Merelo a Arumiwi 5:1-42
5 Vano mulobwana dhahi wakuweliwa Ananiya na mwadhiye Safira aguliha mundda wawa.
2 Iyene na mwadhiye alaganela moviteyani, attukulavo kobiridhá, dhina adhowa waperhekela arumiwi.
3 Mbwenyi Pedro ohiloga: “Ananiya, Satana owodhile dhavi ounyengetta bufiyedha ozivalela muya wokoddela ohalagana movitteyani epaddi yina ya kobiri ya mundda ogulihiliwe?
4 Munddayá ohinatti oguliha kuwali wawo? Mmaleliwe oguliha kobridhá kadhali dhawo? Wubuwelele eni mmurimani mwawo okosa elobo ninga ejene? Kuwazivalele attu, mbwenyi omuzivalele Mulugu.”
5 Ananiya mwiwaliye mazu aba ogwela vati, ohikwa, vina otene ewale esodhá ahova vaddiddi.
6 Venevo azombweyavó avenya ampopottela na guwo mmalelani amuttukulela otakulu vina amwinteri.
7 Mvirele wora ttaru mwadhiye ofiyavo, ahiziwaga dhipadduwile.
8 Pedro ohinvuza: “Kaddaddele, muttengo ogulihilenyu mundda wenyu bubwene? Iyene ohakula: See, bubuwene.”
9 Venevo Pedro omwaddela dhahi: “Nyuwo moheli mulaganele nni onyengetta muya wa Yehova? Abale adhowile omwinteri mamunawo ali vamusuwo, anele wuttukulela weyo vina otakulu.”
10 Momaguva-mwene iyene ogwa osogorho wa Pedro vina ohikwa. Mufiyedhe azombwe abale, anfwanyile bakwile, venevo amuttukulela otakulu adhowa omwinteri vakuvi na mamunaye.
11 Dhahene, mulogo wotene vina otene ewale esidhá dhilogiwaga, ahova vaddiddi.
12 Ottiya ejo, arumiwi ankosa matikiniho na vizinddiyelo dhinjidhene vari va nlogo, vina otene antugumana Nikodde na Salomau.
13 Ebaribari wi attu ena annova ovitaganyiha na awene, mbwenyi muttitti mwinji wannaloga pama.
14 Ottiya ejo, wahikala muttengo munddimuwene wa alobwana vina wa ayana, wavitaganyiha na awene.
15 Attu annattukulela aredda awa otakulu badhowana mmarampani bàginantiha kama dhing’ono vina mmabonddeni wila Pedro agaviraga ngafuna-wene murunti waye wafwanye ena.
16 Wahikalawo vina muttitti wa attu adha sidadi dhowaddamela dha o Jeruzalemi, adhagana aredda na abale avolowiwe muya dhabure, oteneyá abo anvulumutxiwa.
17 Venevo namakutta munddimuwa, vamodha na otene àli na awene, àli a nikuru na Asaduseu aroma watxiga vaddiddi.
18 Nowidhawo ahattidda arumiwiya ahafugela mukambura yali musidadimwá.
19 Mbwenyi mmattiyunimwá anju wa Yehova ofugula misuwo dha kamburayá ohaburutxela otakulu vina ohiloga:
20 “Kadhowani mumparhani mwalaleyelegevi nlogo miselu dhinvaha egumi.”
21 Mmalelani wiwa mazu aba ahivolowa mumparhani vati vayaga vina aroma osunziha.
Mfiyedhe namakutta munddimuwa vamodha na otene àli na iyene, akuweliha Sinedriyu* na anddimuwa otene a nlogo na ana Izrayel, aruma wila arumiwiyá adhoweliwe mukambura mwalani.
22 Vano mfiyedhe ang’aneli* mukamburamwá kàfwanyilemo, dhahene ahiyela,
23 ahiloga dhahi: “Nifwanyile kamburayá jifugiwe na kaddiyaddo dhotedhene, ang’aneli bali vamusuwova, mbwenyi mfugulelihu kaninfwanyilemo muttu.”
