Ovuhulela wa Joau 2:1-29
2 “Anju wa mulogo w’o Éfezo omulebele dhahi: Dhilobo esi onloga ddule ottiddelile na nlada naye noja vineneri tanu na bili vina onedda vari va panti tanu na bili dha woru:
2 ‘Ddiziwa merelo awo, mabasa anttiddiwe na ntidi, ovilela wawo vina ddiziwa wi weyo kunavilela attu abure vina ohaweha abale anloga wi arumiwi oku ahili, vina ohona wi aweneyá attambi.
3 Weyo onovilela vina kulemilena dhilobo dhinji dhinufwanya mwaha wa nzina naga.
4 Vano, ddikaana elobo yowusumulelana; weyo ottiya okwela waniwena vamaromo.
5 “‘Nona kobuwela makalelo agwiliwe, katxinuwa, okose merelo anna weyo vamaromo. Ogahitxinuwe ddinele odha vina ddinele ovenyihavo panti yawo enddimuwa vamburoniva.
6 Vano, ekalawo elobo yapama enkosa weyo: Onowidda merelo a nikuru na Nikolau, dhahene ninga muniddela miyo vina.
7 Onna maru ewe esile dhinloga muya wokoddela, addelaga milogo: Ole onapemberhe ddinele omuttiya oja milima dha muri wa egumi, oli mparaizu wa Mulugu.’
8 “Anju wa mulogo w’o Esmirna omulebele dhahi: Dhilobo esi onloga ddule oli ‘Woroma vina Womariha,’ ole wakwile vina eyelela okalawo:
9 ‘Ddinoziwa goyi dhawo vina oyelega wawo—vano weyo, wamureli—vina ddinoziwa dhoveyiha dha abale anloga wi Ayuda, mbwenyi mwebaribari kahiyo, awene nikuru na* Satana.
10 Kuwove dhotedhene dhinfuniwe otabuwa. Moone! Ddiabo onele wafugelihagavi ena mwa nyuwo mukambura wila mwehiwe mowakwana-mwene vina nyuwo munele ofwanyiwa goyi mwari mwa masiku kumi. Kakala wororomeleya mpaka okwa wawo, miyo ddinele wuvaha nlivo* na egumi.
11 Onna maru ewe esile dhinloga muya wokoddela, addelaga milogo: Ole onapemberhe, okwa wanawili kunamonihe goyi.’
12 “Anju wa mulogo w’o Pergamu omulebele dhahi: Dhilobo esi onloga ddule onna supadda nolapa, niniva oku-n’oku:
13 ‘Ddinoziwa onkaliwe, kuloga, oli mpaddo wa Satana; vano weyo onodidelavi weddana nzina naga vina kuttiyile oddiroromela, masiki malabo a Antipas oli munamoona waga wororomeleya, opiwe sidadi yenyu, wenewo onkala Satana.
14 “‘Vano, ddikaana yowusumulelana, wenewo onkala weyo, okanawo attu amfwara masunziho a Balau, omusunzihile Balak wawettekela murega ana Izrayel, wi aje dhoja dhinkutteliwa amulugu a ottambi vina ere ogonihana wonyakuwa.*
15 N’ekalelo yakakene, vari vawo akalawo amfwara masunziho a nikuru na Nikolau.
16 Nona katxinuwa. Ogahikose dhawene, ddinele odha momaguva vina ddinele owana na awene ddilabihedhaga supadda nolapa, nimbudduwa mwano mwaga.
17 “‘Onna maru ewe esile dhinloga muya wokoddela, addelaga milogo: Ole onapemberhe, ddinele omvaha maná ovitiwe, vina ddinele omvaha nlugu ning’ono n’otxena, vanluguniva vahilebiwa nzina niswa nihinziweya na muttu mwina ohili ole onakela.’
18 “Anju wa mulogo w’o Tiatira omulebele dhahi: Dhilobo esi onloga ddi Mwana Mulugu, ole onna mento ankala ninga motto onttidda vina onna manyalo ali ninga safurhi yotxittikiwa:
19 ‘Ddinoziwa merelo awo, okwela wawo, nroromelo nawo, mabasa animukoseliwe Mulugu vina ovilela wawo, vina ddinoziwa wi merelo awo a ovanene ahinjiva opitta awale.
20 “‘Vano, ddikaana elobo yowusumulelana; weyo ononvilelavi muyana oddule Jezabel, onloga wi namavuhulela, onasunziha vina onapupurutxa emeleli aga, àkwekwettelaga wira ogonihana wonyakuwa* vina oja dhoja dhinkutteliwa amulugu a ottambi.
21 Miyo ddinvaha mudhidhi muyana oddo wi atxinuwe, mbwenyi iyeneyá kafunile otxinuwa mmereloni mwaye a ogonihana wonyakuwa.*
22 Moone! Ddinfuna ddimugwihedhe eredda vina abale anlupa matelo na iyene ddinele wagwihedha goyi enddimuwa, agakodda otxinuwa na merelo a muyanaya.
23 Ddinele wapa anaye na ezini yowopiha, dhawene milogo dhotedhene dhinele oziwa wi miyo ddili ole ompima dhubuwelo na dhoviteya* dha mmurimani vina ddinele ompitxela muttu-muttu mowiwanana na merelo aye.
24 “‘Vano, ddinowawaddela abale ahalile o Tiatira, otene ahinfwara masunziho aba, abale ahifiyedhile oziwa esile dhinkuweliwa “dhilobo dhoviteya dha Satana.” Miyo kaddinawulemeliheni muttorho mwina.
25 Vano, muttiddelevi esile dhinna nyuwo mpaka odha waga.
26 Ole onapemberhe vina oneddena dila dhaga mpaka omagomo, miyo ddinele omvaha owodha wa olamulela malogo,
27 iyene onele wakumbuza na fibo ya mujila, nona anele onyenyiwa ninga yobo y’ologo, dhawene ninga mwakelilemi owodha na Babaga.
28 Miyo ddinele omvaha neneri ya membesi.*
29 Onna maru ewe esile dhinloga muya wokoddela, addelaga milogo.’
Manota
^ Na egregu, “sinagoga ya.”
^ Na egregu, “kara.”
^ Na egregu, porneya. Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Obe, “dhubuwelo dha vati va murima.” Na egregu, “belebedhu.”
^ Obe, “ttandda.”
