Merelo a Arumiwi 7:1-60
7 Venevo namakutta munddimuwa ohinvuza: “Esodhá sebaribari?”
2 Estevau ohakula: “Alobwanani, abali vina ababi, kaddivuruwaneni. Mulugu wottittimiheya, omoneyela muzamani wehu Abrahamu bali o Mesopotámiya, ahinatti odhowa okalaga o Harán,
3 vina omwaddela: ‘Kattiya elabo yawo vina kàttiye amudhawo, odhowe elabo enaulagihe miyo.’
4 Iyene ohivenyamo mwilaboni ya Akaldeu, odhowa okala o Harán. Wenewo mukwele babe, Mulugu omuttukulela elabo ejino enkala nyuwo ddabuno.
5 Vano Mulugu kanvahile nne epaddi eng’onovi ya elaboyá, nne ngafuna vowika nnyalo, mbwenyi wahipikirhela omvaha iyene elaboyá vamodha na adhulaye, masiki ahinakana mwana.
6 Ottiya ejo, Mulugu wahiloga na Abrahamu wila adhulaye agakala anawedda elabo ehili yawa, vina anya a elaboyá ejo agahawira adhari, agahatabutxa mpaka vyaka 400.
7 Mulugu vina ohiloga: ‘Miyo ddinele ottonga elabo ejo munfunani olaba ninga adhari, agamala anele obudduwa mwilaboni mpo adhe addilabele miyo mburo obuno.’
8 Mulugu ohinvaha Abrahamu nipagano na otxetteliwa, Abrahamu odha okala babi wa Izaki, vina omutxettela siku nanotanu noraru, vina Izaki odha okala babi wa Jakob, Jakob ohabala aima 12 adhile okala makolo a malogo.
9 Makoloyá abo amukanela ntxiga mbalawa Jozé, mmalelani bamugulihedha akadda Ejipitu, mbwenyi Mulugu wali na iyene,
10 vina iyene ohinvuna mmakattamihoni mwaye mwetemwene, ohinvaha ononelamo, ohimukosiha orumeliwa na Faraó mwene wa Ejipitu; Farawoyá omuttomela okala mwimelelii wa mu Ejipitu vina wa ntakulu naye.
11 Mmalelani yahipadduwa dala enddimuwa mu Ejipitu mwetemwene na o Kaná, ndde, segedho yahittabwa vina azamani ehu kawodha ofwanya yoja.
12 Vano Jakob wahiwa wi mu Ejipitu mwahikala oja, nona oharumawo azamani ehu dila yoroma.
13 Dila yanawili, Jozé ohawaddela abalaye wi wali Jozé vina Faraó ohaziwa anamudhi a Jozeyá.
14 Dhahene Jozé oruma wi adhoweliwe babe Jakob vamodha na amudhaye otene, muttengo wowakwana attu 75.
15 N’eji Jakob odhowa mu Ejipitu vina ohikwa mwenemo, dhahene ninga azamani ehu.
16 Mukwelani, attukuleliwa o Sikém vina ahinteriwa mwikuttani yagulile Abrahamu na ana Amór o Sikém na muttengo wa kobiri ya parata.
17 “Waddamelaga mudhidhi wafuna wakwanihedheya mapikirhelo amukosele Mulugu Abrahamu, nlogo niroma wunuwa vina niroma winjivana mu Ejipitu mwalani,
18 ofiyedha witeya mwene mwina mu Ejipitu, wahamuziwa Jozé.
19 Mwene oddo oshagela ziza nehu vina ohatabutxa ababihu amagelelaga wanyanyala anawa, wi anawaya akwe.
20 Nsakanene nttile obaliwa Mizé, iyene wakoddela vaddiddi* vina oleliwe vatakulu va babe mwari mwa myeri miraru.
21 Mbwenyi ababe mmageleliwani omuttiya, mwana Faraó wa mwana-muyana omuttukula omulela ninga mwanaye.
22 Dhahene Mizé osunzihiwa na eziwelo yotene ya mu Ejipitu. Txibarene, iyene wanloga na owodha vina wankosa dhilobo dhinji.
23 “Vano mwakwanihedhiye vyaka 40, ogana* odhowa wawona abalaye, akadda Izrayel.
24 Mmoneliye mukadda Ejipitu mmodha amutabutxaga mukadda Izrayel wahana muladdu, iyene ohimbarela watabutxiwayá, ohimpa na ntxiga mukadda Ejipituyá.
25 Iyene wobuwela wi abalaye agahinonelamo wila Mulugu oharumela wi àvune, mbwenyi abalayeyá kanonelamo dhawene.
26 Mmangwananimwá, Mizé wafwanyile abalaye awanaga, iyene ohitamela wawandaniha alogaga dhahi: ‘Alobwanani, nyuwo muli obali. Kito munwanela nni?’
27 Vano ole wamutabutxa mukwaye omutukuma alogaga: ‘Bani wuttomele okala mulamuleli vina namattonga wehu?
28 Apo onfuna oddipe ninga ejile empile weyo mukadda Ejipitu nzilo?’
29 Mwiwale Mizé mazu abo, ottawa vina odhowa okala ninga mwana-wedda elabo y’o Midiyam, wenewo ohabalawo aima eli.
30 Mvirele vyaka 40, anju mmodha omuttanyuwela Mizé mwiddeddereni y’o Sinai, vanikupuni na minga nattidda.
31 Monele Mizé eso, otikina. Vano asuselagavo wi one pama ohiwa lizu na Yehova naloga:
32 ‘Miyo ddili Mulugu wa azamani awo, Mulugu wa Abrahamu, wa Izaki na wa Jakob.’ Mizé oroma ogurumela vina ohova wang’ana wili.