24 Mwiwalani eso munddimuwa wa mumparhani vamodha na anddimuwa a anamakutta kaana yokosa vina anvivuza mwaha wa esile dhigapadduwile vasogorhova.
25 Venevo ofiyavo muttu mmodha vina ohawaddela dhahi: “Alobwana abale àfugelile nyuwo mukambura ali mumparhani vina anosunziha nlogo.”
26 Venevo munddimuwa wa mumparhani ohadhowela na ang’aneli aye, mbwenyi kawirele yabure, sabwani annova oponyedhiwa malugu na nlogo.
27 Awene ahadhana vina ahattiya vari va Sinedriyu,* namakutta munddimuwa ohavuza
28 vina ohiloga: “Iyo nihuwaddelani, nukokomezagani wi muhisunzihe mwaha wa nzina ntti, ovano konani mumala odhaliha mu Jeruzalemi mwetemwene masunziho enyu vina munfuna munipwattelihe muladdu mwaha wa okwa wa mulobwana oddo.”
29 Pedro na arumiwi ena ahakula: “Jofuneya omwiwelela Mulugu ninga mulamuleli ottiya wawiwelela attu.
30 Mulugu wa azamani ehu ohinvenyiha mukwani Yezu, ole ompilenyu mmukomelaga vapingirhizini,*
31 Mulugu ohimuttittimiha, omuttiya omononi waye woja, omuttomela okala Mwimeleli Munddimuwa wa attu vina wavaha egumi; iyene okosele eji wila attu a mw’Izrayel arugunutxe mirima dhawa vina aleveleliwe dhoddawa dhawa.
32 Iyo nili anamoona a esidhá vina muya wokoddela wavahile Mulugu attu abale animwiwelela ninga mulamuleli onovaha onamoona.”
33 Mwiwalani esidhá, asilidhiwa venjene afunaga wapa.
34 Mbwenyi ohivenya vari va Sinedriyu* Mfarizi mmodha wakuweliwa Gamaliyel namasunziha Nlamulo warihiwetxa na attu otene a nlogo vina okumbirha wi arumiwiyá arome ottukuleliwa otakulu mwa mudhidhi mung’onovi.
35 Venevo ohalogana dhahi: “Nyuwo alobwana a mw’Izrayel, mubuwele pama dhinfunenyu wakosana alobwana aba.
36 Ninga motagiha, masaka a mundduni wahubuwa Teuda waloga wi muttu wattima vina alobwana ottamagela 400, avitaganyiha na iyene, mbwenyi iyene ohipiwa otene amfwara ahibalaleya, dhogana dhawa kadhipurile elo.
37 Mmalele eso, masiku olebeliwa odha Juda mukadda Galileya, attu enjene aninfwara; mulobwana oddu vina ohikwa otene anfwarayá ahibalaleya.
38 N’eji nonaga esi dhimpadduwa, ddinouwaddelani wi muhalige attu aba, mwattiye na murenddele, sabwani akala yogana eji obe mabasa aba ba attu anele otolotxiwa;
39 mbwenyi akala mabasa a Mulugu, nyuwo kamunawodhe otolotxa. Burevi munodha okala ninga munwana na mwinyene Mulugu.”
40 N’eji arumela malago aye ahakuweliha arumiwiyá, vina mmalelani watxupura* ahattiya odhowa akokomezaga wi ahilaleye na nzina na Yezu.
41 Dhahene awene abudduwa mu Sinedriyu* ohagalalene sabwani ahona wila elobo ya ttima otabutxeliwa nzina na Yezu.
42 Vina masiku otene mumparhani, nyumba na nyumba andhowa alaleyagavi, asunzihagavi miselu dhapama mwaha wa Kristu, Yezu.
Manota
^ Kang’ana Mazu Atapuleliwe.
^ Ang’ aneli a mumparhani.
^ Kang’ana Mazu Atapuleliwe.
^ Obe, “vamurini.”
^ Kang’ana Mazu Atapuleliwe.
^ Obe, “wawasula; wavada.”
^ Kang’ana Mazu Atapuleliwe.
