Merelo a Arumiwi 8:1-40
8 Saulo wahimelela opiwa wa Estevau.
Siku-nene nttile, mulogo wali o Jeruzalemi oroma ofwara-fwariwa venjene; anamasunza otene abalaleyela mirudda dhotedhene dh’o Judeya na dh’o Samariya, ahalile o Jeruzalemi àli arumiwi bahi.
2 Alobwana amova Mulugu, attukula maningo a Estevau adhowa winteri vina amunla venjene.
3 Saulo oroma obalaletxa mulogo, wanvolowa nyumba-nyumba àburutxelaga otakulu alobwana vina ayana, àfugelihaga mukambura.
4 Vano abale abalaletxiwe anlaleya miselu dhapama dha mazu a Mulugu mmiburhoni mwadhowani.
5 Filipi otitela sidadi y’o Samariya* vina oroma walaleyela mwaha wa Kristu.
6 Muttittiyá mumodhani wanfwaseyela dhaloga Filipi vina annona vizinddiyelo dhakosiye.
7 Attu enjene àvolowiwe muya dhabure, muyadhá dhankuwa vina dhanbudduwamo; ottiya ejo, akwettenkwe vina aragali enjene avulumutxiwa.
8 N’eji, musidadimwá mwahikala ottaba onddimuwa.
9 Mwenemo mwahikala mulobwana dhahi wakuweliwa Simoni, iyene wale wankosa dhilobo dhotikiniha na nikamihedho na adomonyo, wahattiya akadda Samariya awumene milomo mwaha wa ologa wi muttu wa ttima.
10 Otene anninvuruwana, oromana mwana ofiyedha munddimuwa vina anloga: “Mulobwana oddu Owodha wa Mulugu, onkuweliwa Owodha Onddimuwa.”
11 Awene anfwaseyela onvuruwana sabwani mwari mwa mudhidhi mwinjene wahattiya awumene milomo vowi wankosa dhilobo dhotikiniha na nikamihedho na adomonyo.
12 Masiki dhawene ahimurumela Filipi valaleyeliye miselu dhapama mwaha wa Omwene wa Mulugu vina mwalaleyeliye nzina na Yezu Kristu, nona alobwana na ayana ahibatiziwa.
13 Simoni vina omurumela Kristu, mmaleliye obatiziwa, okalavi na Filipi, iyene wantikina mwa wona vizinddiyelo na mabasa otikiniha akoseya.
14 Arumiwi àli o Jeruzalemi mwiwalani wi akadda Samariya arumela nzu na Mulugu, amurumawo Pedro na Joau.
15 Awene adhowawo vina ahalobelela akadda Samariya wi akele muya wokoddela.
16 Sabwani kalivo nne mmodha wa awene wakelile muya wokoddela, mbwenyi otene abatiziwe na nzina na Nabuya Yezu.
17 Venevo Pedro na Joau ahatapulela mada awa, vina awene aroma wakela muya wokoddela.
18 Simoni moneliye wi attu akela muya wokoddela mwa otapuleliwa mada na arumiwi, ohavaha kobiri,
19 alogaga: “Muddivahe miyo vina owodhawa oko, wi wotene ole onamutapulele miyo mada, akele muya wokoddela.”
20 Mbwenyi Pedro ohiloga: “Kobiri yawo erimele vamodha na weyoyá, sabwani wubuweli wi ogahiwodha ogula mvaho* wa Mulugu na kobiri.
21 Weyo kunawodhe okosa mabasa aba na iyo, sabwani murima wawo kuliganile vamentoni va Mulugu.
22 Nona, otxinuwe vina ottiye mweddelo wawo wabure, omuttidde myeddo Yehova vina orabele dhubuwelo dhabure, txino iyene onele oulevelela;
23 vowi ddinona wi weyo wa veneno yowawa vina oli mudhari wa dhohiligana.”
24 Simoni ohiloga: “Kaddilobeleleni wa Yehova wi dhotedhene esi dhilogilenyu, dhihiddipadduwele.”
25 Mmalelani watapulelamo mowakwana-mwene vina walaleyela nzu na Yehova, ahiyelela o Jeruzalemi alaleyaga miselu dhapama mirudda dhinjene dha akadda Samariya.
26 Mmalelani, anju wa Yehova ohiloga na Filipi, dhahi: “Kavisasanyedhe odhowe ogusuni* dila endowa o Jeruzalemi ofiyedha o Gaza.” (Eji dila ya mwiddeddereni.)
27 Venevo iyene ovenya vina odhowa, mbwenyi ohinfwanya mulobwana mmodha wali namalaba munddimuwa wa Kandasi wa musano w’o Etiópia, iyene wansogorhela mafumo a musanoyá. Iyene wadhowile o Jeruzalemi wi amwebedhe Mulugu,
28 eyelaga, bali wogilatene mukaroni mwaye, wannengesa na lizu nowiweya mazu a namavuhulela Izaiya.
29 Venevo muya wokoddela ohimwaddela Filipi: “Kadhowa, kaddamela karo ejo.”
30 Filipi ottamagela karoyá, ohinfwanya mulobwana ole engesaga mazu a namavuhulela Izaiya na lizu nowiweya, ohinvuza dhahi: “Munononelamo enengesinyu?”
31 Iyene ohakula: “Ddinawodhe dhavi ononelamo ahiliwo muttu wodditapulelamo?” Venevo omukumbirha Filipi wi awele vina agilati na iyene.
32 Epaddi ya Malebo yengesiye yaloga dhahi: “Iyene ottukuleliwa omasijeliwo ninga nibila vina ninga mwana-nibila onkala womaalene mmadani mwa namasatta moya, iyene kafugulile mulomo.
33 Mupwaziwani mwaye, akodda omweddiha n’oligana. Bani onaloge dha ziza naye, sabwani egumi yaye enele ogomihiwa mwilaboni.”
34 Mulobwanayá ole, ohiloga na Filipi: “Ddinoukumbirha kaddaddele, namavuhulela oddu onimuloga ani? Oniviloga mwinnya obe onimuloga muttu mwina?”
35 Filipi oroma ologa, aromaga na yobela ejile, omulaleyela miselu dhapama mwaha wa Yezu.
36 Adhowagavi, afwanya vego vàli manje, mulobwana ole ohiloga dhahi: “Moone! Apa vakala manje, ehinddiwodhiha obatiziwa txini?”
37 * ——
38 Mulobwana ole ohimetxa karo yaye, iyene vamodha na Filipi atitamo, adhowa mmanjeni venevo Filipi ohimbatiza.
39 Mmalelani obudduwa mmanjenimwa, muya wokoddela wa Yehova ohimuttukulavo Filipi momaguva valani vina mulobwana ole kamonile, mbwenyi odhowa n’ohagalala onddimuwa.
40 Venevo Filipi ofiya o Asdodi, aviraga mirudda esile vina odhowavi alaleyaga miselu dhapama sidadi dhotedhene ofiyedha o Sezareya.
Manota
^ Obe txino: “sidadi modha.”
^ Obe, “mvaho ohimpitxeliwa.”
^ Obe, “o sul.”
^ Versikulu eji enofwanyeya mmaBibiliani meena, mbwenyi mmapapini awale okuluveleya kinfwanyeyamo.
