Ovuhulela wa Joau 16:1-21
16 Venevo ddihiwa lizu noliba nabudduwa mumparhani, nawaddelaga anju atanu na eli: “Kadhowani mwakuttulele velaboni ya vati esile dhili mmatijelani matanu na meli a owali wa Mulugu.”
2 Anju woroma odhowa vina okuttulela velaboni ya vati esile dhali mutijelani mwaye. Venevo elodda y’opa vaddiddi engonela ovola ehapatta attu abale anna ezinddiyelo ya enama yowopiha vina ebedha nladdaniho na enama ejo.
3 Anju wanawili okuttulela mbara esile dhali mutijelani mwaye. Bara esadduwa bikala nikami ninga na muttu opiwe vina dhopaddutxiwa dhotedhene dhinna egumi dhali mbaramwa dhikwa.
4 Anju wanoraru okuttulela mminjeni na fukuwa dha manje esile dhali mutijelani mwaye, venevo dhisadduwa badhikala nikami.
5 Miyo ddhimwiwa anju onang’anela manje alogaga: “Nyuwo, Ole onkalawo, wali, vina oli Oweddeyana, muli woligana; nona muhittonga wi dhilobo esi dhipadduwe,
6 sabwani awene akuttula nikami na akoddeli vina na anamavuhulela, nona nyuwo muhavaha nikami wila amwe, ejo jinafwanyelela.”
7 Vina ddihiwa lizu nabudduwa vebuwani nilogaga: “Ndde, Yehova Mulugu, Namawodha-wodha, ottonga wenyu kwa ebaribari vina koligana.”
8 Anju wanonayi okuttulela esile dhali mutijelani mwaye vanzuwani, venevo nzuwa nivahiwa owodha wa waddumeya attu na motto.
9 Attuyá addumeyiwa na nzuwa ninddimuwa, mbwenyi katxinuwile nne kamuttittimihile Mulugu, ottiya ejo aveyiha nzina na Mulugu onna owodha wa odhana vizini eso.
10 Anju wanotanu okuttulela esile dhali mutijelani mwaye vampaddoni va enama yowopiha. Venevo omwene wa enama ejo yowopiha okuneleya na eddima vina attu aroma oluma malumi awa mwaha wa wiwa opa.
11 Mbwenyi, awene katxinuwile na merelo awa, ottiya ejo anveyiha Mulugu wa wirimu mwaha wa wiwa opa vina mwaha wa vilodda dhawa dhopa vaddiddi dhingonela ovola.
12 Anju wanotanu na mmodha okuttulela esile dhali mutijelani mwaye mwinje munddimuwa Eufrate, dhahene mwinjeyá ohuma wi esasanyedhiwe dila ya amwene a omadhelo wa nzuwa.
13 Vina ddihona mazu mararu otakala,* ovudheleliwa aladdana na ananddwe abudduwa mwano mwa nowa enddimuwa yowopiha, mwano mwa enama yowopiha vina mwano mwa namavuhulela wottambi.
14 Txibarene, aba mazu avudheleliwe na adomonyo vina mazu abo anowira vizinddiyelo, vina anowafwanya amwene a elabo yotene wila atugumanihedhe oraba koddo ya siku ninddimuwa na Mulugu Namawodha-wodha.
15 “Kavuruwana! Ddindha ninga mbava. Wohagalala ddule onkala mento vina onkoya mwinya dhabalo dhaye wila ahedde yovi, attu anfwanye bali yovi atoteye manyazo.”
16 Mazu abo onyakuwa, ahatugumaniha amwene mburo onkuweliwa Harmagedón na elogelo ya Ebrayiko.*
17 Anju wanotanu na wili okuttulela odhulu esile dhali mutijelani mwaye, venevo nihiweya lizu noliba nabudduwa mburo wokoddela* wa mumparhani ovenyana vampaddoni nilogaga: “Ehakwana!”
18 Ohoneya ozerima wa jayi, malizu na oruma wa jayi vina wahikala ottekenyeya onddimuwa wa mattaka, muromile okala attu velaboni ya vati kunoneyaga ottekenyeya wa mattaka onddimuwa ninga oku.
19 Sidadi enddimuwa egaweya dhipaddi ttaru vina sidadi dha malogo dhigwa; vina Mulugu omubuwela Babilónia Munddimuwa wila amvahe kalisi ya vinyu ya owali waye onddimuwa.
20 Ottiya ejo, suwa dhotedhene dhittawa vina myango dhirimela.
21 Venevo wirimu omotta malugu manddimuwa a maralala àmottelaga attu, nlugu nimodha-nimodha na maralala nalemela waddamela talentu* modha vina attu ahinveyiha Mulugu mwaha wa vizini dhatota maralalayá, vowi eziniyá yattabwa-wene.
Manota
^ Na egregu, “muya dhotakala.”
^ Na egregu, Har Magedón, nindha munzuni na Ebrayiko nintapulela “Mwango w’o Megido.”
^ Obe txino, “mburo wokoddela-koddela.”
^ Talentu ya agregu yalemela kilu 20.4.
