Ovuhulela wa Joau 14:1-20
14 Venevo ddimoona Mwana-Nibila wowimelene Vamwangoni Sioni, vamodha na iyene attu 144.000, alebiwe vakoveni vawa nzina naye vamodha na nzina na Babe.
2 Ddihiwa lizu nadha wirimu ninga oruma wa manje menjene vina ninga oruma onddimuwa wa jayi, oruma wewalemi wali ninga wa anameba aniba afwarihedhaga na arpa* awa.
3 Awene anniba jibo yakala ninga jibo eswa, osogorho wa mpaddo na wa dhottanddiwa nayi dhinna egumi vina wa anddimuwa. Kawo wawodha osunza jibo ejo ahili attu abale 144.000, abuwene aguliwe na Mulugu velaboni ya vati.
4 Aba babale ahivitakalihile na ayana, txibarene kanagonaga na ayana, aba babale aninfwara Mwana-Nibila wego-kuwego ondhowiye. Mulugu ohagula vari va attu ninga milima dhoroma dhinvahiwa Mulugu vina Mwana-Nibila,
5 mwano mwawa kamufwanyiwe ottambi, awene kanna yovirigana.
6 Ddimona anju mwina avavaga vadhulu-vadhulu,* iyene wahikana miselu dhapama dhihingoma wila àlaleyele attu ankala velaboni ya vati, a dhilabo dhotedhene, mahimo otene, dhilogelo dhotedhene vina malogo otene.
7 Iyene wanloga na lizu noliba: “Mmove Mulugu vina munvahe nttittimiho, sabwani ofiya mudhidhi waye w’ottonga, dhahene mmwebedhe Ole opaddutxile erimu, elabo ya vati, bara na fukuwa dha manje.”
8 Vasogorhova odha anju mwina, wanawili, alogaga: “Ogwa! Ogwa Babilónia Munddimuwa, ole wattukulela attu a dhilabo dhotedhene omwa vinyu ya ofunetxa waye ogonihana wonyakuwa!”*
9 Anju mwina ohafwara, wanoraru, alogaga na lizu noliba: “Akala muttu onowebedha enama yowopiha na nladdaniho naye, vina onowakela ezinddiyelo vakoveni obe mmadani,
10 muttu oddo onele omwa vinyu ya Mulugu, kuloga owali Waye, ekuttuliwe ehitatanyiwe na elo, ejuwene yikile Mulugu mukalisini mwa owali waye. Vina onele otabutxiwa na motto, enxofre, vamentoni va anju okoddela na va Mwana-Nibila.
11 Witxi wa otabutxiwa wawa onele owela odhulu okala n’okala-wene; abale anebedha enama yowopiha na nladdaniho naye vamodha na abale anakela ezinddiyelo ya nzina naye kanavumege, mutana na mattiyu.
12 Nona jijene enfuneliwana ovilela akoddeli, abale aniwelela dhoruma dha Mulugu vina animuroromelavi Yezu.”
13 Ddihiwa lizu nadha wirimu nilogaga: “Kaleba mazu aba: Ohagalala babale akwile ali mumodhani na Nabuya, ndde, onloga bu muya wokoddela, aboya avumele mabasa awa attiddilani na guru, sabwani mabasa erilani anowafwara.”
14 Venevo, ddihona murabo wotxena vina mmurabonimwa mwahigilati muttu waladdana na mwana-muttu wanna mmusorhoni mwaye mwereko wa woru, vina wahikana mmadani karonga wowiva.
15 Anju mwina obudduwa o santuwariyu wa mparha amukuwelaga na lizu noliba ole wagilatile vamuraboni eraga: “Osinange milima dha mwilaboni na karonga wawo, sabwani dhimala wittwa pama vina ofiya mudhidhi wa osinanga.”
16 Ole wagilatile vamuraboni, osinanga milima dha mwilaboni na karonga waye.
17 Vasogorhova obudduwa anju mwina o santuwariyuni wa mparha oli wirimu, iyene vina wahikana karonga wowiva.
18 Vebuwani obudduwavo anju mwina wanna owodha wa weddiha motto. Iyene okuwa na lizu noliba amukuwelaga ole wanna karonga wowiva alogaga: “Kahapa mirhinga dha uva dha mwilaboni na karonga wawo wowiva, vowi uvadhá dhimala wittwa.”
19 Venevo, anju ole ohinviriha karonga waye mwilaboni, ohapa uva dha mwilaboni vina ovokela uvadhá mburo onnyigaliwa uva wa owali wa Mulugu.
20 Uva eso dhanyigaliwa otakulu wa sidadi vina mburo mwanyigaliwani mwahibudduwa nikami nafiyedhile omulomoni wa akavalo, olapelanawá wali wa makilometuru 296.*
Manota
^ Arpa, yali epano yobiwa enladdana na viyola wa masaka abano.
^ Obe, “vari va erimu.”
^ Na egregu, porneya. Kang’ana Mazu Atapuleliwe.
^ Na egregu, “estadiyu 1.600.” Estadiyu modha yanna meturu 185.
