Ovuhulela wa Joau 13:1-18
13 Vina iyene* ohimela vamutxesani wa mbara.
Venevo ddihona enama enddimuwa yabudduwa mbara na manyaga kumi vina misorho mitanu na minli, mmanyagani mwawa mwahikala mwereko kumi, mbwenyi vamusorho vawa vakala mazina oveyiha.
2 Enama yowopiha yonilemi yaladdana na nyarugwe, mbwenyi myeddo dhaye dhali ninga dha nikurukumwa, mulomo waye wali ninga mulomo wa poddogoma. Nowa enddimuwa yowopiha ehivaha enama ejo owodha waye, mpaddo waye na onddimuwa waye.
3 Ddihona wi misorho dhaye mmodhayá wakala ninga wapeyihiwe venjene, mbwenyi feridayá yokwana ehivola; venevo elabo yotene ya vati yanfwara enama yowopiha n’otikina.
4 Attuyá annebedha nowa enddimuwa yowopiha sabwani yahivaha onddimuwa enama yowopiha vina aneebedha enama yowopiha na mazu aba: “Bani onligana na enama yowopiha vina bani onwodha owanana enama ejo?”
5 Enamayá yowopiha evahiwa mulomo waloganina dhilobo dhovittukulelana na dhonveyihana Mulugu, evahiwa owodha wa wirana dhinfunani mwari mwa myeri 42.
6 Efugula mulomo waye enveyihaga Mulugu, eveyiha nzina naye, eveyiha mburo onkaliye, ehaveyiha vina abale ankala wirimu.
7 Enama ejo ehirumelihiwa oraba koddo na akoddeli vina wapemberha, ehivahiwa vina owodha wa olamulela mahimo otene, malogo otene, dhilogelo dhotedhene na dhilabo dhotene.
8 Attu otene ankala velaboni ya vati anele webedha enamaya. Ovenyana mpaddutxeliwe elabo, mazina a attu abo kalebiwe munivuruni na egumi na Mwana-Nibila wapiwe.
9 Ole onna maru owiwana, ewe.
10 Akala enofuneya muttu ofugeliwa mukambura, onele ofugeliwa mukambura. Akala muttu onopa na supadda* onele opiwa na supadda, nona mwa abale ali akoddeli anofuniwana ovilela vina okaana nroromelo.
11 Vasogorhova, ddihona enama yina yowopiha yabudduwa velaboni ya vati, enamayá yakaana vamusorho manyaga meeli aladdana na a mwana-nibila, mbwenyi eroma ologa ninga nowa enddimuwa yowopiha.
12 Enama ejo yowopiha enowoniha owodha wawa vamentoni va enama yowopiha yoroma. Enokosiha elabo ya vati na otene ankalamo webedha enama yoroma yowopiha, yanna elodda yokwana evolile.
13 Vina enokosa vizinddiyelo dhinddimuwa, ofiyedha otitiha motto wirimu mpaka velaboni ya vati, attu otene ang’anaga.
14 Enama ejo yowopiha enowanyengetta abale ankala velaboni ya vati, mwaha wa vizinddiyelo dhittiyiwe iyene okosa na enama yowopiha yoroma, vina enowawaddela attu ankala velaboni ya vati wi akose nladdaniho na enama yowopiha yoroma yagwaddiwe na supadda masiki dhawene ekalawovi.
15 Enama yowopiha yanawili evahiwa owodha wa ovaha egumi nladdaniho na enama yowopiha yoroma, venevo nladdaniho na enama ejile yowopiha nanwodha ologa vina oruma opiwa wa otene abale akodda webedha nladdaniho na enama yowopiha.
16 Enama ejo yowopiha enowadidela attu otene—aima na anddimuwa, areli na ayelegi, afuru na adhari—wakela ezinddiyelo nlada noja obe vakoveni,
17 wila ahikalewo muttu onwodha ogula obe oguliha ahili ole onna ezinddiyelo, kuloga, nzina na enama yowopiha obe numeru nintonyihedha nzina naye.
18 Ole onna ononelamo, ekele konta numeru na enama yowopiha, sabwani numeru ntto numeru na muttu. Numeruna ttintti 666. Ole bahi onna eziwelo ddinwodha ononelamo dhilobo esi.