Ovuhulela wa Joau 1:1-20
1 Ovuhulela* wa Yezu Kristu ovahiwiye na Mulugu, wila awonihe emeleli aye dhilobo dhinfuna opadduwa mohigonela. Yezu omuruma anju waye modhela oddo ohimoniha na vizinddiyelo dhilobo esi mwimeleli waye Joau,
2 oddo ovaha onamoona wa mazu avahile Mulugu vina onamoona ovahiwe na Yezu Kristu, ndde wa dhilobo dhotedhene dhoniliye.
3 Wohagalala dduddule onengesa na lizu nowiweya vina abale anvuruwana mazu a nivuhulo ntti ewelelaga esile dhilebiwemodhá, vowi nsaka nipimeleliwe nihaddamela.
4 Miyo Joau ddinolebela milogo mitanu na minli dhili o provinsia ya Ázia:
Mukane mahala manddimuwa na murenddele wa Mulugu “Odduwene onkalawo, wali vina onadhe,” modhela muya mitanu na minli dhili osogorho wa mpaddo waye,
5 vina mwa Yezu Kristu “Munamoona Wororomeleya,” “muttaji wa abale akwile” vina “Mulamuleli wa amwene a velaboni ya vati.”
Ole onnikwela, onobolile muttegani mwehu na nikami nayenene—
6 ohinira amwene, anamakutta a Mulugu waye vina Babi—ndde, iyene avahiwe nttittimiho vina owodha okala n’okala-wene. Amen.
7 Moone! Iyene onodha mmiraboni vina attu otene anele omona vamodha na abaleyá amulatile, attu a mahimo otene a mwilaboni anele ovada vapetoni na okubanya mwaha waye. Ndde, Amen.
8 Yehova Mulugu onloga dhahi: “Miyo ddili Woroma vina Womariha.* Miyo ddili Ole onkalawo, waliwo vina onadhe, miyo ddili Mulugu Namawodha-wodha.”
9 Miyo Joau, mbalinyu vina ole ontabuwa vamodha na nyuwo, onadhowe olamulela na nyuwo mumweneni vina onvilela mwaha wa onfwara Yezu, ddali vasuwa enkuweliwa Pátmos sabwa ya olaleya mwaha wa Mulugu vina ovaha onamoona wa Yezu.
10 Muya wokoddela ohiddoniha esile dhinapaduwe siku na Nabuya, miyo ddihiwa mundduni mwaga lizu noliba naligana na oruma wa parhaza,
11 nilogaga: “Esile dhinoniwe, olebe va roluni vina operengezele milogo esi mitanu na minli: Éfezo, Esmirna, Pérgamo, Tiatira, Sardes, Filadélfia na o Laudiseya.”
12 Ddizugunuwa wi ddimone bani waloga na miyo, vina muzugunuwelimi ddihona panti dhinddimuwa tanu na bili dha woru
13 vari va panti eso dhinddimuwa ddimona muttu waladdana na mwana-muttu, wabálile malaya afiya mmanyaloni vina wahabala vapetoni guwo ya woru.
14 Ottiya ejo, musorho na nttitti naye nàli notxena ninga nttoje, notxena ninga kugu, mento aye àli ninga motto onttidda,
15 manyalo aye aladdana na safurhi etxittikiwe va mottoni, lizu naye nàli ninga oruma wa manje menjene.
16 Nlada naye noja mwahikala vineneri tanu na bili, omulomoni waye wambudduwa supadda nolapa nowiva oku-n’oku, kove yaye yali ninga nzuwa ning’animela na guru dhotedhene.
17 Mmonelimi ddimottela osogorho waye ddikalaga ninga ddikwile.
Venevo, iyene oddittidda na nlada naye noja vina ohiloga: “Kuwove. Miyo ddili Woroma vina Womariha,
18 ole onkalawo, ddahikwa mbwenyi ovano ddinokalawo okala n’okala-wene vina ddikaana txavi dha okwa na dha Masiye.*
19 Nona, kaleba dhilobo dhoniliwe, dhilobo dhimpadduwa ovanene vina dhinapadduwe esi dhigavira.
20 Eji ji yoviteya ya Mulugu ya vineneri tanu na bili dhoniliwe nlada naga noja vina na panti dhinddimuwa dha woru tanu na bili: Neneri tanu na bili dhinatonya anju atanu na eli a milogo mitanu na minli, vina panti dhinddimuwa tanu na bili dhintonya milogo mitanu na minli.
Manota
^ Obe, “woniha.”
^ Na egregu, “Alfa vina Omega.” Mazu aba Alfa na Omega, antonyihedha nzu noroma vina nomariha mu alfabetuni wa egregu.
^ Kang’ana Mazu Atapuleliwe.
