Ovuhulela wa Joau 17:1-18
17 Anju mmodha mwa abale anna matijela matanu na meli odha vina oddaddela: “Kadhawuno, ddinfuna ddulagihe ottongiwa wa jeberuwa munddimuwa oli wogilatene vadhulu va manje menjene.
2 Amwene a velaboni ya vati ahira dha ogonihana wonyakuwa* na iyene, vina attu otene a velaboni ya vati alezela na vinyu ya merelo aye a ogonihana wonyakuwa.”*
3 Anju oddo oddittukulela mwiddeddereni na guru ya muya wokoddela, mwenemo ddimona muyana wagilatile va enamani yowopiha yofila yanna mazina menjene omunyimulana Mulugu, vina yahikana misorho mitanu na minli na manyaga kumi.
4 Muyanayá wahabala guwo dha muttengo munddimuwa vina dhofila, wahivikoddeliha na woru, myara dhattima na perola, mmadani mwaye mwahikala kalisi ya woru yadhalile dhilobo dhonyakuwa vina dhokwaruliha dha merelo aye a ogonihana wonyakuwa.*
5 Vakoveni vaye vahilebiwa nzina notikiniha: “Babilónia Munddimuwa, mayi wa ajeberuwa vina wa dhonyakuwa dhotedhene dhinkosiwa velaboni ya vati.”
6 Ddihona wi muyanayá wahilezela na nikami na akoddeli vina na nikami na anamoona a Yezu.
Mmonelimi dditikina venjene.
7 Dhahene anju ole oddivuza: “Weyo otikineleni? Miyo ddinele ouwaddela entonya muyana, entonya enama yowopiha ya misorho mitanu na minli vina manyaga kumi enimuttukula:
8 Enama yowopiha yonile weyo yahikalagawo, ovano kayiwo, vano enfuna ebudduwe mutxelani novaya* vina enele otolotxiwa. Venevo attu a velaboni ya vati—abale ahilebiwe mazina awa muroluni ya egumi ovenyana mpaddutxeliwe elabo—anele okala otikinene agona wi enama ejo yaligiwo, ovano kayiwo, mbwenyi enele wiyelela okalawo.
9 “Enofuneya muttu okaana zelu wila anonelemo esidhá: Misorho mitanu na minli, dhintonya myango mitanu na minli, esuwene dhigilateli muyanayá.
10 Vina akalawo amwene atanu na eli: Amwene atanu amotta, mmodha okalawo, mwina kanafiya, mbwenyi agadha onakalewo mudhidhi mung’onovi.
11 Enama yowopiha yaliwo, mbwenyi ehiliwo, eji vina mwene wanotanu noraru, endha mwa amwene abale atanu na eli vina endhowa omatolotxeliwo.
12 “Manyaga kumi oniliwe, anatonya amwene kumi ahinakela omwene wawa, mbwenyi awene anakele owodha wawa ninga amwene mwa wora modha, vamodha na enama yowopiha.
13 Awene anna yubuwelo modhene, dhahene anovaha enama yowopiha onddimuwa na owodha wawa wa olamulela.
14 Awene anele owana na Mwana-Nibila, mbwenyi vowi Mwana-Nibilayá Nabuya wa anabuya vina Mwene wa amwene onele wapemberha. Abale ali vamodha na iyene, akuweliwi, asakuliwi vina aroromeli, anele opemberha.”
15 Iyene oddaddela dhahi: “Manje onile weyo vagilatile jeberuwa antonya malogo, muttitti wa attu, dhilabo vina dhilogelo.
16 Manyaga kumi oniliwe vamodha na enama yowopiha, anele omwidda jeberuwayá, awene anele omwaka dhotedhene dhinniyena vina amuttiye yovi, aje maningo aye vina amuddumeye wetene vamottoni.
17 Sabwani Mulugu ohika mmurimani mwawa efunelo ya wakwanihedha yubuwelo yaye, ndde, efunelo ya wakwanihedha yubuwelo yawa modhene mwa ovaha enama yowopiha omwene wawa, ofiyedha wakwanihedheya mazu a Mulugu.
18 Muyana omonile weyo, ontonya sidadi enddimuwa enna omwene onalamulela amwene a velaboni ya vati.”
Manota
^ Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Na egregu, “abismu.”
