Merelo a Arumiwi 3:1-26
3 Pedro na Joau adhowa mumparhani wila akose malobelo a txiguwo, yali wora kumi na tanu,*
2 mudhidhene obo mulobwana dhahi wabaliwe woragalene wel’ottebiwa. Masiku otene mulobwana oddo wanttiyiwa vakuvi va musuwo wa mparha, onkuweliwa Musuwo Wokoddela wi àkumbirhege esmola otene avolowa mumparhanimwá.
3 Mmoneliye Pedro na Joau avolowaga mumparhani, oroma wakumbirha esmola.
4 Venevo, Pedro na Joau amwang’ana ddo-ddo-ddo vina Pedro ohiloga: “Kanang’ane iyo.”
5 Dhahene, iyene odidela wawang’ana, ajedhelaga wakela elobo-txilobo.
6 Venevo Pedro ohiloga: “Kaddinna parata, nne woru, mbwenyi ddinauvahe enna miyo. Na nzina na Yezu Kristu Munazareti, kedda!”
7 Dhahene, iyene omuttidda na nlada noja, ohinvenyiha. Momaguva-mwene myeddo dhaye dhihiliba.
8 Iyene olupa, ohimela, mmalelani ovolowa mumparhani na awene eddaga, alupaga vina amuttittimihaga Mulugu.
9 Otene ahimona eddaga vina amuttittimihaga Mulugu.
10 Awene amuzinddiyela wi ddi mulobwana ole wagilatetxa Vamusuwo Wokoddela wa mparha ajedhelaga esmola, n’eji atikina venjene mwaha wa ejile yampadduwele mulobwana ole.
11 Mulobwanayá wahittiddelavi mada a Pedro na Joau, mudhidhi wali muttittiyá wotikinene attamagelaga mburo walani wakuweliwa Nikodde na Salomau.
12 Monele Pedro esodhá, ohiloga na muttitti: “Nyuwo attu a mw’Izrayel, mukaleleni otikinene na esi dhipadduwile vina munnang’anelani dhawene ninga iyo nimweddihile na owodha wehu vina na omuroromela wehu Mulugu?
13 Mulugu wa Abrahamu, wa Izaki na wa Jakob, Mulugu wa azamani ehu omuttittimiha mudhari waye Yezu, odduwene omperhekilenyu, omukoddilenyu vamentoni va Pilato, masiki Pilatoyá vafuniye onfurula.
14 Ndde, nyuwo mumukodda mukoddeli vina muttu woligana murima, bamukumbirha wi mperhekeliwe muttu wali panga,
15 nyuwo muhimpa Mwimeleli Munddimuwa wa egumi. Mbwenyi Mulugu ohinvenyiha mukwani, iyo nili anamoona a esodhá.
16 Mwaha wa nzina na Yezu vina mwaha wa iyo ororomela nzina naye, myeddo dha mulobwana oddu onimoninyu vina onimuziwenyu dhiliba. Nona, ku omuroromela wehu Yezu omukosihile mulobwana oddu onimoninyu okala mugumi.
17 Ovano, abali, ddiziwa wi nyuwo mwirile muhiziwaga dhahene ninga mukosele asogorheli enyu.
18 Dhahene, Mulugu ohakwaniha dhalaleyiliye wale na mulomo wa anamavuhulela aye otene, wi Kristu agahitabuwa.
19 “Murugunutxe murima wenyu, musaddule mweddelo wenyu, wila Yehova auleveleleni dhottega dhenyu vina adhena mudhidhi wa murenddele,
20 vina aurumeleni Kristu ottomeliwenyu oli Yezu.
21 Enofuneya Yezu oddo okalavi wirimu ofiyedha nsaka ninakosiwe dhilobo dhotedhene dhikale dhiswa, dhahene ninga mulogile Mulugu na mulomo wa akoddeli aye, anamavuhulela awale.
22 Txibarene, Mizé ohiloga dhahi: ‘Vari va nlogo nenyu, Yehova Mulugu wenyu onele ouburutxelani namavuhulela onligana na miyo. Muvuruwane dhotedhene dhinauwaddeleni iyene.
23 Pumwenemo, wotene ole ohinanvuruwane namavuhulela oddo, onele otolotxiwa-wene vari va nlogo.’
24 Anamavuhulela otene ahiloga, oromana Samuwel, alaleya mwawoneya-mwene mwaha wa masiku aba.
25 Nyuwo muli ana a anamavuhulela vina a nipagano nikosile Mulugu na azamani enyu, mulogeliye dhahi na Abrahamu: ‘Malogo otene a vati anele orurihiwa na mwana wa ziza* nawo.’
26 Mmaleliye onvenyiha mudhari waye, Mulugu oromile ourumelani nyuwo wi aururiheni, amukamihedhaga muttu-muttu wa nyuwo otxinuwa mmereloni mwaye otakala.”
