Merelo a Arumiwi 9:1-43
9 Vano Saulo àtxutxagavi vina atamelaga wapa anamasunza a Nabuya, odhowa wa namakutta munddimuwa,
2 bakumbirha makarta wi adhowena mmasinagoga o Damasko wi àmage alobwana na ayana otene afwara dila ya Nabuya vina àdhowena o Jeruzalemi.
3 Adhowaga, bali vakuvi n’o Damasko, morurumutxa-mwene omoneyiwa na txeza yong’animela yadhana wirimu.
4 Iyene omottela vati vina nihiweya lizu naloga: “Saulo, Saulo, onddifwara-fwarelani?”
5 Saulo ohivuza: “Muli ani, Nabuya? Nzuna nihakula dhahi: “Miyo ddili Yezu oninfwara-fwariwe.
6 Ovano kavenya odhowe mu sidadi, mwenemo onele waddeliwa yokosa.”
7 Alobwana akosa oleddo vamodha na iyene ahimela awumene milomo, vowi txibarene ahiwa lizu naloga mbwenyi kamoni walogayá.
8 Saulo ovenya, masiki mento aye valani ofuguwene, kawodha wona elo. Venevo amuttiddela nlada amweddiha mpaka o Damasko.
9 Iyene ohivira malabo mararu ahijaga, ahimwaga vina ahonaga elo.
10 Mu Damasko mwahikala namafwara wakuweliwa Ananiya, venevo Nabuya omoneyela vina ohiloga: “Ananiya!” Iyene ohakula: “Ddili veneva, Nabuya.”
11 Nabuya ohimwaddela: “Kavenya, odhowe dila enkuweliwa Yomyala, vatakulu va Juda, onvuzele mulobwana onkuweliwa Saulo w’o Tarsu vowi mudhidhene obuno iyene onolobela
12 vina murohani omona mulobwana onkuweliwa Ananiya avolowaga, amutapulelaga mada wi eyelele wona.”
13 Ananiya ohakula: “Nabuya miyo ddihawiwa attu enjene alogaga mwaha wa mulobwana oddu vina mwaha wa obure wotene wawireliye anamasunza enyu* o Jeruzalemi.
14 Vina iyene odhile okuno sabwani ol’orumiwa na anddimuwa a anamakutta wila àmage otene* anromola nzina nenyu.”
15 Venevo Nabuya omwaddela: “Kadhowa, vowi miyo ddimusakula mulobwana oddo wi àlaleyele nzina naga amalabo, amwene vamodha na nlogo na Izrayel.
16 Miyo ddinele omoniha dhotedhene dhinatabuwiye mwaha wa nzina naga.”
17 Dhahene Ananiya odhowa vina ovolowa mba mwaliye, omutapulela mada vina ohiloga: “Saulo, mbalaga, Nabuya Yezu ouwoneyele mudila odhaga okuno, oddiruma wi wiyelele wona vina odhale muya wokoddela.”
18 Momaguva-mwene, mmentoni mwaye mumotta dhilobo ninga makaka a oba, iyene ohiyelela wona. Venevo ovenya vina obatiziwa,
19 oja vina guru dhiyamo.
Iyene okalavi o Damasko masiku mang’onovi na anamasunza,
20 momaguva-mwene, oroma olaleya mwaha wa Yezu mmasinagoga, avuwihaga wi Yezu Mwana Mulugu.
21 Mbwenyi otene amwiwa, antikina alogaga: “Mulobwana oddu kahiyo ole wafwara-fwara n’owali o Jeruzalemi abale avuwiha nzina ntti? Okuno kadheliwo wi àmage* vina àttukulele wa anddimuwa a anamakutta?”
