Ovuhulela wa Joau 18:1-24
18 Mmalele eso, ddimona anju mwina atitaga wirumu na owodha onddimuwa, vina elabo ya vati ehimoneyiwa na nttittimiho naye.
2 Iyene okuwa na lizu noliba, alogaga: “Ogwa! Ogwa, Babilónia Munddimuwa, iyene okala mburo wa adomonyo vina mburo onvitala muya dhotene dhokwaruliha* na balame dhotene dhokwaruliha vina dhowiddiwa.
3 Vowi malogo otene attiddeya na vinyu ya ofunetxa waye ogonihana wonyakuwa,* amwene a mwilaboni ahira dha ogonihana wonyakuwa na iyene vina anamaguliha a mwilaboni* arela mwaha wa dhilobo dhaye dhattima dhintota manyazo.”
4 Ddihiwa lizu nina nadha wirimu nilogaga: “Budduwanimo, nyuwo attu a nlogo naga, akala kamunfuna okaana muladdu wa dhottega dhaye vina akala kamunfuna ogweliwa vizini dhakene dhinfuna omugwela.
5 Vowi dhottega dhaye dhihinjiva ofiyedha wirimu, vina Mulugu ohubuwela merelo abure akosiliye.
6 Mmwirele dhilobo dhakakene dhakoseliye attu ena, ndde mmwiyihedhe dila bili dhilobo dhikosiliye; mukalisini mwikiliye yomwa, mmwikelemo dila bili.
7 Na mukalelo wakene ovittittimihiliye vina ohugeliye dhilobo dhattima dhintota manyazo, onofwanyela otabutxiwa na okubanya, sabwani iyene onologa mmurimani mwaye: ‘Ddigilati ninga musano* kaddili mamukwela vina txipo kaddinakubanye.’
8 Nona vizini esi dhinanfwanye siku nimodha-nene, okwa, okubanya na dala, vina iyene onele oddumeyiwa wetene vamottoni, sabwani Yehova Mulugu, onimuttonga ddwa guru.
9 “Vina amwene a mwilaboni erile ogonihana wonyakuwa* na iyene vina ogawelanina vamodha mafumo antota manyazo, anele wunla vina anele ovada vapetoni na okubanya onddimuwa sabwa ya iyene, agona witxi wa oddumeyiwa waye.
10 Awene anele wimela wolapela ovaga otabutxiwa waye, alogaga: ‘Uwi! Uwi, weyo Babilónia, sidadi enddimuwa vina yovadda, sabwani ottongiwa wawo odhile mudhidhi mmodhene!’
11 “Vina anamaguliha a mwilaboni anele wunla vina anele okubanya sabwa ya iyene, vowi kanakalewo vina muttu onagulege marondda awa otene,
12 marondda otene a parata, woru, malugu a ttima, perola,* guwo ya linyu yokoddela, guwo ya ttima enddimuwa, guwo eluwiwe na seda yofila, vina dhilobo dhotedhene dhisasanyiwe na muri wonukela vina dhilobo dhotedhene dhisasanyiwe na marfi, miri dhattima, safurhi, mujila vina nlugu ninkuweliwa mármore;
13 vina kanela, vitagano dha o Indiya dhinnukeliha dhoja, lubani, makura onukela, olibanu, vinyu, makura a olivera, ottu wawi nemu-nemu, tirigu, ng’ombe, mabila, akavalo, karo dhinwetiwa na makavalo, adhari vina attu.
14 Txibarene, weyo Babilónia, dhilobo dhapama dhafunetxiwe dhihuttiya, vina dhoja dhawo dhoziva, na dhokana dhawo dhapama dhihurimela vina kunafwanye vina.
15 “Anamaguliha* a dhilobo esi, arelile mwaha waye anele wimela wolapela ovaga otabutxiwa waye, anele wunla vina anele ovikubanyedha,
16 alogaga: ‘Uwi, uwi, weyo sidadi enddimuwa wabalile guwo dha linyu yokoddela, guwo dhattima vina dh’ofila na dhovikoddelihana dha woru, malugu a ttima vina perola,*
17 sabwani dhorela esi dhotedhene dhitolotxiwe mudhidhi mmodhene!’
“Akapitau otene a paporo, otene anttukuliwa na paporo, anameddiha paporo na otene anttidda mabasa mbara anele wimela wolapela-wene,
18 onaga witxi woddumeyiwa waye anele okuwa dhahi: ‘Sidadi gani enladdana na sidadi enddimuwa?’
19 Awene anele oviwazela mbwebwe mmusorhoni, anele okuwa onlaga vina avikubanyedhaga, eraga: ‘Uwi, uwi, weyo sidadi enddimuwa mwaha wa orela wawo, ahirela vina otene anna mapaporo awa mbara, sabwani ohitolotxiwa mudhidhi mmodhene!’
20 “Kattabani nyuwo munkala wirimu vina nyuwo akoddeli, arumiwi, anamavuhulela, sabwani Mulugu, omuttongeli mwaha wa dhilobo dhukoseleni iyene!”
21 Venevo anju wa guru ovenyiha nlugu naladdana na nlugu ninddimuwa notxilana vina oponyedha mbara nluguna, alogaga: “Dhahene Babilónia sidadi enddimuwa onele ovokeliwa mutxiddo momaguva, vina kanoneye vina.
22 Mwa weyo Babilónia kamuneweye vina attu ebaga vina amobaga arpa, nne attu arumihaga jibo peno obaga falauta nne amobaga parhaza. Mwa weyo kamunafwanyeye vina mesiri wa elobo-txilobo, obe muttu onttidda mabasa meena vina kamuneweye vina oruma wa nlugu notxilana.
23 Mwa weyo kamunamoneye vina txeza ya panti, vina kamuneweye dila yanawili lizu na muteli* nne na muteliwi.* Txibarene, anamaguliha* awo àli anddimuwa a elabo vina ohanyengetta attu a malogo otene na merelo awo a okwiri.
24 Ndde, mwa iyene mufwanyiwa nikami na anamavuhulela, na akoddeli vina na attu otene apiwe velaboni ya vati.”
Manota
^ Obe txino, “muya wotene wokwaruliha, ovuma wotene wokwaruliha, na mazu otene ovudheleliwa okwaruliha.”
^ Na egregu, porneya. Kang’ana Mazu Atapuleliwe.
^ Obe, “anamaguliha aneddela dhipaddi dhottiyana-ttiyana agulihaga marondda.”
^ Obe, “mwene wa muyana.”
^ Kang’ana Mazu Atapuleliwe.
^ Nlugu nattima enddimuwa.
^ Obe, “anamaguliha aneddela dhipaddi dhottiyana-ttiyana agulihaga marondda.”
^ Nlugu nattima enddimuwa.
^ Obe, “noivu.”
^ Obe, “noiva.”
^ Obe, “anamaguliha aneddela dhipaddi dhottiyana-ttiyana agulihaga marondda.”