Ovuhulela wa Joau 12:1-17
12 Venevo ehoneya ezinddiyelo enddimuwa wirimu: Muyana mmodha wabalile nzuwa, mweri wali mutxiddo mwa manyalo aye vina mmusorhoni mwaye mwahikala mwereko wanna vineneri 12.
2 Muyanayá oddo wahikana yari vina wankuwa na wiwa opa, sabwani wahalile vang’onovi wila abale.
3 Ehoneya ezinddiyelo yina wirimu. Nowa enddimuwa yowopiha ya kori ya motto, yanna misorho mitanu na minli na manyaga kumi, mmusorhoni mwawa mwahikala mwereko tanu na bili,
4 mwila waye ohiburula epaddi yanoraru ya dhineneri dha wirimu, ovokela mutxiddo velaboni ya vati. Nowa ejo enddimuwa yowopiha, ehimela osogorho wa muyana wafuna obala, wila emuje mwanaye agamala obaliwa.
5 Muyanayá ombala mwana, mwana-mulobwana onakumbuze malogo otene na fibo ya mujila. Momaguva ohakihiwa mwanaye, ottukuleliwa vamentoni va Mulugu vina vampaddoni vaye.
6 Muyana ole ottawela mwiddeddereni, mwenemo musasanyedheliwiye mburo na Mulugu vina mugavahiwegiye yoja mwari mwa masiku 1.260.
7 Otatamuwa koddo wirimu: Migeli* vamodha na anju aye awana na nowa enddimuwa yowopiha vina nowa enddimuwa yowopiha vamodha na anju aye awana,
8 mbwenyi awene kapemberhile, nne kakanile vina mburo wirimu.
9 Dhahene eponyedhiwa mutxiddo nowa enddimuwa yowopiha, nowa yoroma enkuweliwa Ddiabo vina Satana, onnyengetta elabo yotene ya vati. Iyene oponyedhiwa velaboni ya vati vina anju aye aponyedhiwa velaboni ya vati vamodha na iyene.
10 Ddihiwa lizu noliba nadha wirimu nilogaga:
“Ovano ohireya ovuneya, owodha na Omwene wa Mulugu wehu vina onddimuwa wa Kristu waye, vowi ovokeliwa velaboni ya vati, namamagedha wa abali ehu, onamagedha mattiyu na mutana vamentoni va Mulugu wehu!
11 Awene ahimpemberha mwaha wa nikami na Mwana-Nibila vina mwaha wa mazu alaleyilani vina kakwelile egumi* yawa, nne kovile okwa.
12 Nona erimu vamodha na nyuwo onkalawo muttabe! Vano ntowa nihugwelani nyuwo onkala velaboni ya vati vina mbara, sabwani Ddiabo ohutitelani na owali onddimuwa, vowi onoziwa wi ohalilena mudhidhi mung’onovi.”
13 Moneli nowa ejile enddimuwa yowopiha wi evokeliwa mutxiddo, velaboni ya vati, enfwara-fwara muyana wambalile mwana-mulobwana.
14 Vano muyanayá ovahiwa makapwa meli ninga a epungu enddimuwa, wi avavele mwiddeddereni mburo waye, wenewo ogavahiwiye dhoja mwa nsaka nimodha, masaka meli, vina jiddiga* ya nsaka, wolapela na nowa ejile.
15 Nowayá ettapika manje ninga mwinje mundduni mwa muyana, wila iyene abwine mmwinjenimwa.
16 Vano mattaka adha omukamihedha muyana ole, mattakayá afugula mulomo wawa amedha mwinje wattapikile nowa enddimuwa yowopiha.
17 Venevo nowayá enddimuwa yowopiha esilidhiwa na muyana oddule vina edhowa oraba koddo na ziza* na muyana nihalilewo, abale aniwelela dhoruma dha Mulugu vina anna mabasa a ovaha onamoona wa Yezu.
Manota
^ Entapulela “Bani Onligana na Mulugu?”
^ Kang’ana Mazu Atapuleliwe, anloga: “Muzimu.”
^ Kuloga, masaka mararu na meya.
^ Na egregu, “beu.”
