Merelo a Arumiwi 26:1-32
26 Agripa ohiloga na Paulo: “Ovano onottiyiwa ologa yovivunana.” Venevo Paulo okosa ezinddiyelo na nlada, oroma ologa:
2 “Mwene Agripa, ddihagalala okala osogorho wenyu ddabuno wila ddiloge dhotedhene dhinddimagedhana Ayuda,
3 sabwani nyuwo munoziwa pama meddelo a Ayuda na esile dhinpambihanina. Nona ddinoukumbirhani, ddivuruwanení nofwaseya.
4 “Txibarene, Ayuda otene anoddiziwa pama, oromana muzombweni mwaga ofiyedha mudhidhi walimi mu Jeruzalemi;
5 akala awene anofuna, anele ouwaddelani wi miyo ddali Mfarizi, Afarizi anofwara na ntidi magano a webedha wawa opitta Ayuda.
6 Ovano ddinttongeliwa mwaha wa njedhelo naga napikirhele Mulugu azamani ehu;
7 ku wakwanihedheya wa nipikirhelo-nene ntti onjedhela mahimo ehu 12 wona, amulabelaga Mulugu mattiyu na mutana na guru dhotedhene. Nyuwo Mwene, ji sabwa ya njedhelo-nene ntti ninsumeliwana miyo na Ayuda.
8 “Munubuwelelani wi kinwodheya orumela wi Mulugu onowavenyiha mukwani abale akwile?
9 Miyo ddahigana okosa dhotedhene dhawodhimi wi ddisadduwele nzina na Yezu Munazareti.
10 Jijuwene ekosilemi o Jeruzalemi, ddihafugeliha akoddeli enjene sabwani anddimuwa a anamakutta ahiddivaha owodha wa okosa ejoyá vina agafunaga opiwa. Miyo ddanrumelela.
11 Mmasinagoga mwetemwene, dila dhinjidhene ddihatxinutxamo akoddeliyá ddamagelelaga okodda nroromelo nawa; vina vowi ddahinyaguleya venjene na awene, ddihifiyedha wafwara-fwara sidadi dholapela.
12 “Siku nimodha ddela odhowa o Damasko, vowi ddahikana owodha vina anddimuwa a anamakutta ahiddiruma odhowa wattukula anamasunza àli wenewo.
13 Nyuwo Mwene, iyo banili mudila mudhidhi wa mutana ddihona txeza yadhana wirimu yang’animela opitta nzuwa; txezayá eddimoneya vina ehamoneya otene àli na miyo.
14 Iyo notene nimottela vati, venevo ddihiwa lizu naddilogana na elogelo ya Ebrayiko: ‘Saulo, Saulo, onddifwara-fwarelani? Ogadidela owana na miyo* onvitabutxa wamwinya.’
15 Miyo ddivuza: ‘Muli ani, Nabuya?’ Nabuyayá ohakula: ‘Miyo ddili Yezu, oninfwara-fwariwe.
16 Mbwenyi kavenya, wimele. Miyo dduttanyuweli wi ddusakule ninga mudhari vina munamoona wa esile dhonilewe na esile dhinaulagihemi.
17 Miyo ddinele wuvuna mmadani mwa attu aba vina ddinele wuvuna mmadani mwa attu a malogo meena, munaurume miyo;
18 wi wafugule mento, wattukulele mutxezani abale ali mwiddimani, wattukulele wa Mulugu abale ali mmadani mwa Satana wi aleveleliwe dhoddawa dhawa, àkele dhohalana dhinavaha Mulugu abale akoddelihiwe na oddiroromela wawa.’
19 “Nona, Mwene Agripa, miyo ddihiwelela dhaddaddelile Yezu ovenyana wirimu.
20 Ddiromile o Damasko, mmalelimi baddidhowa o Jeruzalemi na mirudda dhotene dha o Judeya vina na dhilabo dha attu a malogo meena, ddàttukulelaga miselu dhapama dhawi anfwanyela otxinuwa vina omwebedha Mulugu, eraga merelo anoniha otxinuwa wawa.
21 Jijuwene eddittiddeli Ayuda mumparhani, afunaga oddipa.
22 Vano, ninga Mulugu onoddikamihedha ofiyedha ddabuno, ddinowalaleyavi ang’ono na anddimuwayá; kaddinloga elo dhihili esile dhilogiwe na Anamavuhulela vina munlamuloni na Mizé wila dhigahipadduwa—
23 Kristu agahitabuwa, vina ninga woroma ovenyihiwa mukwani, agahalaleyela attu a nlogo ntti na a malogo meena vina agahavaha txeza.”
24 Oku Paulo alogagavi mazu ovivunana, Festo ohiloga na lizu nowiweya: “Weyo Paulo ohitaduwa! Eziwelo ejo yawo enddimuwa, ehutadutxa!”
25 Venevo Paulo ohakula: “Nyuwo Wottittimiheya governador Festo, miyo kadditaduwile, ddinloga mazu a ebaribari vina na yubuwelo yapama.
26 Txibarene nyuwo mwene onlogimina mohipipiriha, munoziwa pama esidha; ddikaana ebaribari wi nne kayivo elo ehinnonelamo nyuwo, vowi kayivo ekosiwe moviteyani.
27 Mwene Agripa, munowaroromela Anamavuhulela? Ddiziwa wi munowaroromela.”
28 Agripa ohiloga na Paulo: “Mwa mudhidhi mung’onovi ogaddikaliha Mukristu.”
29 Nowidhawo Paulo ohakula: “Miyo ddinomuloba Mulugu wila mwa mudhidhi mung’onovi peno mwa mudhidhi mwinjene, nyuwo vamodha na attu otene ali veneva anddivuruwana ddabuno akale Akristu, mbwenyi ahimagiwe dhahene ninga mmageliwe miyo na kurenti.”
30 Venevo mwene ohivenya vamodha na governador, Berenise na attu agilatile na awene.
31 Abudduwagavo, anloga mukalelani: “Mulobwana oddu kakosile elo eninfwanyeliha okwa obe ofugeliwa mukambura.”
32 Agripa ohiloga dhahi na Festo: “Mulobwana oddu agahifuruliwa kohikumbirha odhowa ottongiwa na Sézari.”
Manota
^ Na egregu, “ogatutukaga muri wotogolowa.” Wali muri wanna toga ya muttove walabiwana wi weddihiwena enama.