22 Saulo wanlibavi vina wannatikiniha Ayuda àli o Damasko, onihaga mowakwana-mwene wi Yezu ddi Kristu.
23 Mvirele masiku menjene, Ayuda alaganela ompa.
24 Mbwenyi Saulo ohiziwa yolaganeliwa ejo. Awene annang’anela misuwodhá mattiyu na mutana wi ampe.
25 N’eji anamasunza aye amuttukula na mattiyu amwika mmuddangani, amutitiha vajanelani na rhinga.
26 Mfiyedhiye o Jeruzalemi, Saulo otamela okala vamodha na anamasunza, mbwenyi otene annimova sabwani karumela wi iyene vina namasunza wa Yezu.
27 Vano Barnabé odha omukamihedha vina omuttukulela wa arumiwi, venevo ohawaddela dhimpadduwele Saulo bali mudila mmoneliye Nabuya, mukalelo ologile Nabuya na iyene vina oliba murima wonihile Saulo valaleyiye nzina na Yezu, bali o Damasko.
28 Mmalelani, Saulo okalavi na awene, eddaga na ofuru mu Jeruzalemi vina alaleyaga na oliba murima nzina na Yezu.
29 Iyene wanloga vina wampambihana na Ayuda aloga Egregu, vano abayá antamela ompa.
30 Abali muziwelani ejiya, amuttukulela o Sezareya vina amuruma odhowa o Tarsu.
31 Vano anamasunza otene o Judeya, o Galileya na o Samariya ahikana murenddele vina anlibiheya; awene anninjivavi vowi annoniha omova Yehova vina ampangarhaziwa na muya wokoddela.
32 Vowi Pedro wankosa oleddo adhowaga mirudda dhotene, odhowa vina wawona akoddeli akala o Lida.
33 Wenewo ohinfwanya mulobwana dhahi wakuweliwa Eneya, wahawodha ovenya vakamani mwari mwa vyaka tanu na ttaru, vowi wali muragali.
34 Pedro ohimwaddela: “Eneya, Yezu Kristu onouvulumutxa, kavenya osasanyedhe kama yawo.” Iyene ovenya momaguva.
35 Mmoneli attu otene akala o Lida na o Sarón, amuroromela Nabuya.
36 O Jope wahikalawo namasunza wa muyana wakuweliwa Tabita, nintapulela, “Dorka.”* Iyene wankosa mabasa menjene apama vina wannakamihedha vaddiddi ayelegi.
37 Masiku-ene abo iyene obulela vina ohikwa, venevo amuhabiha, adhowa omuttiya kwartu y’odhulu.
38 Vowi o Lida wali waddamana na Jope vina Pedro wali wenewo, anamasunza muziwelani wi iyene wali mu sidadi, aharumawo alobwana eli wi amukumbirhe dhahi: “Ninoulobani, mudhe momaguva.”
39 Venevo, Pedro ovisasanyedha vina odhowa na awene. Mfiyedhani amuttukulela kwartu y’odhulu vina amamukwela otene amurugunuwa Pedro, onlaga; amulagiha mikumi vina guwo dhinji dhasonile Dorka ahinatti okwa.
40 Pedro oharuma wi otene abudduwemo, okokora, olobela, mmaleliye ozugunuwela wali maningoyá vina ohiloga: “Tabita, kavenya!” Iyene ofugula mento, mmoneliye Pedro, ogilati.
41 Pedro omuttidda nlada, ohinvenyiha, ohakuwela anamasunza* na amamukwela vina ohalagiha Tabita bali mento.
42 Attu otene akala sidadi y’o Jope ahiwa nipadduwo ntti vina enjene amurumela Nabuya.
43 Pedro okala malabo menjene o Jope, vatakulu va mulobwana dhahi walaba na ttebe wakuweliwa Simoni.
Manota
^ Na egregu, “akoddeli.”
^ Na egregu, “àmage na kurenti.”
^ Na egregu, “àttukule omagiwene na kurenti.”
^ Dorka tti nzina na egregu; Tabita tti nzina na Eramayiku, otene antapulela “Nahe.”
^ Na egregu, “akoddeli.”
