Ovuhulela wa Joau 19:1-21
19 Mmalele eso, miyo ddihiwa wirimu elobo yakala ninga lizu na muttitti wa attu, naloga: “Mmuttittimihe Yehova!* Ovuna, nriho, ewodhelo mwinya ddi Mulugu wehu,
2 sabwani ottonga waye kwebaribari vina koligana. Vowi iyene omuttonga jeberuwa munddimuwa wapupurutxa attu a mwilaboni na ogonihana waye wonyakuwa* vina omukanela ntxiga sabwa ya nikami na adhari aye nikuttuliliye.”
3 Vasogorhova ahiloga wili: “Mmuttittimihe Yehova!* Vina witxi wa oddumeyiwa waye onelege owela odhulu okala n’okala-wene.”
4 Anddimuwa 24 na dhottanddiwa nayi dhinna egumi, akokora, amwebedha Mulugu ogilatile vampaddoni, vina ahiloga: “Amen! Mmuttittimihe Yehova!”*
5 Vina nihiweya lizu nabudduwa vampaddoni, naloga: “Mmuttittimihe Mulugu wehu, nyuwo motene muli adhari aye, munimova, aima vina anddimuwa.”
6 Vasogorhova, ddihiwa elobo yaruma ninga lizu na muttitti munddimuwa wa attu, ninga oruma wa manje menjene vina ninga oruma wa jayi enoba na guru, naloga: “Mmuttittimihe Yehova, * sabwani Yehova Mulugu wehu, Namawodha-wodha, oroma olamulela!
7 Nagalale vina nidhaleliwe wagalala, ninvahe nttittimiho vowi ofiya mudhidhi wa matelo a Mwana-Nibila vina muteliwiyá omala ovisasanyedha.
8 Ndde, iyene ohirumelihiwa wabala guwo dha linyu yapama, yong’animela vina yokoddela sabwani guwo ya linyu yapama entonya merelo oligana a akoddeli.”
9 Iyene oddaddela: “Kaleba, ohagalala, babale akuweleliwe vamattangani* a matelo a Mwana-Nibila.” Iyene vina oddaddela: “Aba mazu a ebaribari a Mulugu.”
10 Venevo, miyo ddimukokorela wi ddimwebedhe. Mbwenyi iyene oddaddela: “Porhe! Kukose ejuwene! Miyo ddili mudhari ninga weyo vina wa abalawo, anna mabasa a ovaha onamoona wa Yezu. Omwebedhe Mulugu! Sabwani ovaha onamoona wa Yezu, jijuwene endhana mazu a mavuhulo.”
11 Ddihona erimu jifuguwile, vina ohoneya kavalo wotxena. Ole wagilatilevo onkuweliwa Wororomeleya vina Webaribari, iyene onottonga vina onoraba koddo n’oligana.
12 Mento aye ali ninga motto onttidda, mmusorhoni mwaye mukala mwereko dhinjidhene. Iyene olebiwa nzina nihinziweya na muttu mwina, ohili iyene mwinya,
13 ohabala guwo epigidhiwe* na nikami, iyene onkuweliwa Nzu na Mulugu.
14 Vina, anyakoddo ali wirimu anninfwara bagilatile mmakavaloni otxena, aweneya ahabala guwo dha linyu yapama, yotxena vina yokoddela.
15 Mwano mwaye munobudduwa supadda nolapa, nowiva wila atolotxena malogo. Iyene onele wattonga na fibo ya mujila. Ottiya ejo, iyene ononyigala mburo onnyigaliwa vinyu ya owali onddimuwa wa Mulugu, Namawodha-wodha.
16 Vaguwoni vaye, ndde vatakuni vaye vahilebiwa nzina: Mwene wa amwene vina Nabuya wa anabuya.
17 Ddimona vina anju wemelile vanzuwani, iyene ohikuwa na lizu noliba vina ohaddela balame dhotedhene dhavava vadhulu-vadhulu: “Kadhaunoni, mutugumanele mattanga manddimuwa a Mulugu,
18 wila muje nama ya amwene, nama ya asogorheli a anyakoddo, nama ya attu oliba, nama ya akavalo na anyakavaloyá vina nama ya otene, afuru, adhari, aima vina ya anddimuwa.”
19 Vina ddihona enama yowopiha vina amwene a mwilaboni vamodha na anyakoddo awa, batugumanile wi arabe koddo na ole wagilatile vakavaloni vamodha na anyakoddo aye.
20 Enama ejo yowopiha, ettiddiwa vamodha na namavuhulela wottambi wakosa vizinddiyelo osogorho wa enama ejo yanyengettiyena attu akelile ezinddiyelo ya enama yowopiha vamodha na abale ebedha nladdaniho na enamaya. Amento-ene, obili aponyedhiwa muttaddani yattidda, enddumeya na enxofre.
21 Vano, attu owinjivayá apiwa na supadda nolapa nabudduwa mwano mwa ole wagilatile vakavaloni. Vina balame dhotene dhihirubala na nama dhawa.
Manota
^ Obe, “aleluya.” Mazu aba antapulela ‘Mmuttittimihe Jah!’ “Jah” ekalelo yogwaddela oleba nzina Yehova.
^ Na egregu, porneya. Kang’ana Mazu Atapuleliwe.
^ Obe, “aleluya.” Mazu aba antapulela ‘Mmuttittimihe Jah!’ “Jah” ekalelo yogwaddela oleba nzina Yehova.
^ Obe, “aleluya.” Mazu aba antapulela ‘Mmuttittimihe Jah!’ “Jah” ekalelo yogwaddela oleba nzina Yehova.
^ Obe, “aleluya.” Mazu aba antapulela ‘Mmuttittimihe Jah!’ “Jah” ekalelo yogwaddela oleba nzina Yehova.
^ Obe, “vasiyarini.”
^ Obe txino, “ekattiwe.”