33 Yehova omwaddela dhahi: ‘Karula Sandáliya dhawo, sabwani mburo onnyigaliwe, mburo wokoddela.
34 Txibarene ddihona otabuwa wa nlogo naga nili mu Ejipitu, vina ddihiwa okubanya wawa, ddititele wi ddafurule. Ovano kadhawuno miyo ddinouruma mu Ejipitu.’
35 Mizé oddo omukoddilani alogaga: ‘Bani wuttomele okala mulamuleli vina namattonga?’ Ddudduwene omurumile Mulugu ninga musogorheli vina mvuni na nikamihedho na anju wamuttanyuweli vanikupuni na minga.
36 Iyene ohasogorhela azamani ehu, akosaga matikiniho vina vizinddiyelo mu Ejipitu, mu Nyaza ya Manje Ofila na mwiddeddereni mwari mwa vyaka 40.
37 Mizé oddo ddule ologile na ana Izrayel dhahi: ‘Vari va nlogo nenyu, Mulugu onele ouburutxelani namavuhulela onligana na miyo.’
38 Iyene ddule wali vamodha na ana Izrayel mwiddeddereni; wali na anju ologiliyena Vamwangoni Sinai vina na azamani ehu. Iyene ohakela mazu a egumi a Mulugu wila anivahe.
39 Azamani ehu kafuna omwiwelela, amukodda, mmurimani mwawa anfuna wiyelela mu Ejipitu,
40 alogaga na Aroni: ‘Munisasanyele amulugu wi anisogorhele, sabwani kaninziwa epadduwile na Mizé ole oniburutxile mu Ejipitu.’
41 Dhahene masiku abale amukosa mwana-ng’ombe vina akuttela mukutto engamuttuyá, venevo aroma ottaba na mabasa a mada awa.
42 Nona Mulugu ànyanyala, àttiya okokorela nzuwa, mweri na vineneri dha wirimu, dhahene ninga mulebeliwe munivuruni na Anamavuhulela: ‘Nyuwo ana Izrayel, koddi mwaddiperhekela miyo mikutto dhenyu mwiddeddereni mwari mwa vyaka 40?
43 Nne, nyuwo muhimetxa nyumba ya Molok, vina neneri ya mulugu Refan, maladdaniho akosilenyu wi mwebedhe. Nona miyo ddinele outxedhelani wolapela okwaranya o Babilónia.’
44 Azamani ehu ahikana tabernakulu* mwiddeddereni, dhahene ninga murumele Ole ologile na Mizé alogaga wi akose afwaraga makalelo onileyi.
45 Azamani ehu vamodha na Jozuwé attukula tabernakulu* ejo adhowana mwilaboni ya amalabo, yattamagihilemo Mulugu anyayá. Tabernakuluyá ekalavi mwenemwa ofiyedha masiku a Davidi.
46 Odduyá omukoddelela murima Mulugu vina okumbirha wi avahiwe gari ya ommagela nyumba Mulugu wa Jakob.
47 Mbwenyi ommageli nyumba Mulugu ddi Salomau.
48 Vano Namadhulu-dhulu kankala nyumba dhimagiwe na mada a attu, ninga mulogeli namavuhulela eraga:
49 Yehova ohiloga dhahi: ‘Wirimu kuli mpaddo waga, elabo ya vati pansameliha miyo manyalo aga. Nyumba gani enaddimagele nyuwo, vina mburo gani ogawodhile miyo ovuma?
50 Dhotedhene esi, kahiyo miyo okosile na mada aga?’
51 “Nyuwo addiyamaru, attu awuma mirima vina muhinfuna wiwelela, munkala okoddavi muya wokoddela; munkosa dhahene ninga mukosele azamani enyu.
52 Namavuhulela gani ohifwara-fwariwe na azamani enyu? Ndde, muhapa abale alaleyile mutanene odha wa muligani, odduwene omugulihilenyu vina ompilenyu,
53 Mulugu oharuma anju ouvahani Nlamulo, mbwenyi nyuwo kamwiwelele.”
54 Mwiwalani esodhá, asilidheya mmirimani mwawa vina aroma omutakunela meno Estevau.
55 Vano, Estevau wodhalene muya wokoddela odidela wang’ana wirimu, ohona nttittimiho na Mulugu, omona vina Yezu wowimelene omononi woja wa Mulugu,
56 vina ohiloga: “Moone! Ddinowona erimu yofuguwene vina Mwana-muttu wowimelene omononi woja wa Mulugu.”
57 Venevo awene akuwa na guru dhawa dhotedhene, afuga omaruni wawa na mada, mmalelani otene amulupela.
58 Mmuttamagihedhani musidadimwá, aroma omponyedha malugu. Anamoonaya attiya dhabalo dhawa na muzombwe dhahi wakuweliwa Saulo.
59 Oku amponyedhagavi malugu Estevau, iyene okumbirha dhahi: “Nabuya Yezu, mwakele egumi yaga.”*
60 Mmaleliye okokora, okuwa na lizu noliba: “Yehova kamwavahe muladdu mwaha wa yottega eji.” Mmaleliye ologa ejo, ohikwa.*
Manota
^ Obe, “wahimukoddelela Mulugu; wokoddela vamentoni va Mulugu.”
^ Obe, “ohubuwela mmurimani mwaye.”
^ Obe, “musasa woniha wi Mulugu oli na awene.”
^ Obe, “musasa woniha wi Mulugu oli na awene.”
^ Obe, “muya wa egumi”; na egregu “pneuma.”
^ Na egregu, “ogonelavo.”
