
12 Mwiwalihu eso, iyo vamodha na otene àlivo niroma omuttidda myeddo Paulo wi ahidhowe o Jeruzalemi.
13 Paulo ohawakula dhahi: “Munkoselani esuwene, mununlela nni mutamelaga wobaniha nroromelo naga? Ziwaní wi ddili womala-nawale wi ddimagiwe vina ddikwe o Jeruzalemi mwaha wa nzina na Nabuya Yezu.”
14 Ninga kanimuwodhile, nittiya omudidela* vina nihiloga: “Dhireye ninga munfunela Yehova.”
15 Mvirele masiku abale nihivisasanyedha, niroma oleddo wa odhowa o Jeruzalemi.
16 Anamasunza ena o Sezareya adhowa na iyo vina anittukulela vatakulu va Manason mukadda Xipre wafunihu okala vatakulu vaye ninga aleddo. Iyene wali namasunza woroma.
17 Mfiyedhihu o Jeruzalemi, abaliyá anakela nohagalala.
18 Mmangwananimwá, Paulo vamodha na iyo nidhowa ogumana na Tiago vina anddimuwa otene àli wenewo.
19 Paulo ohalejela vina ohatapulelamo dhotedhene dhakosele Mulugu attu a malogo meena na mabasa a olaleya akosiliye.
20 Mmalelani wiwa eso, awene aroma omuttittimiha Mulugu, mbwenyi ahiloga dhahi: “Mbalihu Paulo, nyuwo munoziwa wi Ayuda matxikwi menjene ahirumela onfwara Yezu vina otene anokalela ntidi weddana Nlamulo.
21 Vano awene ahiwa elogiwaga wi onowasunziha Ayuda otene ankala vari va attu a malogo meena wi attiye weddana Nlamulo na Mizé, ologaga wila kili yofuneya watxetteliha anawa nne ofwara dhilemelelo dhittiyedhiwani na azamani awa.
22 Ninakose eni mwaha wa makani aba? Txibarene awene anele oziwa wi weyo odha okuno.
23 Nona okose enfunehu wuwaddela: Nikaana veneva alobwana anayi amukosele nipikirhelo Mulugu.
24 Wattukule alobwana aba, odhowena mwavikoddelihe vamodha ninga munrumela malamulo, wapitxele dhotedhene dhinfunani ononga wi ege nttitti nawa, dhahene otene anele oziwa wi dhotedhene dhinlogiwa mwaha wawo kahiyo ebaribari mbwenyi onowedda ofwaraga Nlamulo.
25 Mwaha wa attu a malogo meena aninfwara Yezu, niharumela karta na yogana yehu nilogaga wi jofuneya otadha nama dhikutteliwe amulugu, nikami, nama dhohogiwa* vina ogonihana wonyakuwa.”*
26 Nowidhawo mmangwananimwá, Paulo ohattukula alobwana abale vina ovikoddeliha vamodha na awene; mmalele eso, ovolowa mumparhani wi aloge masiku agamalile ovikoddelihawa vina masiku agaperhekiwe mvaho wa muttu-muttu.
27 Omagomelo wa masiku abo matanu na meli, Ayuda akala o Ázia mmonelani bali mumparhani, akuwela muttitti wa attu, amuttidda,
28 akuwaga: “Nyuwo alobwana a mu Izrayel, kanikamihedheni! Mulobwana oddu, ddule onasunziha attu otene a vipaddi dhotedhene dhilobo dhinttiyana na Nlamulo na nlogo nehu. Ottiya ejo iyene ohadhana Agregu vina ohikwaruliha mburo obuno wokoddela.”
29 Akosela ejo sabwani vamaromo amona Paulo musidadi bali na Trófimo mukadda Éfezo, venevo ahubuwela wi Paulo omuttukulela mumparhani.
30 Mbigiddi otatamuwa, musidadi mwetemwene mwambudduwa attu attamagaga, vina amuttidda Paulo amburulela otakulu wa mparha, momaguva misuwodha dhifuguwa.
31 Oku atamelaga ompa, munddimuwa wa anyakoddo o Roma, ohakela mpaganyo wi musidadi mwetemwene mwa Jeruzalemi mukala mbigiddi;
32 momaguva iyene ohagumaniha anyakoddo na munddimuwa a anyakoddo asogorheliwa na iyene, adhowa attamagelaga wali muttitti. Attu mmonelani munddimuwa wa anyakoddo na anyakoddoyá, attiya ombubudda Paulo.
33 Venevo munddimuwayá omususela, omuttukulavo vina oruma wi amagiwe na kurenti bili, mmalelani ohinvuza wi wali ani vina txini yakosiliye.
34 Mbwenyi muttitti wa attu ena akuwa eji, ena akuwa yina. Nona sabwa ya ohiziwa pama mwaha wa onyagula wa muttitti, oruma wi attukuleliwe o kwarteli.
35 Mfiyedhani mmaskadani, Paulo ottukuliwa na anyakoddo sabwa ya owali wa muttitti,
36 vowi wahikalawo muttitti wa attu wanfwara akuwaga: “Kampeni!”
37 Afunaga ottukuleliwa mba mwa kwarteli, Paulo ohinvuza munddimuwayá wa anyakoddo: “Munoddirumeliha ologa na nyuwo?” Iyene omwakula: “Onologa Egregu?
38 Weyo kuli mukadda Ejipitu ole wamusadduweli guverno àttukulela mwiddeddereni apanga 4.000?”
39 Paulo ohakula: “Mwebaribari ddili Muyuda, mukadda Tarsu, sidadi ya ttima y’o Silísia, nona ddinoukumbirhani wi muddirumelihe ologa na nlogo ntti.”
40 Mmurumelihiliye, Paulo ohimela vaskadani, ohakosela attu ezinddiyelo na nlada. Otene amaala noo, venevo oroma walogana na elogelo ya Ebrayiko, eraga:
Manota
^ Na egregu, “ahamuziwile mulobwana.”
^ Na egregu, “nihimaala.”
^ Obe, “enama epiwe s’ohisijiwa.”
^ Na egregu, porneya. Kang’ana Mazu Atapuleliwe.
