Merelo a Arumiwi 6:1-15
6 Masiku abale muttengo wa anamasunza winjivagavi, anamasunza áloga Egregu, aroma wawaba anamasunza áloga Ebrayiko, sabwani amamukwela áloga egregu kavahiwa oja wagawiwa siku na siku.
2 Venevo arumiwi 12 atugumaniha muttitti wa anamasunza vina ahawaddela: “Kinkala iyo ottiya osunziha Nzu na Mulugu wila nigawege dhoja vameza.
3 Nona, abali, kaasakuleni vari venyu alobwana atanu na eli anna mweddelo wapama,* adhalile muya wokoddela vina anna zelu wi iyo nattomele mabasa aba ofuneya;
4 vano iyo ninfuna nikalele ntidi olobela na osunziha Nzu na Mulugu.”
5 Muttitti wa attu oziveliwana elogilani, venevo amusakula Estevau mulobwana wa nroromelo noliba vina wadhalile muya wokoddela, vamodha na Filipi, Porokoro, Nikanoro, Timau, Parmena na Nikolau mukudda Antiokiya warumelile masunziho a Ayuda.
6 Awene ahattukulela wa arumiwi, arumiwiyá mmalelani walobelela ahatapulela mada.
7 Dhahene, nzu na Mulugu nammwadheyavi vina muttengo wa anamasunza mu Jeruzalemi wannijivavi; muttitti mwinjene wa anamakutta, akala aroromeli.
8 Vano, Estevau warumeliwa na Mulugu vina wavahiwe owodha onddimuwa na Mulugu, wankosa matikiniho menjene na vizinddiyelo vari va nlogo.
9 Vano attu dhahi a nikuru nakuweliwa Sinagoga* ya Afuruliwi,* vamodha na ena o Sirene na akadda Alexandrinu, otaganyiha na ena o Silisiya na vina o Ázia, adha wi akulena na Estevau.
10 Mbwenyi kawodhile ompambiha Estevau, sabwani iyene waloga na ononelamo vina na guru dha muya wokoddela.
11 Venevo ahanyengetta alobwana dhahi moviteyani wi aloge: “Iyo nimwiwa alogaga dhonveyihana Mizé vina dhonveyihana Mulugu.”
12 Nowidhawo ahatujela attu a nlogo, anddimuwa a ayuda, anamasunziha magano, adha omulupela vina amuttukulela o Sinedriyu.*
13 Mmalelani àdhanavo anamoona a ottambi alogile dhahi: “Mulobwana oddu, onkala ologavi bure mburo obu wokoddela na Nlamuloná.
14 Motagiha, iyo nimwiwa alogaga wi Yezu oddo Munazareti onele ogujula mburo obu vina asaddule dhilemelelo dhinisunzihile Mizé.”
15 Otene agilatile mu Sinedriyu* mmwang’anelani Estevau, ahona wi omentoni waye wali ninga wa anju.
Manota
^ Obe, “alobwana atanu na eli, anrihiwa.”
^ Kang’ana Mazu Atapuleliwe.
^ Nzu ntti “Sinagoga ya Afuruliwi,” ninaddiwana nikuru na attu arumela masunziho a Ayuda abuwene atugumana vamodha wila alobele vina engese malebo; enoneya wi abayá ali atxedhiwi obe adhari afuruliwa.
^ Kang’ana Mazu Atapuleliwe.
^ Kang’ana Mazu Atapuleliwe.
